मर्कूस 8:34 - परमेश्‍वरए ताँ तमु क्युइर

³⁴ झाइले येशूजी खीए चेलामैं नेरो म्हिए हुल खी ङाँर हुइसि बिइ, “खाब् मुँलेया ङने बालु प्रबै सैं मुँ बिस्‍याँ चइ ज्युए म्हाँया आलरिगे बरु क्रूस नोसि ङने बालु प्ररिगे।

मर्कूस 8:34 ပူးပေါင်းရင်းမြစ်များ

मत्ती 10:38

खाबइ ह्रोंसए क्रूस नोसि ङए लिलि आल्‍हैदि च ङए म्‍हि तल् आखाँ।

मत्ती 16:24

झाइले येशूजी खीए चेलामैंने बिइ, “ङए लिलि खदा ङ्हाँम्मैं, ह्रोंसए ज्यु म्हाँया आलल्‍ले दुःख नोसि ङए लिलि खल् त्‍हुम्।

मत्ती 27:32

चमैंइ येशूलाइ बोसि घ्‍याँर ह्‍यारिमा सिमोन बिबै कुरेनीथेंने त्‍होइ, चमैंइ चने येशू च्‍योबै क्रूस कर ल्‍हैदिसि नोल् पिंइ।

मर्कूस 10:21

येशूजी म्हाँयाले च ङाँइ ङ्‌ह्‍योसि बिइ, “क्‍हिइ अझै के घ्रि लब चैमुँ: छतसि ह्‍यासि क्‍हिए क्‍ल्‍ह्‍यो न्‍हें ताँन् चुँसि योंबै मुइ ङ्हाँदुमैं पिंन्, छलस्याँ क्‍हिइ स्‍वर्गर सै न्होर ल्हें योंब्‍मुँ। धै खसि ङए लिलि प्रद्,” बिइ।

मर्कूस 7:14

झाइले येशूजी म्हिए हुल खी ङाँर हुइसि बिइ, “क्‍हेमैं ताँनइ ङए ताँ थेसि क्‍होद्।

लूका 13:24

येशूजी चमैंने बिइ, “रुबै म्राउँइँले न्‍होंर होंबै भों लद्, तलेबिस्याँ ङ क्‍हेमैंने बिमुँ, ल्‍हें म्‍हिमैं रुबै म्राउँइँले न्‍होंर होंल् म्‍हैब्‍मुँ, दिलेया होंल् खाँरिब् आरे।

लूका 14:33

छतसि क्हेमैंए न्होंरि खाबइ ह्रोंसने मुँबै तोन्दोंरि सै आवथें च ङए चेला तल् आखाँ।

लूका 18:22

चए ताँ थेसि येशूजी चने बिइ, “अझै क्‍हिइ लल् त्‍हुबै के घ्रि चैमुँ। क्‍हिने मुँबै सैमैं ताँन् चुँसि योंबै मुइ ङ्हाँदुमैं चुमिंन्, धै ङए लिलि प्रद्, छलस्याँ क्‍हिइ स्‍वर्गर सै न्होर योंब्‍मुँ।”

लूका 20:45

छले ताँन् म्हिमैंइ ताँ थेरिमा येशूजी ह्रोंसए चेलामैंने बिइ,

लूका 9:23

धै खीजी चमैं ताँन्‍ने बिइ, “खाबै ङए लिलि खबै सैं लस्याँ, चइ ह्रोंसए तोन्‍दोंरि इच्‍छामैं पिवाल् त्‍हुम्, कति दुःख तलेया सैदिसि त्हिंइ ह्रोंसे ङए लिलि प्रल् त्‍हुम्।

यूहन्‍ना 10:27

ङए क्युमैंइ ङए कै थेम्, ङइ चमैंलाइ ङो सेम्। छतसि चमैं ङए लिलि खम्।

यूहन्‍ना 19:17

येशूजी ह्रोंसए क्रूस ह्रोंसइन नोसि क्र खोप्‍लें बिबै क्ल्ह्‍योर ह्‍याइ। (हिब्रू क्युइर च क्ल्ह्‍योए मिं गलगथा बिमुँ।)

चेला चिब्मैंए केमैं 14:22

चमैंइ च क्ल्ह्‍योर्बै चेलामैंए सैं भोंब् लमिंदै “खोंयोंन् बिलै परमेश्‍वरए ताँर बिश्‍वास लसि टिरिद्,” बिसि अर्थि पिंइ, धै “परमेश्‍वरए ग्याल्सर होंबै ल्हागिर ङ्योइ ल्हें दुःख सैदिल् त्हुम्,” बिबै ताँ या लोमिंइ।

रोमी 6:6

ङ्योइ पाप आलरिगे धै ङ्यो पापए न्होंर आटिरिगे बिसि परमेश्‍वरजी ङ्योए ओंसोंबै छ्ह येशू ख्रीष्‍टने बालु क्रूसर च्योवाइमुँ बिब ङ्योइ सेइमुँ।

रोमी 8:17

ङ्यो परमेश्‍वरए च्‍ह-च्हमिमैं तसेरो परमेश्‍वरजी खीए च्‍ह-च्हमिमैंए ल्हागिर साँथेंबै अँश ङ्योइ योंब्‍मुँ, धै परमेश्‍वरजी ख्रीष्‍टए ल्हागिर साँथेंबै अँश या ङ्योइ खीने बालो योंब्‍मुँ। तलेबिस्याँ येशू ख्रीष्‍टजी दुःख नोब् धोंले ङ्योज्यै या छाबै दुःख नोस्‍याँ खीजी योंबै मान ङ्योज्यै या योंब्‍मुँ।

१ कोरिन्थी 15:31

ओ अलि-अङाँमैं, ङ्योए प्रभु येशूए फिर क्हेमैंइ बिश्‍वास लबइले ङए सैं भोंइमुँ। छतसि प्रभुए के लबर ङ त्हिंइ ह्रोंसे या सिल् खाँम्।

१ कोरिन्थी 8:13

छतसि बिश्‍वासर आभोंबै अलिलाइ ङइ चबै सैइ पापर च्होवाम् बिस्‍याँ, कुर चडेबै सै ङइ खोंयोंइ चरिब् आरे।

१ कोरिन्थी 9:19

ङ खाबै न्होंरै या आरे, दिलेया खाँन् समा ल्हें म्हिइ येशू ख्रीष्‍टए फिर बिश्‍वास लरिगे बिसि ङ ताँनए के लबै म्हि धोंन् तइमुँ।

गलाती 2:20

ङ ख्रीष्‍टने बालुन् क्रूसर च्‍योसि सिइमुँ। छतसि तारे पिरु सोब ङ आङिं, दिलेया ख्रीष्‍ट ङए सैं न्‍होंर तसि सोइमुँ। तोगो चु ज्युर ङ सोरिबै छ्ह परमेश्‍वरए च्‍ह येशू ख्रीष्‍टए फिर बिश्‍वास लसि सोरिबै छ्ह ग, तलेबिस्याँ खीजी ङलाइ म्हाँया लसि ङए ल्हागिर खीए ज्युन् सुम्‍पिदिइ।

गलाती 5:24

येशू ख्रीष्‍टए म्हिमैंइ खेंमैंए सैंउँइँले खबै आछ्याँबै इच्छामैं नेरो आछ्याँबै केमैं येशूने प्रेन् क्रूसर च्योवासि नास लवाइमु।

गलाती 6:14

दिलेया ङ्योए प्रभु येशू ख्रीष्‍टए क्रूसए बारेर बाहेक तोइ सैरै या प्हैंबै ताँ ङ ङाँइँले ह्रेंगोन् तरिगे। खी ङ्योए ल्हागिर क्रूसर सिमिंबइले ह्‍युलर्बै सैमैं ङए ल्हागिर तोइ आङिं, ह्‍युलए ल्हागिर ङ क्रूसर च्योवासि सिब् धोंन् तइ।

फिलिप्पी 3:10

खी सिसि धबै खैले सोइ खगे बिसि खीए शक्‍ति ङइ क्होल् खाँरिगे, धै खी सिब् धोंलेन् ङइ या सिलन् त्हुलै सिसि खीजी नोब् धों तबै दु:ख नोल् खाँरिगे।

फिलिप्पी 3:7

दिलेया च सैंमैं ङए ल्हागिर ओंसों छ्याँब तना बिलेया ङइ ख्रीष्‍टए उँइँर च सैमैं तो धोंइ आङ्हाँइमुँ।

कलस्सी 1:24

क्हेमैंए ल्हागिर दुःखन् योंरिलेया ङ सैं तोंइमुँ, तलेबिस्याँ ख्रीष्‍टए ज्युए ल्हागिर, खी क्वेंब्मैंए ल्हागिर ङज्यै या नोल् त्हुबै दुःख ङ‍ए ज्युर्न नोसि पूरा लम्।

कलस्सी 3:5

छतसि क्‍हेमैं ह्‍युलर्बै सैजरे सैं आह्‍याद्: फ्रें क्ल्योंब नेरो रण्डिबाजी लसि फोहोरी के आलद्, छाडा आतद्, दुष्‍ट सैं आप्ह्‍याब नेरो लोब आलद्। लोब लबम् कु पूजा लब् धों तब् ग।

२ थेसलोनिकी 3:11

क्हेमैंए न्होंरि को-कोइ प्ल्हेउ तसि छ्ह थोरिइमुँ, धै चमैं ह्रोंसइ के आल दिलेया अरूए केर तोनतोर्न यो झोंम् बिब ङिइ थेइमुँ।

तीतस 2:12

खीए दयाम्हाँयाउँइँले खीजी ङ्योलाइ पाप केमैं नेरो चु ह्‍युलर्बै सैमैं पिवासि, आछ्याँबै केमैंउँइँले सैं फैसि, भक्‍ति लसि छ्याँबै छ्ह थोब लोमिंम्।

हिब्रू 13:13

छतसि ङ्यो या सहरउँइँले बैरु खी ङाँर ह्‍याले, धै खीजी सैदिब् धों तबै दुःख ङ्योज्यै सैदिले।

१ पत्रुस 4:1

येशू ख्रीष्‍टजी खैले दुःख नोल, छलेन क्‍हेमैंज्‍यै या दुःख नोल् त्हुलेया नोम् बिबै सैं लद्। तलेबिस्याँ ज्युर दुःख नोबै म्हिमैंइ पाप लब पिवाम्।

१ पत्रुस 4:13

बरु ख्रीष्‍ट बेल्‍ले थेबै मानर युमा क्हेमैं या सैं तोंल् योंरिगे बिसि खीजी सैदिब् धों तबै दुःख क्‍हेमैंज्यै या योंमा सैं तोंन्।

२ पत्रुस 1:14

तलेबिस्याँ ङ सिबै त्हे चेंदो तखइमुँ बिसि ङ्योए प्रभु येशू ख्रीष्‍टजी ङलाइ उँइँमिंइमुँ।

१ यूहन्‍ना 3:16

म्हाँया तो जा बिब ङ्योइ खैले सेइमुँ बिस्‍याँ ख्रीष्‍टजी ङ्योए फिर म्हाँया लसि ङ्योए ल्हागिर खीए सो पिंइ। छतसि ङ्योज्‍यै या ह्रोंसए बिश्‍वासी अलि-अङाँमैंए ल्हागिर ह्रोंसए सो पिंल् त्हुम्।

दर्शन 2:10

क्हेमैंए फिर खबि छेबै दुःखने आङ्हिंन्। थेद्, क्‍हेमैंलाइ पापर च्होवाबै ल्हागिर दुष्‍टइ को-कोइलाइ झेलर झोंब्‍मुँ। क्‍हेमैंलाइ च्‍युगैं मत्‍त्रे दुःख तब्‍मुँ। दिलेया क्‍हेमैं आसिन् समा ङए फिर बिश्‍वास लरिद्, छलस्याँ ङइ क्‍हेमैंलाइ इनामर खोंयोंइ आखाँबै छ्ह पिंब्मुँ।