रोमी 2:8 - परमेश्‍वरए ताँ तमु क्युइर

⁸ दिलेया प्होंगि कैगि लब्मैं, क्ह्रोंसेंन्बै ताँ आङिंब्मैं नेरो आछ्याँबै के लब्मैंए फिर बिस्याँ परमेश्‍वर ह्रिस खसि सजैं पिंब्‍मुँ।

रोमी 2:8 ပူးပေါင်းရင်းမြစ်များ

भजनमैं 90:11

क्हिए ह्रिस कति ल्हें मुँ बिसि खाबइ क्होइमुँ? क्हिए थेबै ह्रिस क्हिलाइ लल् त्हुबै मान धों तब् ग।

हितोपदेश 11:23

ठिक के लबै म्हिइ थेंबै आशा तो मुँलेया छ्याँब तम्, दिलेया दुष्‍ट म्हिमैंइ आशा थेंबै सै आयोंमा ह्रिस खम्।

हितोपदेश 13:10

थेब् प्हैंस्याँ प्होंगि मत्‍त्रे तम्, दिलेया सल्‍ला किंस्याँ ह्रब्-सेब् तम्।

रोमी 1:18

म्‍हिमैंए पाप नेरो आछ्याँबै केमैं परमेश्‍वरजी स्‍वर्गउँइँले म्रोंम्। परमेश्‍वरए बारेर्बै क्ह्रोंसेंन्बै ताँ चमैंए पापइ सेल् आपिं। छतमा खीजी निसाफ लमा ह्रिस उँइँम्।

रोमी 10:16

दिलेया सैं तोंबै ताँ थेनाबिलेया ल्हें म्हिइ वास्‍था आल। छतसि “ओ प्रभु, ङिइ बिबै ताँ खाबै क्‍वेंइमुँ?” बिसि यशैया अगमबक्‍ताइ ओंसोंन् बिइमुँ।

रोमी 15:18

तलेबिस्याँ अरू सैए बारेर आङिं, दिलेया येशू ख्रीष्‍टजी ङए छ्हउँइँले लबै केए बारेर मत्‍त्रे प्‍हैंमुँ। ङए के नेरो प्रचारउँइँले,

रोमी 6:17

ओंसों क्‍हेमैं पापए केब्छैं मुँल, दिलेया तोगो क्‍हेमैंए सैं न्होंउँइँले परमेश्‍वरजी बिबै ताँ ङिंब्मैं तइमुँ। छतसि परमेश्‍वरलाइ धन्‍यबाद तरिगे।

रोमी 9:22

छलेन परमेश्‍वरलै या ह्रोंसए ह्रिस नेरो शक्‍ति उँइँबै सैं मुँ। दिलेया ह्रिसर कुमालेइ भाँड कोचेब् धोंले कोचेल् त्हुबै म्‍हिमैं मुँलेया खीजी चमैंए आछ्याँबै केमैं सैदिसि टिइमुँ।

१ कोरिन्थी 11:16

दिलेया चु ताँए बारेर को-कोइइ तोइ बिदा ङ्हाँम् बिस्‍याँ ङइ चमैंने बिमुँ, ङिए न्होंरि अरू तोइ रोसमैं आरे, परमेश्‍वरए बिश्‍वासीमैं न्‍होंरै या अरू तोइ रोसमैं आरे।

२ कोरिन्थी 12:20

क्‍हेमैंए बानि छ्याँब तरिगे बिब ङए सैं मुँ। दिलेया क्‍हेमैं ङाँर ङ खमा ङए सैंर मैंब् धों तब क्‍हेमैं आत उ, छलेन क्‍हेमैंए सैंर मैंब् धों तब ङै या आत उ बिसि ङ ङ्हिंइमुँ। तलेबिस्याँ क्‍हेमैं न्होंरि प्होंगि कैगि लब, ख्रे लब, ह्रिस लब, ह्रोंसए फायदा मत्‍त्रे म्‍हैब, अरूलाइ प्ह्रब, फ्रम् ताँ क्‍योंम् ताँ लब, थेब् प्हैंब, बिब् आङिंब तलै खाँम्।

गलाती 5:20

कु पूजा लब, मन्‍त्र-तन्‍त्र लब, आगुए न्होह्रों लब, प्होंगि कैगि लब, आगुए फिर ह्रिस लब, आगुल छ्याँब तरिगे आङ्हाँब, आक्ह्रिल् लब, आक्ह्रिसि टोलि-टोलि तब,

फिलिप्पी 1:17

दिलेया ङए फिर सैं आससि ह्रिस लब्मैंइ बिस्याँ, ङलाइ झेलर अझै ल्हें दुःख पिंरिगे बिब् मैंसि आछ्याँबै सैंइ येशूए सैं तोंबै ताँ बिप्रम्।

फिलिप्पी 2:3

ह्रोंसए फायदाए ल्हागिर मत्‍त्रे तोइ आलद्। तोन् तोर्न थेब प्हैंदै तोइ आलद्, बरु ह्रोंसन् च्‍योंने तसि घ्रिइ घ्रिलाइ ह्रोंस भन्दा थेब् मैंन्।

२ थेसलोनिकी 1:8

परमेश्‍वर ङो सेल् आङिंब्मैं नेरो ङ्योए प्रभु येशूउँइँले खबै सैं तोंबै ताँ आक्वेंब्‍मैं ताँनलाइ खीजी दण्ड पिंब्‍मुँ।

तीतस 3:9

दिलेया केर आफेबै ताँ लब्‍मैं, खेमैंए बारेर्बै ताँ लब, प्होंगि लब्मैं, झाइले मोशाइ प्ह्रिबै ठिमए (नियमए) बारेर प्होंगि लब्मैंने स्‍यो तद्। तलेबिस्याँ चु ताँन् ताँमैं फाकर्बै केर आफेब् मुँ।

हिब्रू 10:27

बरु ङ्हिंन् ङ्हाँबै दण्ड पैंसि टिल् त्हुम्, धै परमेश्‍वरए बिरोध लब्‍मैंलाइ नास लवाबै मिए राबा मत्‍त्रे तब्मुँ।

हिब्रू 11:8

बिश्‍वासउँइँलेन् अब्राहामइ परमेश्‍वरजी बिब ङिंइ, धै ह्‍याद् बिबै क्ल्ह्‍योउँइँ ह्‍याइ। लिउँइँ च क्ल्ह्‍योए क्ल्हे चलाइन तल् पिंबै सैं परमेश्‍वरल् मुँल। दिलेया ह्रोंस खनइ ह्‍यारिइमुँ बिब ह्रोंसलाइन था आरेल।

हिब्रू 5:9

खी ताँन् जाँचउँइँले पास तल् खाँसि खीए ताँ म्हाँदिब्‍मैं ताँनए ल्हागिर खी खोंयोंइ आखाँबै छ्हए मुल तइमुँ।

याकूब 3:14

दिलेया क्‍हेमैंए सैंर ह्रिस लब, खोंबै सैं मुँइबिस्‍याँ छाबै ताँर आप्हैंन्। छाबै ताँर थेब प्हैंस्याँ क्हेमैंइ क्ह्रोंसेंन्बै ताँ थोम्।

याकूब 3:16

तलेबिस्याँ म्हिमैंइ आगुए फिर ह्रिस लब, खोंसि ल्हें किंल् म्‍हैस्याँ चर सैं आक्ह्रिसि म्हिमैंइ दुष्‍ट केमैं लम्।

१ पत्रुस 3:1

ओ च्हमिरिमैं, ह्रोंसए प्‍युँए न्होंर टिद्। तलेबिस्याँ कोइ च्हमिरिए प्‍युँ परमेश्‍वरउँइँले खबै सैं तोंबै ताँ थेल् आङिंलेया क्हेमैंए छ्याँबै बानि ब्योर म्रोंसि चमैंए सैं एब्‍मुँ। क्हेमैंइ तोइ बिल् आत्‍हु,

१ पत्रुस 4:17

तलेबिस्याँ परमेश्‍वरजी निसाफ लबै त्हे तखइमुँ। निसाफ लमा ताँन् भन्दा ओंसों खीजी ह्रोंसए म्‍हिमैंउँइँलेन् तों लम्। छले खीजी ङ्योउँइँलेन् निसाफ तों लम् बिस्याँ, खीउँइँले खबै सैं तोंबै ताँ आक्वेंब्‍मैंलाइ झन खैबै निसाफ ललै?

दर्शन 14:10

चमैंइ परमेश्‍वरए बेल्‍ले थेबै ह्रिसए प्हा थुँल् त्‍हुब्‍मुँ। च त्हेर तिफुँइ ल्हयो आखल्‍ले परमेश्‍वरजी सजैं पिंब्‍मुँ। च म्‍हिमैंइ पबित्र स्‍वर्गदूतमैं नेरो क्‍यु च्हजए उँइँरि मि नेरो गन्‍धकरि बेल्‍ले दुःख योंब्‍मुँ।

दर्शन 16:19

च लिउँइँ च थेबै सहर सोंबाँ तयाइ। झाइले ताँन् ह्‍युलर्बै सहरमैं नास तयाइ। च त्हेर परमेश्‍वरजी बेबिलोन बिबै थेबै सहरलाइ मैंइ। छतसि खीए बेल्‍ले थेबै ह्रिसइ प्लिंबै प्‍हेल बेबिलोनलाइ थुँबर कर ल्‍हैदिइ।