रोमी 6:19 - परमेश्‍वरए ताँ तमु क्युइर

¹⁹ क्हेमैंइ क्होल् आखाँ उ बिसि ङइ क्‍होल्‍ले बिरिइमुँ। ओंसों क्हेमैंइ खैले ह्रोंसए यो प्हलेलाइ पापर च्होवाबै आछ्याँबै केमैं लल् पिंल। छलेन तारे पापर आच्होरिगे बिसि ह्रोंसए यो प्हले परमेश्‍वरए के लबै ल्हागिर पिंवाँन्।

रोमी 6:19 ပူးပေါင်းရင်းမြစ်များ

मत्ती 4:23

येशू गालील ह्‍युल तिगोंन् स्‍युरदै चमैंए च्हों धिंजरेबै म्हिमैंने परमेश्‍वरए ताँमैं लोमिंदै स्‍वर्गर्बै ग्याल्सए बारेर सैं तोंबै ताँमैं बिप्रमल। धै ताँन् खालर्बै नब् छब्मैं नेरो मोंइ स्याबै म्‍हिमैं या सल् लमिंमल।

रोमी 15:1

ङ्यो बिश्‍वासर भोंसि तब्‍मैंइ बिश्‍वासर आभोंबै अलिमैंइ संका लबै ताँमैं सैदिल् त्‍हुम्। छलेन ङ्योइ ह्रोंस मत्‍त्रे सैं तोंबै केमैं लल् आत,

रोमी 3:5

ङ्योइ लबै आछ्याँबै केमैंउँइँलेन् परमेश्‍वरजी लबै छ्याँबै केमैं म्हिमैंइ म्रोंम् बिस्याँ ङ्योइ तो बिब् दि? “खीए ह्रिस ङ्योए फिर उँइँमा परमेश्‍वरजी लल् आतबै के लइ!” बिब् वा? आङिं! (दिलेया म्हिमैंइ छलेन मैंल् खाँम्।)

रोमी 6:13

छलेन ह्रोंसए ज्युर्बै भागमैंलाइ पाप केमैं लबर आल्हैदिद्। बरु सिबइले धबै सोगों तबै म्‍हि धोंले छ्याँबै के लबै ल्हागिर ह्रोंसलाइन परमेश्‍वरए योर पिंवाँन्।

रोमी 7:23

दिलेया ङ न्होंर्बै अर्को सैंइ ङए सैंइ खोबै ठिमए बिरोध लम्। च बिरोध लबै सैंइ ङलाइ आछ्याँबै इच्‍छाए न्होंर फैवाम्।

रोमी 8:26

छलेन ङ्योइ प्राथना खैले लल् त्हुम बिब ङ्योइ आसेबै त्हेर पबित्र प्ल्हजी ङ्योलाइ ल्होमिंम्। ङ्योइ सो खुइले बिलै आह्रबै ताँफुँमैं क्होसि पबित्र प्ल्ह खीजीन् ङ्योए ल्हागिर परमेश्‍वरने प्राथना लमिंम्।

१ कोरिन्थी 5:6

क्हेमैं थेब् प्‍हैंब ठिक आरे। च्युगुदे प्लेढाइ ल्हें क्हें फुल्दिवाम् बिब क्‍हेमैंइ आसेइमुँ वा?

१ कोरिन्थी 6:11

क्‍हेमैं न्‍होंरि ओंसों को-कोइ छाबै म्हिमैं मुँल, दिलेया तिंजोरो प्रभु येशू ख्रीष्‍टए मिंउँइँले नेरो ङ्योए परमेश्‍वरए प्ल्हउँइँले क्‍हेमैं पापउँइँले चोखो तइमुँ, क्‍हेमैं परमेश्‍वरए म्‍हिमैं तइमुँ, झाइले परमेश्‍वरए उँइँर क्‍हेमैं ठिक ठर्दिइमुँ।

१ कोरिन्थी 9:8

चु म्हिमैंइ बिबै ताँ मत्‍त्रे आङिं, परमेश्‍वरए छ्वेरै या छाबन् ताँ प्ह्रिइमुँ।

गलाती 3:15

ओ ङए अलि-अङाँमैं, नमुना घ्रि बिले: तिखे पक्‍का तयाल् खाँबै बाछा कबूल खाबज्यै या प्लिंल् आखाँ, अर्को ताँ या थप्दिल् आखाँ।

हिब्रू 12:15

परमेश्‍वरए दयाम्हाँया आयोंब खाबै आतरिगे बिसि न्ह क्रों मि क्रों तद्। आक्ह्रिबै लमा क्हेमैंए न्होंरि फ्रेब् प्ह्राब् आतरिगे। आस्याँ ल्हें म्हिमैं पापर च्होयाब्मुँ।

हिब्रू 4:15

ङ्योए ल्हागिर ख्रो पिंबै खेगि क्रथेजी ङ्योए दुःखर ल्होल् खाँम्। तलेबिस्याँ ङो चुसि ङ्योलाइ पापर च्होवाब् धोंले खीलाज्यै या पापर च्होवाबै ल्हागिर तोन्‍दोंरि सैर ङो चुल, दिलेया खैबै ङोज्यै या खीलाइ पापर च्होवाल् आखाँ।