2 Tɛsalɔnikaebi 2:3 - EBƆRƐ BE KAWƆL

³ Men sa maŋ kaŋ shin nɛ esa kama e bɔla ekpa kikɛ so n fule menyi, ŋkpal manɛ so, Enyɛnpe be kachɛ na maaŋ ba ama kenyaŋɛto m buu Ebɔrɛ na ba na nɛ alubipo nɛ mbe kelamba la edɛ to be keluri na lar na pɔɛŋ.

2 Tɛsalɔnikaebi 2:3 ပူးပေါင်းရင်းမြစ်များ

Danɛl 11:36

Ewura na beeŋ wora kusɔ kama nɛ k par mo. E beeŋ maaŋ mbe kumu so a chɔ kegbir kikɛ, hale m ba ka wora fanɛ e chɔ Enyɛnpetale Ebɔrɛ gba. E beeŋ nya ekpa n wora loŋ n ya fo saŋɛ nɛ Ebɔrɛ beeŋ gberge mo kusoe. Ebɔrɛ malɛ beeŋ wora kusɔ kama nɛ e yili.

Danɛl 7:25

E beeŋ malga ŋ gbiti Enyɛnpetale Ebɔrɛ na nseŋ mɛaŋ Ebɔrɛ be basa. E beeŋ wora ania fanɛ e beeŋ chɛrga bumo be kabɔrɛshuŋ be mbraana nɛ nchɛgboŋana, nseŋ ji Ebɔrɛ b basa so kuwura nfɛnsa nɛ bargato.

Danɛl 8:25

Ŋkpal mbe kafulesheŋ so, asheŋ beeŋ baa nyalɛ n sa mo nɛ e fara a wu mbe kumu fanɛ e bɔ basa damta. E beeŋ mur basa damta nseŋ koso a kɔ Ebɔrɛ nɛ e la bewura kikɛ to be ewura na. Ama Ebɔrɛ be eleŋ beeŋ ba mur mo cheche.

Baru lela nɛ Jɔn kute na 17:12

Ŋ ka daa wɔ bumo kutɔ na fo ketre nɛ fo sa ma na be eleŋ na nɛ n daa ta a keni bumo so nsaa kuŋ bumo ashi kulubi to. Bumo be ekama maŋ foe ekpa she emo nɛ e chɛr a beeŋ foe na, saŋɛ na so abɔrɛsibɛ na be kamalga na beeŋ bɔlɔ.

1 Kɔrintebi 6:9

Men maŋ nyi fanɛ mannɛ basa lubi e naaŋ ba nya Ebɔrɛ be kuwura na to n luri ŋko? Men sa maŋ shin nɛ esa kikɛ e fule menyi. Kesakaleawuraana kikɛ ŋko bumo nɛ baa shuŋ agbirana ŋko bumo nɛ baa kil nsaa ji kesakalea ŋko benyɛn mo nɛ baa di abar keche nɛ kenyɛn kikɛ maaŋ nya Ebɔrɛ be kuwura na to n luri kikɛ.

Ɛfesesebi 5:6

Men sa maŋ shin nɛ esa kama e ta mmalga fuloŋ n fule menyi, ŋkpal manɛ so, loŋ be asheŋ so nɛ Ebɔrɛ be demuji be agbo bee ba bumo nɛ b maa nu a sa mo na so.

1 Jɔn 2:18

Ma mbi shasoana, lalaloge be saŋɛ na bee fo nna na. Men daŋ nu fanɛ Kristo mo doŋ beeŋ ba, naniere malɛ Kristo mo doŋana damta ba, amoso nɛ an pin fanɛ lalaloge be jemanɛ na fo.

1 Jɔn 4:3

Ama kiyoyu kama nɛ e maa ji Yesu be asheŋ be shɛda, loŋ be kiyoyu maŋ shi Ebɔrɛ kutɔ. Loŋ be kiyoyu na e la edoŋ na be kiyoyu mo nɛ men nu fanɛ e bee ba na. Mo e teŋ ba durnya ere to na.

Kelaraŋŋini 17:11

Kusɔbɔya mo nɛ e daa wɔ ŋkpa to ŋkaa maŋ naa wɔtɔ na e la ewura burwasopo. E la beshunu mo nɛ b fara m ba na to be eko nna a yɔ nɛ e ya mur.

Kelaraŋŋini 17:8

Kusɔbɔya mo nɛ fo wu na daa wɔ ŋkpa to nna, ama naniere e maŋ naa wɔ ŋkpa to. A ka gbrɛbi nɛ e shi kemaŋ nɛ baa tre Abis na to n lar nɛ b mur mo. Basa nɛ b wɔ durnya ere to nɛ b maŋ sibɛ bumo be atre n wɔtɔ ŋkpa be kawɔl na to saŋɛ nɛ durnya ere fara kikɛ na kaŋ wu kusɔbɔya na, bumo be nnɔ beeŋ mɔ bumo, ŋkpal manɛ so, e daa wɔ ŋkpa to nna, ama naniere e maŋ naa wɔtɔ, ama mo alɛ kraa beeŋ naŋ ba.