मर्कूस 2:17 - परमेश्‍वरए ताँ तमु क्युइर

¹⁷ चु ताँ थेसि येशूजी चमैंने बिइ, “आनबै म्‍हिमैंए ल्हागिर मैं लबै म्‍हि आचैदि, बरु नबै म्‍हिमैंए ल्हागिर मत्‍त्रे चैदिम्। ठिक के लब् प्हैंब्मैंए ल्हागिर ङ युब आङिं, दिलेया आछ्याँबै के लब्मैं हुइबै ल्हागिर ङ युब् ग।”

मर्कूस 2:17 ပူးပေါင်းရင်းမြစ်များ

मत्ती 18:10

“छतसि ङ क्हेमैंने बिमुँ, छेनाले मैंन्! क्हेमैंइ छाबै कोलोमैं धों तब्‍मैं खाबलाज्यै या हेल आलद्। तलेबिस्याँ चमैं जोगेमिंबर स्‍वर्गदूतमैं स्‍वर्गरि खोंयोंन् बिलै ङए आबाए उँइँर्न तम्।

लूका 15:10

ङ कहेमैंने बिमुँ, च धोंलेन् दुष्‍ट के पिसि खी ङाँइ सैं एसि छ्याँबै घ्‍याँर प्रबै म्‍हि घ्रि म्रोंसि परमेश्‍वरए स्‍वर्गदूतमैं बेल्‍ले सैं तोंम्।”

लूका 15:29

दिलेया चइ आबाने बिइ, ‘च्‍हौ ल्‍हें बर्ष समा ङइ क्‍हिए केब्छैंइ धोंले के लइ। क्‍हिइ ल्‍हैदिबै के तो मुँलेना ङइ आल! आबिमल। दिलेया ङइ तो योंइ? सैं तोंल्‍ले थुमैंने स्‍योगैं चरिगे बिसि क्हिइ र-झज घ्रि या ङ आपिं।

लूका 15:7

“ङ क्हेमैंने बिमुँ, ‘ङइ पाप के लइमुँ ङलाइ क्षमा पिंन्,’ बिल् आत्हुबै कुच्युसे कु धर्मि म्‍हिमैं भन्दा ‘ङ पापि मुँ, ङइ पाप केमैं लइमुँ, ङलाइ क्षमा पिंन्,’ बिसि सैं एबै म्‍हि घ्रि म्रोंसि परमेश्‍वर स्‍वर्गर बेल्‍ले सैं तोंम्।”

लूका 16:15

धबै येशूजी चमैंने बिइ, “क्‍हेमैं म्‍हिमैंए उँइँरि ‘ङ छ्याँब धर्मि म्‍हि ग’ बिसि थेब प्‍हैंम्। दिलेया क्हेमैंए सैं न्होंर तो मुँ बिसि परमेश्‍वरजी सेम्। म्‍हिमैंए सैंर थेब ङ्हाँबै सै परमेश्‍वरए उँइँर तोइ आङिंबै सै ग।

लूका 19:10

तलेबिस्याँ म्हिए च्ह छलेन् घ्याँ आसेसि म्हप्ररिब्मैंलाइ म्हैबर नेरो जोगेमिंबर युब् ग।”

यूहन्‍ना 9:34

छबिमा “क्‍हिम् पापर्न फिल! छाबै म्हिज्यै ङि लोमिंल् म्हैम्मा?” बिसि चमैंइ चलाइ च्हों धिंउँइँले बैरु तेवाइ।

यूहन्‍ना 9:40

चु ताँ थेसि येशूए ङाँर मुँबै फरिसीमैंए न्होंर्बै को-कोइ खीने “ङि या कनमैं रो वा?” बिसि ङ्योएमा।

चेला चिब्मैंए केमैं 20:21

यहूदीमैं नेरो ग्रिकमैंने पाप केमैं पिसि परमेश्‍वरउँइँ सैं एद् धै ङ्योए प्रभु येशूए फिर बिश्‍वास लद् बिसि ङइ ग्वाइ पिंइँमुँ।

चेला चिब्मैंए केमैं 26:20

ङ ओंसों डमस्‍कस नेरो यरूशलेम सहरजरे, यहूदीमैंए ताँन् ह्‍युलरि, झाइले अरू ह्रेंमैंए ह्‍युलरै या ह्‍यासि पाप केमैं पिसि परमेश्‍वरउँइँ सैं एद् धै ह्रोंसइ सैं एइ बिब उँइँबर छ्याँबै केमैं लल् त्‍हुम् बिसि लोमिंइ।

तीतस 2:14

येशू ख्रीष्‍टजी ङ्योइ लबै ताँन् पापउँइँले जोगेमिंबर सै फोसि खामिंइ। छ्याँबै के लबै ह्रोंसए चोखो म्हिमैं तरिगे बिसि ह्रोंसन् ङ्योए ल्हागिरि सिमिंइ।