भजनमैं 68:18 - परमेश्‍वरए ताँ तमु क्युइर

¹⁸ क्हि नुबर क्रे ह्‍यामा क्हाइ बोब्मैंलाइ क्हिए लिलि बोइ, क्हिजी म्हिमैंउँइँले क्होल्सै किंइ, ओं, क्हिजी बिब् आङिंब्मैंउँइँले या किंइ। छलेन याहवेह पारमेश्‍वर चर टिम्।

भजनमैं 68:18 ပူးပေါင်းရင်းမြစ်များ

भजनमैं 110:1

“ङइ क्हिए शत्तुरमैं क्हिए प्हले न्होंर आप्लेन् समा क्हि ङए क्योलोउँइँ टिद्,” बिसि याहवेहजी ङए प्रभुने बिइमुँ।

भजनमैं 24:3

याहवेए कोंर खाब् क्रेल् खाँमुँ? धै खीए पबित्र क्‍ल्‍ह्‍योर खाब् राल् खाँमुँ?

भजनमैं 47:5

परमेश्‍वर कैंडो ह्‍यारिमा म्हिमैंइ बेल्‍ले सैं तोंदै खीए मिं क्वेइमुँ, छले याहवेह कैंडो ह्‍यामा चमैंइ थुतुरु या ह्राइ।

भजनमैं 7:7

ह्रें-ह्रेंमैं क्हिए कारग्यु तरिगे, धै नुबै क्ल्ह्‍योउँइँले चमैंए फिर ग्याल्स लद्।

भजनमैं 78:60

शिलोर मुँबै पबित्र तम्बुए न्होंर खी म्हिमैंए म्हाँजोर टिमल, दिलेया तोगो च तम्बु खीजी पिवाइ।

मत्ती 9:13

क्‍हेमैं ह्‍यासि चु ताँए अर्थ तो मुँगे खेसि क्होद्, ‘ङ ख्रो आम्है, ल्हयो खब्मैं म्रोंसि ङ सैं तोंम्।’ धर्मि प्हैंब्मैंलाइ हुइबर ङ युब् आङिं, पापिमैं हुइबर युब् ग।”

मर्कूस 16:9

येशू आइतबार न्‍हाँगर्न सिबउँइँले धबै सोगों तबै लिउँइँ मग्‍दालाथेंस्‍यो मरियम ङाँर म्रोंखइ। येशूजी ओंसों च च्हमिरिउँइँले मों ङि ल्‍हामिंल।

लूका 24:47

ह्रोंसइ लबै आछ्याँबै केमैं पिसि परमेश्‍वरउँइँ सैं एइस्याँ म्हिमैंइ पाप क्षमा योंम् बिबै ताँ ओंसों यरूशलेमर बिप्रबइले ताँन् ह्रें-ह्रेंर्बै म्हिमैंने बिमिंल् त्हुम्।

लूका 24:49

परमेश्‍वर आबाजी बाछा फैसि पिंम् बिबै बरदान ङइ क्हेमैंए फिर कुल्मिंब्मुँ। दिलेया परमेश्‍वरजी पिंबै शक्‍ति क्हेमैंए फिर आयुन् समा क्हेमैं चु सहरर्न टिरिद्।”

लूका 24:51

छले आशिक पिंरिबै तोंर्न खी चमैंउँइँले स्वर्गर बोवाइ।

यूहन्‍ना 14:23

येशूजी चने बिइ, “खाबइ ङलाइ म्हाँया लमुँ, चइ ङए ताँ ङिंमुँ, धै ङए आबाजी चलाइ म्‍हाँया लब्‍मुँ, झाइले आबा नेरो ङ च ङाँर युसि चने बालु टिब्‍मुँ।

यूहन्‍ना 16:7

छान् तलेया ङइ क्हेमैंने क्ह्रोंसेंन्बै ताँ बिमुँ, ङ छुइले ह्‍याबन् क्हेमैंए ल्हागिर छ्याँब् तम्। तलेबिस्याँ ङ आह्‍याइ बिस्याँ ल्होमिंबै पबित्र प्ल्ह क्हेमैं ङाँर युरिब् आरे। ङ ह्‍याइ बिस्याँ पबित्र प्ल्ह क्हेमैं ङाँर कुल्मिंब्मुँ।

चेला चिब्मैंए केमैं 2:23

दिलेया परमेश्‍वरजी ओंसोंन् चाँजो लसि येशूलाइ क्‍हेमैंए योर पिंवाँइ। धै दुष्‍ट म्हिमैंउँइँले क्हेमैंइ येशू क्रूसर च्योवासि सैवाइ।

चेला चिब्मैंए केमैं 2:4

छतमा चमैं ताँन् परमेश्‍वरए पबित्र प्ल्हजी प्लिंयाँइ, धै पबित्र प्ल्हजी पिंबै शक्‍तिउँइँले चमैंइ स्यो-स्योबै क्युइर पोंबर होंइ।

चेला चिब्मैंए केमैं 9:17

छबिमा हननिया ह्‍यासि शाऊल टिबै धिं न्होंर होंइ। धै चए फिर यो थेंसि बिइ, “ओ अलि शाऊल, क्हि खरिबै घ्याँर क्हि ङाँर म्रोंयुबै येशूजीन् क्हिए मि म्रोंरिगे धै पबित्र प्ल्हजी प्लिंरिगे बिसि ङ कुल्मिंब् ग।”

रोमी 5:8

दिलेया परमेश्‍वरजी खीए म्हाँया ङ्योए फिर कति ल्हें मुँ बिसि छले उँइँइँमुँ, ङ्यो पापि मुँमन् ङ्योए पाप त्होमिंबर येशू ख्रीष्‍ट सिमिंइ!

२ कोरिन्थी 6:16

ङ्यो परमेश्‍वर टिबै क्‍ल्‍ह्‍यो तबइले ङ्योइ कु म्हाँदिल् खाँम्मा? आखाँ! तलेबिस्याँ ङ्योए ज्यु क्ह्रोंसेंन खोंयोंइ तरिबै परमेश्‍वर टिबै क्‍ल्‍ह्‍यो ग। परमेश्‍वरजी ङ्योए बारेर छ बिइमुँ: “ङए म्‍हिमैंने ङ टिब्‍मुँ, झाइले चमैंने प्रब्मुँ। ङ चमैंए परमेश्‍वर तब्‍मुँ, झाइले चमैं ङए म्हिमैं तब्‍मुँ।”

कलस्सी 2:3

तलेबिस्याँ ताँन् ज्ञान बुद्धिमैं ख्रीष्‍टनेन् मुँ।

कलस्सी 2:9

छतसि छाबै स्‍योर ताँ आक्‍वेंन्, तलेबिस्याँ परमेश्‍वरने मुँबै ताँन् गुनमैं येशू ख्रीष्‍टने मुँ।

हिब्रू 1:3

परमेश्‍वरए ह्‍वे खीए च्हनेन् चारमुँ, परमेश्‍वर खैब मुँ खी या छाबन् मुँ। धै मु नेरो पृथ्‍बी खीए शक्‍ति मुँबै बचनइ धाँदिइमुँ। म्‍हिमैंए पाप त्होमिंबै के लल् खाँसि खी ताँन् भन्दा थेबै शक्‍ति मुँबै परमेश्‍वरए क्‍योलोउँइँ नुबै क्ल्ह्‍योर टिइमुँ।

हिब्रू 4:14

छतसि मु थोंसि ह्‍याबै परमेश्‍वरए च्ह येशू ङ्योए ल्हागिर ख्रो पिंबर युबै खेगि क्रथे तबइले ङ्योइ म्हाँदिरिबै बिश्‍वास जोगेसि थेंले।

हिब्रू 6:20

चर मल्‍किसेदेक ख्रो पिंबै खेगि क्रथे तब् धोंले ङ्योए ल्हागिर येशू खेगि क्रथे तसि स्वर्गर फेनेल् खाँइमुँ।

हिब्रू 8:1

ङिइ बिल् म्हैबै थेबै ताँ चुन् ग: ङ्योला छाबै ख्रो पिंबै खेगि क्रथे मुँ, खी स्‍वर्गर ताँन् भन्दा थेबै परमेश्‍वरए क्‍योलोउँइँ (कयोउँइँ) गद्दिर क्हुँइमुँ।

१ पत्रुस 3:22

येशू स्‍वर्गर ह्‍यासि स्वर्गदूतमैं, अधिकारमैं नेरो ताँन् शक्‍ति मुँबै सैमैं खीए न्होंर थेंसि परमेश्‍वरए क्‍योलोउँइँ टिइमुँ।

दर्शन 1:20

ङए क्‍योलो योर क्‍हिइ म्रोंबै मुसारा ङिउलो नेरो माराए पानस ङिउलोए अर्थ चु ग: मुसारा ङिउलोए अर्थ नाँस ङिउलोर्बै बिश्‍वासीमैंए फिर्बै चिब्मैं ग, झाइले चु पानस ङिउलोए अर्थ नाँस ङिउलोर्बै बिश्‍वासीमैं ग।

दर्शन 21:3

धै राजगद्दिउँइँले थेबै कैले छ बिब ङइ थेइ, “तारे परमेश्‍वर म्‍हिमैंने टिब्‍मुँ, झाइले चमैं खीए म्‍हिमैं तब्‍मुँ। परमेश्‍वर खीन् चमैंने तब्‍मुँ, धै खी चमैंए परमेश्‍वर तब्मुँ।