1 Timoti 4:16 - EBƆRƐ BE KAWƆL

¹⁶ Baa de so a keni fo kumu nɛ fo abɔrɛsheŋ be keŋini na so nɛnɛ. Baa wora asɔ ere, ŋkpal manɛ so, loŋ e naaŋ mɔlga fo nɛ bumo nɛ baa nu fo mmalga na.

1 Timoti 4:16 ပူးပေါင်းရင်းမြစ်များ

1 Kronikɛls 28:10

Baa nyi fanɛ Enyɛnpe Ebɔrɛ na e lara fo fanɛ fo pɔr mbe bɔrɛlambu cheembi na n sa mo. Amoso a daga fo ka nya kagbene m pɔr kumo nɛnɛ.”

2 Kronikɛls 19:6

nseŋ kaŋɛ bumo le: “Men ba de so kananɛ menyee ji basa demu, ŋkpal manɛ so mannɛ dimɛdi be eleŋ so nɛ menyee bɔla a ji demu, ama Enyɛnpe Ebɔrɛ peya. Ebɔrɛ na malɛ wɔ menyi kutɔ saŋɛ nɛ menyee ji demu na.

Ɛksodɔs 23:13

Men wora kasonu n sa kusɔ kama nɛ ma, Enyɛnpe Ebɔrɛ kaŋɛ menyi ere kikɛ. Menyi alɛ e sa maŋ kaŋ shuŋ kegbir kama ŋko a ti kegbir kama be ketre.”

Aizaaya 55:11

aloŋ nɛ ma kɔnɔ to be mmalga gba du. Kusɔ kama nɛ ŋ kaŋɛ, aloŋ gbagba e naa wora.

Jɛremaya 23:22

Nɛ b daŋ taga ma to nsaa nyi kusɔ nɛ k wɔ ma nfɛra to, b daa beeŋ bɔ ma kubɔya n sa ma basa nseŋ shin nɛ b chɛrga bumo be nfɛra n lar alubi be kewora to m bɛta m ba ŋ kutɔ.

Maak 13:9

Men baa de menyi be amu so, ŋkpal manɛ so, basa beeŋ pɛ menyi n yɔ demujikpa n ya kuya menyi so ashi nshɛrbuana to. Baaŋ shin nɛ men yili bewurbi nɛ bewurgboŋ be anishito ŋkpal ma so nɛ men ji ma asheŋ be shɛda n sa bumo.

Luuk 21:34

Ama men baa de menyi be amu so nsaa maa wɔ kebaawɔtɔ jiga nɛ kasanuu nɛ durnya ere to be kasɔsha be kebaawɔtɔ to nɛ menyi be aba e pɔ menyi nɛ kachɛ nɛ ma, Nyiŋgbasa Pibinyɛn beeŋ ba na e purgi menyi fanɛ kejigbelɛ na.

Ashuŋ Shunso 26:22

Ama Ebɔrɛ chɛ ma to hale m ba fo kabre nɛ n yili nfe a ji ma shɛda a sa ekama nyam, begboŋi nɛ bewurbi kikɛ na. Kusɔ nɛ mee malga e la kusɔ koŋwule chap nɛ anebiana nɛ Mosis gba kaŋɛ fanɛ k beeŋ wora na.

Ashuŋ Shunso 6:4

nɛ anyi alɛ e baa wɔ kabɔrɛkule kpakpaso to nseŋ naa bɔ kubɔya na.”

Romebi 11:14

Shere mee wora loŋ, meeŋ tiŋ n shin nɛ kayɛlga e pɛ ma basa nɛ loŋ e tiŋ n shin nɛ bumo be beko e nya kumɔlga.

Romebi 16:17

Ŋ kurgepoana, mee fiɛ menyi so nna fanɛ men baa de basa nɛ baa shin nɛ kebarga to bee ba basa to nseŋ naa lar keŋini nɛ men daŋ nya na be kaman a wɔtɔ a bar asheŋ ko m ba kaa kagle basa yirda be ekpa na so. Amoso, men baa gelge bumo.

Romebi 2:7

Bumo nɛ alelasheŋ be kewora maa gben bumo nɛ baa fin kemaŋkura nɛ bunyaŋ nɛ kebaawɔtɔ nɛ k maŋ kɔ luwu na, e beeŋ sa bumo ŋkpa nɛ k maŋ kɔ ekar na.

1 Kɔrintebi 1:21

Ebɔrɛ daŋ bɔla mbe kanyiasheŋ so nna n yili kumo fanɛ edimɛdi e sa maŋ ta bumo gbagba be kanyiasheŋ so m ba pin mo. Ama mo ere gbagba be keparso nɛ e yili kumo fanɛ e beeŋ bɔla kubɔya mo nɛ anyeeŋ bɔ n sa basa nɛ baa tre kawulisheŋ be mmalga ere so m mɔlga bekama nɛ b yirda na.

1 Kɔrintebi 9:22

Nɛ m baa wɔ yirda na to be bepɔshipo to, mee ta ma kumu nna a ki epɔsopo, saŋɛ na so meeŋ nya bumo bepɔshipo na n wɔtɔ Yesu be kebɛso to. N ta ma kumu nna ŋ ki kusɔ kikɛ n sa basa be nnaŋ to kikɛ, saŋɛ na so meeŋ bɔla ekpa kama so n shin nɛ basa na be beko e nya kumɔlga.

1 Kɔrintebi 9:27

Ama mee kaa kɔrfɛ ma eyur nna a shin nɛ k bee nu a sa ma, nɛ mannɛ aloŋ, meeŋ bɔ kubɔya na n sa basa nɛ ma alɛ gbagba e paŋ kɔŋkɔŋ na be keji.

Ɛfesesebi 4:14

Saŋɛ na so an maaŋ naa du fanɛ mbia nɛ basa e baa ta efɛ be keŋini be yiri kikɛ a kɔ a kpata anyi a lɛ a yɔ a ba fanɛ afu ka shin nɛ nchu koso a baga to na. Basa nɛ baa wora loŋ na wɔtɔ nna a kɔ bumo gbagba be efɛ be kanyiasheŋ a shin nɛ basa bee foe ekpa.

Kɔlɔsiebi 4:17

Men kaŋɛ Akipes le: “Baa de kushuŋ nɛ fo sɔ ŋkpal fo ka la Enyɛnpe peya na so na so a wora kumo.”

1 Tɛsalɔnikaebi 2:16

Kumɔlga be kubɔya nɛ an daŋ bar nnyamase na gba, Juwebi na daa maa sha an ka bɔ kumo n sa nnyamase na. Loŋ so, bumo be asheŋ lubi daa ti so nna saŋkama. Naniere malɛ Ebɔrɛ be agbo kaa bumo so.

1 Timoti 1:3

Ŋ ka daa yɔ Masɛdonia, ŋ kaŋɛ fo fanɛ fo shir a wɔ Ɛfeses. Mee sha fanɛ fo baa kraa wɔ ndoŋ ŋkpal basa nɛ b wɔ ndoŋ a ŋini keŋini pɔtɛ nɛ a daga fo ka ju bumo loŋ to na so.

1 Timoti 4:15

Baa wora asɔ ere nseŋ ta fo kagbene kikɛ n wɔtɔ amo to nɛ basa kikɛ e wu kananɛ fo abɔrɛsheŋ be kenyi bee wora keshi a ti so.

1 Timoti 4:6

Nɛ fo ŋini bekurgepoana na asheŋ ere, feeŋ baa la Kristo Yesu be kenya lela a kɔ yirda be mmalga nɛ keŋini lela nɛ fo bɛ so na be eleŋ.

2 Timoti 2:10

Amoso nɛ mee ji awurfoŋ ere be kanyiti ŋkpal Ebɔrɛ be basa laraso na so nɛ bumo alɛ gba e tiŋ m bɔla Kristo Yesu so n nya kumɔlga nɛ kemaŋkura nɛ k maŋ kɔ ekar na.

2 Timoti 3:14

Ama fo ere, baa kɔ asɔ nɛ fo koya nseŋ yirda na to kpakpa nsaa nyiŋi esa nɛ fo koya amo mo kutɔ na.

2 Timoti 4:2

fo baa bɔ kubɔya na a sa basa. Kelela ŋko kulubi to kikɛ baa sha kebaabɔ kubɔya na a sa basa a shin nɛ b baa wu kananɛ kashenteŋ na baa dese geeŋ. Baa ta kubɔya na a fiɛ basa so ŋko a leŋ bumo to nsaa kɔ kanyiti a ŋini bumo abɔrɛsheŋ na.

Taites 1:9

A daga fanɛ e baa kɔ kubɔya nɛ k bɛ anyi be keŋini nɛ esa beeŋ tiŋ n yirda na so to kpakpa. Loŋ na e beeŋ tiŋ n ta keŋini lela n leŋ basa to nseŋ naŋ tiŋ n ji m bri bumo nɛ baa ji emɔrɔ na.

Taites 2:15

Baa ŋini asheŋ ere a leŋ basa na to nsaa ta fo kejuŋkpar be eleŋ kikɛ na a fiɛ bumo so. Sa maŋ shin nɛ esa kikɛ e fɛl fo.

Taites 2:7

Kusɔ kama nɛ fo alɛ gbagba bee wora, shin nɛ k baa la kesheŋ nɛ basa beeŋ tiŋ ŋ keni so n wora asheŋ lela. Baa kɔ kashenteŋ nɛ kenishipere a wɔtɔ fo keŋini to.

Failimɔn 1:19

Ma Pɔɔl gbagba e naa ta ma enɔ a sibɛ fo kede ere a kaŋɛ fo le na fanɛ meeŋ ka loŋ be kukɔ kikɛ, ma alɛ maaŋ bishi fo kɔnɔ kikɛ fanɛ fo alɛ gba ji ma kukɔ nna ŋkpal fo ŋkpa ere so.

Hibruwebi 12:15

Men baa de so nɛ ekama e sa maŋ kaŋ lar Ebɔrɛ be kuwɔr be kakɛ na to nseŋ naa de so nɛ kekishi be nfɛra kama e sa maŋ luri menyi to n wul basa damta to n jija bumo be kebaawɔtɔ.

Hibruwebi 13:9

Men sa maŋ shin nɛ keŋini be nnaŋ to nɛ a wɔtɔ ere e fule menyi kikɛ nɛ men foe ekpa. Ebɔrɛ be kuwɔr be kakɛ e daga kebaaleŋ menyi be ŋgbeneana to, mannɛ edaŋkaresheŋ be ekpaana be ajibi nɛ a maŋ kɔ tɔnɔ n sa basa nɛ b ji amo na.

Jeems 5:20

esa nɛ e chɛ mo to na e baa nyi fanɛ esa kama nɛ e chɛ alubiworapo to nɛ e lar mbe alubi na to mɔlga amodoŋwura be kiyoyu ashi luwu to nseŋ shin nɛ Ebɔrɛ kpra alubi damta n lɛ.