रोमी 5:15 - परमेश्‍वरए ताँ तमु क्युइर

¹⁵ दिलेया चमैं ङ्हिंए के स्योन् मुँ: तलेबिस्याँ आदम बिबै म्‍हि घ्रिइ लबै पापउँइँले ल्हें म्‍हिमैं सिइ। दिलेया परमेश्‍वरए दयाम्हाँया नेरो येशू ख्रीष्‍ट बिबै म्‍हि घ्रिउँइँले ल्हें म्हिइ छलेन् आशिक योंइ।

रोमी 5:15 ပူးပေါင်းရင်းမြစ်များ

मत्ती 20:28

छलेन म्हिए च्ह या अरूमैंउँइँले सेवा योंबर युब आङिं, दिलेया सेवा लबर नेरो ल्‍हें म्‍हिमैंए पापउँइँले फ्रेमिंबर ह्रोंसए ज्यु पिंबर युब् ग।”

मत्ती 26:28

तलेबिस्याँ चु परमेश्‍वरजी फैबै छारा बाछार्बै ङए को ग। ल्‍हें म्‍हिमैंए पाप क्षमा तरिगे बिसि ङए को बगेब्मुँ।

यूहन्‍ना 3:16

तलेबिस्याँ खीए च्हए फिर बिश्‍वास लब्मैं खाबै या नास आतरिगे, बरु खोंयोंइ आनुबै छ्ह योंरिगे बिसि परमेश्‍वरजी ह्‍युलर्बै म्हिमैंने ल्‍हें म्हाँया लसि खीए घ्रि दे मुँबै च्‍ह पिंइ।

यूहन्‍ना 4:10

येशूजी चने बिइ, “परमेश्‍वरए आशिक नेरो क्हिने क्यु ह्रिबै म्हि क्हिइ ङो सेस्याँ क्हिइ ङने क्यु ह्रिमल, धै खीजी खोंयों बिलै सोल् लमिंबै क्यु क्हिलाइ पिंमल।”

चेला चिब्मैंए केमैं 15:11

दिलेया प्रभु येशूए फिर बिश्‍वास लबइले खीए दयाम्हाँयाउँइँले ङ्योइ खैले मुक्‍ति योंइमुँ, छलेन चमैंज्यै या मुक्‍ति योंइमुँ।”

रोमी 5:12

ताँन् भन्दा ओंसोंबै म्‍हि आदमइ परमेश्‍वरजी बिब् आङिंबइले ह्‍युलर पाप तखइ, च पापइ लमा म्हिमैं सिल् त्‍हुइ। ताँन् म्‍हिमैंइ पाप लबइले म्‍हिमैं ताँन् सिल् त्हुइ।

रोमी 6:23

तलेबिस्याँ पाप लब्मैंइ योंबै नों सिब ग! दिलेया परमेश्‍वरजी छलेन् पिंबै दान ङ्योए प्रभु येशू ख्रीष्‍टउँइँले खोंयोंइ आखाँबै छ्ह योंब् ग।

२ कोरिन्थी 5:14

येशू ख्रीष्‍टजी ङ्योने म्हाँया लबइले ङ्यो खीए अधीनर मुँ, तलेबिस्याँ ताँन् म्‍हिमैंए ल्हागिर ख्रीष्‍ट सिमिंबइले ङ्यो ताँन् खीने बालुन् सिब् धोंन् तइ बिबै ताँ ङ्योइ सेइमुँ।

२ कोरिन्थी 9:15

बयन लसे लल् आखाँबै बेल्‍ले थेबै बरदान परमेश्‍वरजी ङ्योलाइ पिंसेरो खीलाइ धन्‍यबाद पिंले।

एफिसी 2:8

छतसि परमेश्‍वरए दयाम्हाँयाइ लमन् क्‍हेमैंए बिश्‍वासउँइँले क्हेमैंइ मुक्‍ति योंइमुँ। क्हेमैंइ छ्याँबै केमैं लसि चु मुक्‍ति योंब आङिं, चुम् परमेश्‍वरजी छलेन् पिंब् ग।

हिब्रू 2:9

दिलेया ताँन् सै खीए न्होंर मुँ बिबै ताँ ङिइ सेइमुँ। दे त्हेए ल्हागिर खीलाइ स्वर्गदूतमैं भन्दा दे क्युरु लमिंइ, तलेबिस्याँ म्हिमैंए फिर्बै परमेश्‍वरए दयाम्हाँयाइ लमा म्हिमैंए पाप ख्रुमिंबै ल्हागिर खी दु:खले सिल् त्हुइ। दिलेया सिबइले खी धबै सोगों तसि खइ। छतसि परमेश्‍वरजी खीलाइ थेबै मानए मुकुट कुमिंइ।

१ यूहन्‍ना 2:2

ङ्योइ लबै पाप क्षमा लमिंबै ल्हागिर खीजी घ्‍याँ थोमिंइमुँ, ङ्योए पाप मत्‍त्रे आङिं, दिलेया ह्‍युलर्बै ताँन् म्‍हिमैंए पाप क्षमा लमिंम्।

१ यूहन्‍ना 5:11

परमेश्‍वरजी पिंबै ग्वाइ चुन् ग: खीजी ङ्योलाइ खोंयोंइ आखाँबै छ्ह पिंइमुँ, धै च छ्ह खीए च्‍हउँइँले ङ्योइ योंम्।