रोमी 4:11 - परमेश्‍वरए ताँ तमु क्युइर

¹¹ अब्राहामइ ज्युर चिनु लब् भन्दा ओंसोंन् परमेश्‍वरए फिर बिश्‍वास लबइले परमेश्‍वरजी चलाइ च त्हेर्न ठिक ठर्दिइ। च लिउँइँ परमेश्‍वरजी चलाइ ठिक ठर्दिबै चिनु तरिगे बिसि ज्युर चिनु लल् पिंइ। ज्युर चिनु लब् भन्दा ओंसोंन् अब्राहाम ठिक ठर्दिबइले ज्युर चिनु आललैया बिश्‍वास लब्‍मैंए खे अब्राहाम तइ, तलेबिस्याँ ज्युर चिनु आललैया म्‍हिमैंइ बिश्‍वास लसिन् परमेश्‍वरए उँइँर ठिक ठर्दिम्।

रोमी 4:11 ပူးပေါင်းရင်းမြစ်များ

उत्पत्ति 17:24

ज्युर चिनु लमा अब्राहाम कुच्युसे कुदिं तल।

भजनमैं 47:9

अब्राहामए परमेश्‍वरए म्हिमैंने बालु अरू ह्रेंमैंए क्रथे मिंथेमैं खागु तइमुँ। तलेबिस्याँ पृथ्बीर्बै म्रुँमैं परमेश्‍वरए योर्न मुँ; खी बेल्‍ले थेब मुँ!

प्रस्थान 12:13

क्हेमैं टिबै धिंजरे च को क्हेमैंए ल्हागिर चिनु तब्मुँ। ङइ च को म्रोंसि क्हेमैंलाइ तोइ आलल्‍ले पिवाब्मुँ, ङइ मिश्रीमैं नास लमा क्हेमैंए फिर तोइ दुःख तरिब् आरे।

प्रस्थान 31:13

“क्हिइ इस्राएलीमैंने चु या बिद्, प्रिबै त्हिंइ ङए भों न्हबै त्हिंइ ग। छतसि क्हेमैंइ खैले बिलेना प्रिबै त्हिंइर के आलद्। क्हेमैंलाइ पबित्र लमिंम् बिसि क्हेमैंइ सेरिगे बिसि, क्हेमैं नेरो ङए म्हाँजोर चु प्रिबै त्हिंइ खोंयोंन् बिलै चिनु घ्रि तब्मुँ।

प्रस्थान 31:17

इस्राएलीमैंए म्हाँजोर चु प्रिबै त्हिंइ खोंयोंन् बिलै तबै चिनु घ्रि तब्मुँ, तलेबिस्याँ याहवेहजी टुगैं न्होंर मु नेरो पृथ्‍बी बनेइ, धै ङिगैंर भों न्हइ।”

मत्ती 16:16

सिमोन पत्रुसइ बिइ, “क्‍हिम् खोंयोंन् बिलै तरिबै परमेश्‍वरए च्ह, खीजी कुल्मिंबै जोगेमिंबै म्रुँ ख्रीष्‍ट ग।”

मत्ती 8:11

ङ क्हेमैंने बिमुँ, स्यार (पूर्व) नेरो न्हुउँइँले (पश्‍चिम) ल्‍हें म्‍हिमैं खसि अब्राहाम, इसहाक नेरो याकूबने स्वर्गर्बै ग्याल्सर भोज चबर टिब्‍मुँ।

लूका 19:9

येशूजी चने बिइ, “तिंयाँ चु धिंर्बै म्हिमैंइ मुक्‍ति योंइमुँ, तलेबिस्याँ चु या अब्राहामए सन्तान ग।

यूहन्‍ना 3:33

दिलेया खीए ताँ क्वेंब्मैंइ परमेश्‍वर क्ह्रोंसेंन्बै मुँ बिसि प्रमाण पिंम्।

यूहन्‍ना 3:36

परमेश्‍वरए च्‍हए फिर बिश्‍वास लब्मैंने खोंयोंइ आनुबै छ्‍ह मुँ। परमेश्‍वरए च्हइ बिबै ताँ आङिंब्मैंइ खोंयोंइ आनुबै छ्‍ह योंल् आखाँ, दिलेया परमेश्‍वरए दण्ड खोंयोंइ बिलै चए फिर तरिम्।”

यूहन्‍ना 6:35

येशूजी चमैंने बिइ, “खोंयोंइ आखाँबै छ्ह पिंबै क्हें ङन् ग। ङ ङाँर खब्‍मैं खोंयोंइ फो ख्रेंरिब आरे, धै ङए फिर बिश्‍वास लब्‍मैं खोंयोंइ क्‍यु पिरिब आरे।

यूहन्‍ना 6:40

खीए च्ह ङाँइ ङ्‍ह्‍योसि खीए फिर बिश्‍‍वास लब्‍मैं ताँनइ खोंयोंइ आखाँबै छ्‍ह योंरिगे बिब ङए आबाए सैं मुँ। झाइले ह्‍युलर्बै आखिरि त्हिंइर ङइ चमैं सोगों लमिंब्मुँ।”

यूहन्‍ना 6:47

क्ह्रोंसेंन ङ क्हेमैंने बिमुँ, ङए फिर बिश्‍वास लब्मैंने खोंयोंइ आखाँबै छ्‍ह मुँ।

यूहन्‍ना 8:33

दिलेया चमैंइ खीने बिइ, “ङिम् अब्राहामए सन्तानमैं ग। तोगो समा ङि खाबै केब्छैं तसि टिल् आत्हुइमुँ। ‘क्हेमैं दुःखउँइँले फ्रेयाब्मुँ’ बिसि खैले बिल?”

रोमी 10:11

परमेश्‍वरए छ्वेर चु या बिइमुँ, “खीए फिर भर लब्मैं खाबै या फापिल् त्हुरिब् आरे।”

रोमी 10:4

तलेबिस्याँ खीए फिर बिश्‍वास लब्मैं ताँन् परमेश्‍वरए उँइँर ठिक ठर्दिरिगे बिसि ङ्योए ल्हागिर ख्रीष्‍टजीन् ठिमइ बिब् धोंबै के लमिंइ।

रोमी 10:6

दिलेया ख्रीष्‍टए फिर बिश्‍वास लसि मत्‍त्रे परमेश्‍वरए उँइँर ठिक ठर्दिम् बिबै बारेर ठिमइ छले बिइमुँ, “क्हेमैंए सैंर ‘ख्रीष्‍टलाइ क्युरु पुइबर स्‍वर्गर खाब् ह्‍यामुँ?’ आबिद्।

रोमी 3:22

छतमा येशू ख्रीष्‍टए फिर बिश्‍वास लब्मैं ताँनलाइ परमेश्‍वरजी ठिक ठर्दिम्। यहूदी नेरो अरू ह्रेंमैं खाबलाज्यै या खीजी आफेल।

रोमी 3:26

तलेबिस्याँ खीजी चमैं ङ्योने बालु खागु लइ, धै च ताँन् पापए सजैं येशूजी नोमिंइ। परमेश्‍वरजी ठिक निसाफ लमुँ धै येशूए फिर बिश्‍वास लब्मैं ताँनलाइ खीजी ठिक ठर्दिमिंम् बिसि उँइँमिंबै ल्हागिर्न खीजी छान् लइ।

रोमी 3:30

तलेबिस्याँ परमेश्‍वर घ्रि मत्‍त्रे मुँ। छतसि ज्युर चिनु लबै यहूदी मुँलेया, ज्युर चिनु आलबै अरू ह्रेंमैं मुँलेया, ताँन् म्‍हिमैंइ येशू ख्रीष्‍टए फिर बिश्‍वास लसिन् मत्‍त्रे परमेश्‍वरए उँइँर ठिक ठर्दिम्।

रोमी 4:10

परमेश्‍वरजी अब्राहाम खोंयों ठिक ठर्दिइ? चइ ज्युर चिनु लबै लिउँइँ उ ओंसोंन्? ज्युर चिनु लब् भन्दा ओंसोंन् च ठिक ठर्दिइ।

रोमी 9:30

छतसि ङ्योइ तो बिल् त्‍हुम्? ठिमइ बिब् धोंले आप्रलैया अरू ह्रेंर्बै म्‍हिमैंइ बिश्‍वास लबइले परमेश्‍वरजी चमैंलाइ खीए उँइँरि ठिक ठर्दिइ।

रोमी 9:33

येशू ख्रीष्‍टए बारेर परमेश्‍वरए छ्वेर छले प्ह्रिइमुँ, “ङ्‌ह्‍योद्, ङइ यहूदीमैंए म्‍हाँजोरि प्हले थुरबै युँमा थेंम्, च युँमार ल्हें म्‍हि थुरसि क्‍हुरयाब्‍मुँ, दिलेया खीए फिर बिश्‍वास लब्मैं खाबै या सैं च्योंब तल् त्हुरिब् आरे।”

रोमी 9:6

ल्हें यहूदीमैं ख्रीष्‍टए लिलि आप्र बिबर्न परमेश्‍वरजी चमैंए खेमैंने फैबै बाछामैं फाक्‍कर्न तइ बिब् वा? आङिं, तलेबिस्याँ इस्राएली ह्रेंर फिबै ताँन् म्‍हिमैं परमेश्‍वरजी त्‍हाँबै म्‍हिमैं ग बिल् आखाँ।

२ कोरिन्थी 1:22

खीजीन् ङ्योलाइ खीए म्‍हिमैं लबै ल्हागिर छाप झोंमिंसि बैनाए रुपर खीए पबित्र प्ल्ह ङ्योए सैंर पिंसि ङ्यो खीए म्हिमैं ग बिबै ताँ पक्‍का लमिंइ।

गलाती 3:22

दिलेया “ताँन् म्‍हिमैं पापए न्होंर मुँ” बिसि छ्वेइ बिइमुँ। छतसि परमेश्‍वरजी बाछा फैसि पिंम् बिबै खोंयोंइ आनुबै छ्ह येशू ख्रीष्‍टए फिर बिश्‍वास लबइले मत्‍त्रेन् योंइमुँ।

गलाती 3:29

छले क्‍हेमैं ख्रीष्‍टने घ्रिन् तबइले क्‍हेमैं अब्राहामए सन्‍तान ग। छतसि परमेश्‍वरजी अब्राहामने बाछा फैसि पिंम् बिबै आशिकए हकवालामैं क्‍हेमैंन् ग।

गलाती 3:7

छतसि खा-खाबमैंइ बिश्‍वास लमुँ, चमैंन् अब्राहामए सन्‍तान ग बिसि क्‍हेमैंइ क्होल् त्‍हुम्।

गलाती 5:5

दिलेया ङ्योइ बिस्याँ पबित्र प्ल्हउँइँलेन् ख्रीष्‍टए फिर्बै बिश्‍वासइ परमेश्‍वरए उँइँर ठिक ठर्दिबै ल्हागिर ङ्योइ खीए घ्याँन् ङ्ह्‍योरिम्।

गलाती 6:16

छतसि ङइ बिब् धोंले छ्ह थोब्मैंए फिर नेरो परमेश्‍वरए ताँन् म्‍हिमैंए फिर परमेश्‍वरए दयाम्हाँया नेरो शान्ति खोंयोंन् बिलै तरिगे।

एफिसी 1:13

छलेन क्‍हेमैं अरू ह्रेंमैंज्यै या परमेश्‍वरउँइँले योंबै मुक्‍तिए बारर्बै क्ह्रोंसेंन्बै सैं तोंबै ताँ थेसि येशू ख्रीष्‍टए फिर बिश्‍वास लइ। छतसि क्‍हेमैं या परमेश्‍वरए म्‍हिमैं तइ, धै क्‍हेमैंलाइ खीए म्हिमैं लबै ल्हागिर परमेश्‍वरजी ओंसोंन् बाछा फैबइले क्हेमैंए फिर पबित्र प्ल्हए छाप ल्हैदिइमुँ।

एफिसी 4:30

परमेश्‍वरए पबित्र प्ल्हलाइ सैं नल् आलद्। परमेश्‍वरजी आखिरि त्हिंइर स्‍वर्गर बोबै ल्हागिर खीजी क्हेमैंए फिर ह्रोंसए पबित्र प्ल्हजी छाप ल्हैदिइमुँ।

फिलिप्पी 3:9

छतसि तारे ङ खीने बालुन् तदा ङ्हाँइमुँ। ह्रोंसइ लबै धर्मउँइँले, नेरो मोशाइ प्ह्रिबै ठिममैं म्हाँदिबइले ङ धर्मि तब आङि, बरु येशू ख्रीष्‍टए फिर बिश्‍वास लबइले ङ परमेश्‍वरए उँइँर ठिक ठर्दिइमुँ। छले ङ परमेश्‍वरउँइँले ठिक ठर्दिब् ग।

हिब्रू 11:7

बिश्‍वासउँइँलेन् नोआज्यै च त्हे समा आम्रोंबै केमैंए बारेर परमेश्‍वरउँइँले था सेइ। धै खीजी बिबै ताँ क्वेंसि ह्रोंसए परवा जोगेबर नोआइ क्‍यु झाज घ्रि बनेइ। धै “ह्‍युलर्बै म्‍हिमैंइ परमेश्‍वरजी बिबै ताँ आक्वेंइमुँ,” बिसि नोआइ चमैंलाइ छ्याब् मुँबन् ठर्दिइ, दिलेया ह्रोंसए बिश्‍वासउँइँले च ठिक ठर्दिइ।

२ पत्रुस 1:1

येशू ख्रीष्‍टए के लबै कुल्मिंबै चेला चिब ङ सिमोन पत्रुसउँइँले क्हेमैंलाइ जय मसीह मुँ। ङ्योए परमेश्‍वर नेरो ङ्योलाइ जोगेमिंबै येशू ख्रीष्‍टजी खाबलाज्यै या आफेलल्‍ले ठिक के लइमुँ। खीजी ङिलाइ पिंब् धोंले क्हेमैंलाज्यै या ठिक बिश्‍वास लल् पिंइमुँ।

दर्शन 9:4

झाइले परमेश्‍वरजी तिरिमैंलाइ छ बिइ, “पृथ्‍बीर्बै छि प्याँ पिमैं नेरो सिं धुँमैं, नास आलद्, दिलेया खाब् म्‍हिए ङ्‌होर ङए छाप आरे, चमैंलाइ च्हिद्।