मत्ती 8:4 - परमेश्‍वरए ताँ तमु क्युइर

⁴ झाइले येशूजी चने, “चु ताँ खाबलाज्यै या आबिद्। ह्‍यासि ख्रो पिंबै खेगिने क्हिए ज्यु उँइँन्, ‘क्हि सयना’ बिब म्हिमैंइ सेरिगे बिसि मोशाइ बिब् धोंले भेटि पिंन्।”

मत्ती 8:4 ပူးပေါင်းရင်းမြစ်များ

मत्ती 10:18

क्‍हेमैं ङए चेलामैं तबइले म्हिमैंइ क्‍हेमैं क्हासि क्रथेमैं नेरो म्रुँमैंए उँइँर राल् पिंब्‍मुँ। च त्हेर क्‍हेमैंइन चमैं नेरो अरू ह्रेंमैंने ङए ताँमैं बिमिंल् त्‍हुब्‍मुँ।

मत्ती 16:20

झाइले खीजी चेलामैंने “ङ ख्रीष्‍ट ग बिसि खाबलाज्यै या आबिद् ओ,” बिसि ल्हैदिइ।

मत्ती 17:9

झाइले खेंमैं कोंउँइँले क्‍युरु युरिमा येशूजी चमैंने बिइ, “म्हिए च्ह सिबउँइँले धबै सोगों आतन् समा क्हेमैंइ म्रोंबै चु ताँ खाबलाज्यै या आबिद्।”

मत्ती 3:15

दिलेया येशूजी यूहन्‍नाने बिइ, “तोगो छान् तरिगे। छले ङ्योइ परमेश्‍वरजी बिब् धोंले लब् छ्याँब मुँ।” छबिमा यूहन्‍नाइ येशूलाइ बप्‍तिस्‍मा पिंइ।

मत्ती 5:17

“ङ मोशाइ प्‍ह्रिबै ठिमर्बै ताँमैं नेरो अगमबक्‍तामैंए ताँमैं थोबर युब बिसि क्हेमैंइ आमैंन्। च ताँमैं पूरा लबर ङ युब् ग।

मत्ती 6:1

“छेनाले मैंन्, क्हेमैंइ धर्मए केमैं लमा म्‍हिमैंइ म्रोंरिगे बिसि चमैंए उँइँर आलद्। छ लस्याँ स्वर्गर मुँबै क्‍हेमैंए परमेश्‍वर आबाउँइँले क्हेमैंइ तोइ इनाम योंरिब् आरे।

मत्ती 9:30

च्‍हौ बिमा चमैंए मि म्रोंयाइ। धै येशूजी चमैंने “चु ताँ खाबज्यै आसेरिगे,” बिइ।

मर्कूस 13:9

“क्‍हेमैं ह्रोंसए ल्हागिरि न्ह क्रों मिक्रोंले टिद्। तलेबिस्याँ म्‍हिमैंइ क्‍हेमैं क्‍हासि म्हि च्होंए उँइँर बोब्‍मुँ, झाइले च्हों धिंजरे क्‍हेमैं धोंब्‍मुँ। ङए फिर बिश्‍वास लबइले क्हेंमैंइ ङए बारेर ग्वाइ पिंबर क्रथेमैं नेरो म्रुँमैंए उँइँर राल् त्हुब्मुँ।

मर्कूस 3:12

दिलेया येशूजी च मोंमैंने हौदिसि “ङ खाब् जा बिसि क्हेमैंइ खाबलाज्यै आबिद्,” बिइ।

मर्कूस 5:43

येशूजी चमैंने “चु ताँ खैलसेया खाब्ने या आबिद्,” बिइ। झाइले “चु कोलो चबै सैमैं पिंन्,” बिसि चर्बै म्हिमैंने ल्हैदिइ।

मर्कूस 6:11

को-कोइ क्‍ल्‍ह्‍योर फेनेमा म्हिमैंइ क्‍हेमैंए मान आलस्‍याँ, क्‍हेमैंइ बिबै ताँ आथेस्‍याँ, च क्‍ल्‍ह्‍योउँइँले त्‍होंमा चमैंए बिरोधर ग्वाइ पिंबै ल्हागिर क्‍हेमैंए प्‍हलेर्बै त्‍हुल खारथेंन्।”

मर्कूस 7:36

झाइले येशूजी च म्‍हिमैंने, “चु ताँ खाब्ने या आबिद्!” बिइ। खीजी खाब्ने या आबिद् बिलेया, चमैं झन् सैं तोंदै ल्‍हें बिप्रमल।

मर्कूस 8:30

झाइले येशूजी चमैंने “चु ताँ खाबलाज्यै या आबिद्,” बिइ।

मर्कूस 9:9

झाइले खेंमैं कोंउँइँले क्‍युरु युरिमा येशूजी चमैंने “म्हिए च्ह सिसि धबै सोगों आतन् समा क्हेमैंइ कोंर म्रोंबै ताँमैं खाब्ने या आबिद् ओ,” बिइ।

लूका 17:14

चमैंलाइ म्रोंसि येशूजी बिइ, “ह्‍याने! ख्रो पिंबै खेगि ङाँर ह्‍यासि ह्रोंसलाइ उँइँन्।” येशूजी बिब् धोंले चमैं खेगि ङाँर ह्‍यारिमा घ्‍याँर्न चमैंए कोर सयाइ।

लूका 21:13

दिलेया चमैंने सैं तोंबै ताँ बिबै मौका च त्हेर क्हेमैंइ योंब्‍मुँ।

लूका 4:41

ल्हें म्हिउँइँले मोंमैं थेबै कैले “क्‍हि परमेश्‍वरए च्‍ह ग,” बिदै त्होंयाइ। दिलेया खीजी हौदिसि चमैं पोंल् आपिं। तलेबिस्याँ “येशू परमेश्‍वरजी कुल्‍मिंबै म्रुँ ख्रीष्‍ट ग!” बिसि च मोंमैंइ सेमल।

लूका 5:14

छतमा येशूजी चने “थेद्, चु ताँ खाबलाज्यै खैलसे आबिद्। बरु क्हिए कोर सयाब सेरिगे बिसि सरासर ख्रो पिंबै खेगि ङाँर ह्‍यासि क्‍हिए ज्यु उँइँन् धै स्‍योंम्‍बै मोशाइ प्ह्रिबै ठिमर बिब् धोंले ‘क्हि शुद्ध तयान’ बिसि म्हिमैंलाइ उँइँबै ल्हागिर ख्रो पिंन्,” बिसि ल्हैदिइ।

लूका 8:56

छाब् म्रोंसि कोलोए आबा-आमा प्लेटोयाइ। दिलेया “चुर तबै ताँ खाबलाज्यै या आबिद् ओ बिसि येशूजी चमैंने,” बिइ।

लूका 9:21

झाइले येशूजी “क्हेमैंइ चु ताँ खैलसे खाबलाज्यै या आबिद् ओ,” बिइ।

यूहन्‍ना 5:41

“म्हिमैंइ ‘ङ थेब लरिगे’ बिसि ङ आमैं।

यूहन्‍ना 7:18

ह्रोंसन् ह्रब् सेब् प्हैंसि पोंब्मैंइ ह्रोंसए मान म्हैम्, दिलेया खाबइ खी कुल्मिंबै परमेश्‍‍वरए मान म्हैमुँ, चन् क्ह्रोंसेंन्बै सैं प्ह्‍याबै म्हि ग। चइ तो ताँरै या स्योर आतेनाले क्ह्रोंसेंन्बै ताँ पोंम्।

यूहन्‍ना 8:50

दिलेया ङ ह्रोंसए मान आम्है, ङए मान लरिगे ङ्हाँब घ्रि मुँ खीजी ङए निसाफ लमुँ।