1 Pita 2:17 - EBƆRƐ BE KAWƆL

¹⁷ Men baa sa basa kikɛ bunyaŋ nsaa sha bekurgepoana na kikɛ. Men baa ŋana Ebɔrɛ nsaa bunyaŋ men be efuli so be ewurgboŋ na.

1 Pita 2:17 ပူးပေါင်းရင်းမြစ်များ

Jɛnesis 20:11

Ndoŋ nna nɛ Eebraham kaŋɛ: “N daŋ fɛ nna fanɛ esa kama maaŋ baa wɔ nfe nsaa nyi Ebɔrɛ kashenteŋto, amoso abaanaaworasheŋ baaŋ mɔ ma nseŋ ta ma eche.

Jɛnesis 22:12

Nɛ malaika na kaŋɛ: “Sa maŋ kaŋ mɔ kebia na. Naniere m pin fo ka bee sha ma Ebɔrɛ, ŋkpal manɛ so, fo maŋ mɔn ma fo pibinyɛn koŋwule nɛ fee sha ga na.”

Jɛnesis 42:18

Kumo be kachɛ sasopo nɛ Josɛf kaŋɛ bumo le: “Mee ŋana Ebɔrɛ nna, amoso men wora kesheŋ nɛ mee shin nɛ ŋ kaŋɛ menyi ere nseŋ nya men be amu.

1 Kronikɛls 29:20

Kede be kaman nɛ ewura Deevid kaŋɛ basa na kikɛ le: “Men di Enyɛnpe men nananyɛnana be Ebɔrɛ na epaŋ.” Ndoŋ nna nɛ basa na kikɛ di Ebɔrɛ epaŋ nseŋ jɔŋɛ ŋ kurgi bumo be amu n yuu to m bunyaŋ Enyɛnpe Ebɔrɛ nɛ ewura Deevid kikɛ.

Nshɛ 111:10

Men baa bunyaŋ Enyɛnpe Ebɔrɛ na, ŋkpal manɛ so, ekpa nɛ esa beeŋ bɔla so n nya kanyiasheŋ nna na. Bekama nɛ baa bɛ mbe mbraana so na e naa pin asheŋ to nɛnɛ. Kapandi e baa la mo peya mbaanaayɔ.

Ɛksodɔs 20:12

Men baa bunyaŋ men nioana nɛ men tutoana, saŋɛ na so men be ŋkpa beeŋ teŋi so ashi kasawule nɛ mee ta a sa menyi na so.

Aŋasa 1:7

Kabɔrɛŋana e la kenyi be sososo. Ewulpo e naa kini kanyiasheŋ be kekoya nɛ kebela be kasogberge.

Aŋasa 23:17

Sa maŋ shin nɛ belubiworapo be asheŋ e baa keta fo kayɛlga, ama shin nɛ kabɔrɛŋana be kebaawɔtɔ e pere fo kenishi.

Aŋasa 24:21

M pibi, baa ŋana Enyɛnpe Ebɔrɛ na nsaa ŋana bewura gba, sa maa tu amukpakpaso wuraana a wora asheŋ.

Kaŋinichiŋgeliŋ 8:2

Fo baŋ nase kɔnɔ Ebɔrɛ be anishito fanɛ feeŋ baa nu a sa ewura, kumo ere a daga fanɛ fo baa wora loŋ.

Levitikɔs 19:32

Men baa sa basakpar bunyaŋ nsaa maŋkura bumo. Men baa nu a sa ma bunyanso, ŋkpal manɛ so, ma e la Enyɛnpe Ebɔrɛ na.

Zakareya 11:14

Kede be kaman nɛ n naŋ bu kekpabi nyɔsopo nɛ mee tre ‘kɔnɔkoŋwule’ na to, nɛ Juda nɛ Israɛl be kekurgeji ku to.

Matiu 22:21

Nɛ basa na kaŋɛ: “Ewurgboŋ Siza peya.” Nɛ Yesu kaŋɛ bumo: “To, kumo ere, men baa ta asɔ nɛ a la Ewurgboŋ Siza peya a sa mo nsaa ta Ebɔrɛ malɛ peya a sa mo.”

Baru lela nɛ Jɔn kute na 13:35

Nɛ menyee sha abar, basa kikɛ beeŋ pin men ka la ma bebɛsopo.”

Romebi 12:10

Men baa kɔ bekurgepo be kasha a sha abar nsaa juŋkpar a bunyaŋ abar.

Romebi 13:7

Amoso, men baa ka akɔ kama nɛ men ji bumo. Nɛ k la fanɛ menyi be amu so be lampo nna, men ka, nɛ kumo alɛ naa la fanɛ menyi be asɔ be lampo nna, men ka amo alɛ gba be kukɔ. Nɛ k naa la fanɛ bunyaŋ nna, men jɔŋɛ bumo ase m bunyaŋ bumo.

2 Kɔrintebi 7:1

N teri shasoana, ŋkpal an ka kɔ le be nnɔ nasesoana ere kikɛ so, men shin nɛ an fɔr kusɔ kama nɛ k bee sa dimɛdi be eyur nɛ mbe kiyoyu eyurpi n lɛ ŋkeŋ shin nɛ an baa pere kenishi a sha kebaaki cheembi nɛnɛ a wɔ Ebɔrɛ be kaŋana be kebaawɔtɔ to.

Ɛfesesebi 5:21

Men baa bar men be amu kaseto a sa abar ŋkpal men be bunyaŋ nɛ men kɔ a sa Kristo na so.

Filipaiebi 2:3

Sa maŋ ta kejimuni be ketresha n juŋkpar n wora asheŋ, fo alɛ e sa maa kɔ kamoowu fuloŋ. Ama baa bar fo kumu kaseto kusɔ kama to a ta basa fanɛ bumo e bɔ fo.

1 Timoti 6:1

A daga fanɛ anya kikɛ e baa sa bumo nyɛnpeana bunyaŋ kikɛ nɛ k daga nɛ basa pɔtɛ e sa maŋ nya ekpa m malga kulubi kikɛ ŋ gbiti Ebɔrɛ be ketre ŋko anyi be keŋini na.

Hibruwebi 13:1

Men ba kraa wɔtɔ a sha abar fanɛ keniopibiana ashi Kristo to.

1 Pita 1:22

Naniere bre men ka nu n sa kashenteŋ na nɛ b fɔr men be ŋgbeneana to nɛ men nyalɛ so a kɔ kashenteŋ be kasha a sha men kurgepoana ere, men baa ta men be ŋgbene kikɛ a sha abar kagbene koŋwuleso.

1 Pita 2:13

Men baa kpal Enyɛnpe so a nu a sa kenimuji kikɛ nɛ k wɔ basa to. K beeŋ tiŋ a la men be efuli so be ewurgboŋ nɛ e la ejuŋkparpo ashi kenimuji kikɛ to na

1 Pita 5:5

Mbrantiɛ, loŋ koŋwule na nɛ a daga fanɛ men baa nu a sa benyɛnnimuana. Men ta kumu be kebar kaseto m mea to fanɛ wajɛ a wɔtɔ a sa abar, ŋkpal manɛ so, Ebɔrɛ maa sa kamoowuwuraana kashuli, ama bumo nɛ baa bar bumo be amu kaseto bre, e bee wu bumo kuwɔr nna.

1 Samuɛl 15:30

Nɛ Sɔɔl kaŋɛ le: “N wora kulubi ama mee kule fo nna nɛ fo ta bunyaŋ m buu ma so ashi benapo be benimu ere nɛ Israɛl be basa kikɛ be anishito n shin nɛ n tu fo n ya bunyaŋ Enyɛnpe fo Ebɔrɛ na.”