भजनमैं 90:8 - परमेश्‍वरए ताँ तमु क्युइर

⁸ ङिइ लबै छेरन् ङ्हाँबै केमैं क्हिजी ङ्ह्‍योरिइमुँ, ङिए न्होंर्बै आम्रोंबै पापमैं क्हिजी म्रोंरिइमुँ।

भजनमैं 90:8 ပူးပေါင်းရင်းမြစ်များ

भजनमैं 10:11

चमैंइ सैं न्होंर मैंइमुँ, “परमेश्‍वरजी खीए मोंडा ङउँइँले लोइमुँ, धै ङलाज्यै या म्‍लेवाइमुँ, छतसि ङइ लबै के या आम्रों।”

भजनमैं 109:15

चमैंइ लबै पाप खोंयोंइन याहवेहए उँइँर तरिगे, धै खीजी चमैंए मिं पृथ्बीउँइँले मेटिवारिगे!

भजनमैं 19:12

ह्रोंसइ लबै गल्तिमैं खाबइ सेल् खाँम् रो? खाबज्यै सेल् आखाँ। छतसि ङइ था आसेल्‍ले लबै गल्तिमैं क्षमा लमिंन्।

भजनमैं 50:21

क्हिइ चु ताँन् आछ्याँबै केमैं लइमुँ दिलेया ङ तोइ आपोंन्ले टिइ; छतसि ङै या क्हि धोंन् तब्मुँ बिब क्हिए सैंर ङ्हाँमै। छ आङिं! ङइ क्हि हौदिब्मुँ धै क्हिइ खैबै केमैं लइमुँ बिब क्हिए ओंसोंन् ताँन् उँइँमिंब्मुँ।

भजनमैं 80:16

दिलेया शत्तुरमैंइ क्हिए अँगुरए धुँ थोवासि मिइ ख्रोंइमुँ! क्हिजी हौदिमा क्हिए म्हिमैं नास तयाम्!

हितोपदेश 5:21

तलेबिस्याँ म्हिमैं खैले प्रब-टिब लइमुँ बिब याहवेहजी सेम्, धै खीजी चमैंइ लबै केमैंए जाँच लम्।

रोमी 2:16

छतमा निसाफ लबै त्हिंइर परमेश्‍वरजी येशू ख्रीष्‍टउँइँले म्‍हिमैंए सैं न्‍होंर्बै ताँमैंए निसाफ लब्‍मुँ। ङइ बिबै सैं तोंबै ताँइ बिब् धोंलेन् चु ताँ तब्मुँ।

१ कोरिन्थी 4:5

छतसि ठिक त्हे आतन् समा खाबै फिरै या क्हेमैंइ छ्याब् आल्हैदिद्, ताँनए निसाफ प्रभुजीन् च त्हेर लम्। म्हिमैंइ आसेल्‍ले लबै आछ्याँबै केमैं या ताँनइ सेल् लमिंब्मुँ, छलेन म्‍हिमैंए सैं न्‍होंर्बै ताँमैं या उँइँमिंब्‍मुँ। धै म्हिमैंइ खैबै केमैं लइमुँ च अनुसार्बै इनाम परमेश्‍वरजी चमैंलाइ पिंब्‍मुँ।

१ यूहन्‍ना 3:20

तलेबिस्याँ परमेश्‍वर ङ्योए सैं भन्दा थेब मुँ, छतसि खीजी तोन्‍दोंरि ताँ था सेम्।

दर्शन 20:12

सियाब्‍मैं, थेब, च्‍योंब ताँन् राजगद्दिए उँइँर रारिब् ङइ म्रोंइ। परमेश्‍वरजी कितबमैं फैथेंल। सियाब्‍मैंइ सोगों मुँमा तो तो के लल, च केमैं ताँन् च कितबर प्‍ह्रिथेंल। धै चमैंइ लबै के ङ्‍ह्‍योसि परमेश्‍वरजी निसाफ लमल। (अर्को कितब घ्रि या खीजी फैइ। च कितबर खोंयोंइ आखाँबै छ्ह योंबै म्हिमैंए मिं प्‍ह्रिल।)