दर्शन 21:22 - परमेश्‍वरए ताँ तमु क्युइर

²² ङइ च सहरर मन्‍दिर आम्रों, तलेबिस्याँ चर्बै मन्‍दिर ताँन् भन्दा थेबै शक्‍ति मुँबै याहवेह परमेश्‍वर नेरो क्‍यु च्हज ग।

दर्शन 21:22 ပူးပေါင်းရင်းမြစ်များ

मत्ती 24:2

खीजी चमैंने बिइ, “क्हेमैंइ चु ताँन् धिंमैं म्रोंइ, आङि वा? क्ह्रोंसेंन ङ क्हेमैंने बिमुँ, प्‍हँना लिउँइँ चु मन्दिरर्बै युँमा घ्रिए फिर अर्को युँमा तरिब् आरे। ताँन् फुवासि भ्योंवाब्मुँ।”

यूहन्‍ना 10:30

आबा नेरो ङ घ्रिन् ग।”

यूहन्‍ना 13:32

छले ङउँइँले परमेश्‍वरजी थेबै मान योंइबिस्याँ परमेश्‍वरजी ह्रोंसइन म्हिए च्ह थेबै मान पिंब्मुँ, खीजी चु के युनन् लब्मुँ।

यूहन्‍ना 4:21

येशूजी चने बिइ, “ओ नानि, ङए फिर बिश्‍वास लद्, च त्हे खसिन् मुँ, च त्हेर क्हेमैंइ परमेश्‍वरए मिं क्‍वेबर चु कोंरै ह्‍याल् आत्हु, यरूशलेमरै या ह्‍याल् त्हुरिब् आरे।

यूहन्‍ना 4:23

दिलेया त्हे खसिन् मुँ, च त्हे तोगोंन् ग, परमेश्‍वर आबालाइ क्‍ह्रोंसेंन्ले म्हाँदिब्मैंइ परमेश्‍वर खैबै मुँ बिसि छेनाले क्होसि पबित्र प्ल्हउँइँले म्हाँदिब्मुँ। परमेश्‍वर आबा म्हाँदिब्मैंइ ह्रोंसए खों न्होउँइँले म्हाँदिब्मुँ। छाबै म्हिमैंन् परमेश्‍वर आबाजी म्‍हैम्।

कलस्सी 1:19

तलेबिस्याँ खीने मुँबै ताँन् गुनमैं ख्रीष्‍टने मुँबइले परमेश्‍वर सैं तोंइ।

कलस्सी 2:9

छतसि छाबै स्‍योर ताँ आक्‍वेंन्, तलेबिस्याँ परमेश्‍वरने मुँबै ताँन् गुनमैं येशू ख्रीष्‍टने मुँ।

दर्शन 1:8

“ताँन् भन्दा ओंसोंबै नेरो ताँन् भन्दा लिउँइँबै ङन् ग। बिसि तोन्दोंरि लल् खाँबै परमेश्‍वरजी बिइमुँ, खी मुँल, मुँ, लिउँज्यै या युब्‍मुँ। ग!”

दर्शन 11:17

झाइले चमैंइ बिबर होंइ, “ओ ताँन् भन्दा थेबै शक्‍ति मुँबै याहवेह परमेश्‍वर, क्‍हि ओंसों ओंनोंन् मुँल, क्हि खोंयोंन् बिलै या तरिम्। क्‍हिइ ह्रोंसए थेबै हगइ ग्याल्स लबर होंइमुँ। छतसि ङि क्हिलाइ धन्‍यबाद पिंम्।

दर्शन 14:4

चुमैं च्हमिरिमैंने आन्‍होंल्‍ले टिब्‍मैं ग। क्‍यु च्हज खनि खनि ह्‍यामुँ, चुमैं या खीए लिलिन् ह्‍यामल। चुमैं परमेश्‍वर नेरो क्‍यु च्हजए ल्हागिर म्हिमैंए न्होंउँइँले खासि ओंसोंबै रोए फुइ धोंले त्हाँब्मैं ग।

दर्शन 15:3

चमैंइ परमेश्‍वरए के लबै स्‍योंम्‍बै मोशा नेरो क्‍यु च्हजए भजन प्रिंरिल: “ओ ताँन् भन्दा भोंबै याहवेह परमेश्‍वर, क्‍हिए केमैं बेल्‍ले थेब नेरो औदिबै मुँ! ओ ताँन् ह्रेंमैंए म्रुँ, क्‍हिजी लबै के ठिक नेरो क्ह्रोंसेंन्बै मुँ।

दर्शन 16:14

च स्यागि म्होंगि सों औदिबै चिनु मुँबै केमैं लसि उँइँबै प्ल्हमैं ग। चमैं पृथ्‍बीर्बै ताँन् म्रुँमैं ङाँर ह्‍याम्, धै ताँन् भन्दा थेबै परमेश्‍वरजी बिबै त्हिंइर ल्हडें लबर चमैंलाइ खागु लम्।

दर्शन 16:7

च लिउँइँ ख्रो पिंबै क्ल्ह्‍योइ छ बिब ङइ थेइ, “ओ ताँन् भन्दा थेबै शक्‍ति मुँबै याहवेह परमेश्‍वर, क्‍हिजी क्ह्रोंसेंन्बै ठिक निसाफ लमुँ।”

दर्शन 19:15

ताँन् ह्रेंमैंलाइ ल्हिबर खीए सुँउँइँले छ्यारबै सेलाँ त्‍होंल। खीजी पैए प्‍हरे छेसि ताँन् ह्रेंमैंए फिर ग्याल्स लमा ताँन् भन्दा थेबै शक्‍ति मुँबै परमेश्‍वरए ह्रिसइ प्लिंबै कोल खीजी प्लेवाब्‍मुँ।

दर्शन 4:8

च सो प्ह्‍याबै सैमैं प्लिल प्‍ह्‍या टु-टु मुँल, चमैंए ज्यु तिगोंन् नेरो प्‍ह्‍यागों न्होंरै या मि-मि मुँल। चमैंइ त्‍हिंयाँ म्‍हुँइँस “तोन्दोंरि लल् खाँबै याहवेह परमेश्‍वर पबित्र, पबित्र, पबित्र मुँ। खी ओंसों ओनोंन् मुँल, तिंयाँ या मुँ, लिउँज्‍यै या तरिब्‍मुँ।” बिसि भों आन्हल्‍ले भजन प्रिंबै प्रिंबन् लरिमल।

दर्शन 5:6

झाइले ङइ राजगद्दिए म्‍हाँजोरि, अथवा च सो प्ह्‍याबै सै प्लि नेरो ङ्हिस्युसे प्लि चिब्मैंए म्‍हाँजोरि, क्‍यु च्हज घ्रि रारिब् म्रोंइ। च क्‍यु च्हज सैवाल् खाँब् धों ब्‍योंब् मुँल। चल रुँ ङि नेरो मि ङि मुँल। चए मिमैं पृथ्‍बी तिगोंन् कुल्‍मिंबै परमेश्‍वरए प्ल्ह ङि मुँल।

दर्शन 7:15

छतसि परमेश्‍वरए राजगद्दिए उँइँर रासि चमैंइ परमेश्‍वरए मन्‍दिरर त्‍हिंयाँ, म्‍हुँइँस खीए सेवा लरिम्। राजगद्दिर क्हुँबै परमेश्‍वर चमैंए म्हाँजोर खोंयोंन् बिलै तरिम् धै खीजी चमैंए रक्षा लमिंम्।

दर्शन 7:17

तलेबिस्याँ राजगद्दिए म्‍हाँजोर मुँबै क्‍यु च्हजजीन् चमैंए प्‍ह्रोंछैं तसि रक्षा लब्मुँ, धै खोंयोंइ आखाँबै छ्ह योंबै क्‍युए मूलर खीजी चमैंलाइ डोरेसि बोमिंब्‍मुँ। धै परमेश्‍वरजी चमैंए मिर्बै मिग्लि फ्‍योमिंब्‍मुँ।”