रूथ 1:7 - परमेश्‍वरए ताँ तमु क्युइर

⁷ नाओमीइ ह्रोंसए चोंमैं ङ्हिं किंसि ह्रोंस टिबै क्ल्ह्‍यो वाथेंइ, धै ह्रोंसए धिंर ह्‍याबर यहूदाए घ्याँ क्हाइ।

रूथ 1:7 ပူးပေါင်းရင်းမြစ်များ

प्रस्थान 18:27

च लिउँइँ मोशाइ ह्रोंसए क्येंलाइ मान लसि कुलइ, धै यित्रो ह्रोंसए ह्‍युलउँइँ ह्‍याबै घ्याँ क्हाइ।

रूथ 1:10

धै चोंमैंइ नाओमीने बिइ, “ङि या क्हिने बालुन् क्हिए म्हिमैं ङाँर ह्‍याम्।”

रूथ 1:14

चु ताँ थेसि चमैं धबै बेल्‍ले क्रोइ। धै स्युमिलाइ म्वें लसि ओर्पा माइत धिंउँइँ एह्‍याइ। रूथ बिस्याँ स्युमिनेन् टिइ।

रूथ 1:6

ह्रोंसए ह्‍युलर्बै म्हिमैंलाइ याहवेहजी आशिक पिंसि चब-थुँब् पिंइमुँ रो बिबै ताँ नाओमीइ मोआब ह्‍युलर थेइ। छतसि नाओमी नेरो चए चोंमैं ह्रोंसए धिंर एह्‍याबै सैं लइ।

रूथ 1:8

झाइले घ्याँर प्ररिमा नाओमीइ ह्रोंसए चोंमैंने बिइ, “क्हेमैं ह्रों-ह्रोंसए माइत धिंर एह्‍याद्, धै ह्रोंसए आमाने टिद्! सियाबै ङए च्हमैं नेरो ङए फिर क्हेमैंइ म्हाँया लब् धोंलेन् क्हेमैंए फिरै या याहवेहजी म्हाँया लरिगे।