मत्ती 23:5 - परमेश्‍वरए ताँ तमु क्युइर

⁵ दिलेया चमैंइ ह्रोंसइ लबै केमैं म्हिमैंइ म्रोंरिगे बिसि उँइँम्। ङि धर्मि ग बिसि उँइँबै ल्हागिर चमैंइ ठिमर्बै ताँमैं थेंबै बट्टामैं थे-थेब लसि ङ्‍हो नेरो यो पाख्रार खिम्, छलेन ह्रोंसइ खिबै क्‍वेंर ह्रिंग्यो ह्रिंग्यो झुम्कामैं च्योसि खिम्।

मत्ती 23:5 ပူးပေါင်းရင်းမြစ်များ

प्रस्थान 13:9

याहवेहजी ह्रोंसए शक्‍तिए योजी मिश्रउँइँले क्हेमैं तेइ पखब् ग। छतसि याहवेहजी पिंबै ठिमर्बै ताँमैं क्हेमैंए सुँर तरिगे बिसि क्हेमैंए ल्हागिर योर नेरो ङ्‍होए ओंसों क्हेमैंलाइ मैंल् लमिंबै चिनु तब्मुँ।

हितोपदेश 3:3

क्हिइ खोंयोंइ बिलै ताँनलाइ म्हाँया लरिद्, धै भर लल् खाँब तरिद्; च ताँमैं क्हिइ ह्रोंसए खरिर माला धोंले खिरिद्, धै क्हिए खों न्होंर प्ह्रिथेंन्।

मत्ती 9:20

छले ह्‍यारिमा च त्हेर्न च्युसे ङ्हिदि समा को त्हसि नबै च्हमिरि घ्रिइ येशूए लिउँइँले खसि खीए क्‍वेंए ङोर छुइ।

लूका 16:15

धबै येशूजी चमैंने बिइ, “क्‍हेमैं म्‍हिमैंए उँइँरि ‘ङ छ्याँब धर्मि म्‍हि ग’ बिसि थेब प्‍हैंम्। दिलेया क्हेमैंए सैं न्होंर तो मुँ बिसि परमेश्‍वरजी सेम्। म्‍हिमैंए सैंर थेब ङ्हाँबै सै परमेश्‍वरए उँइँर तोइ आङिंबै सै ग।

लूका 20:47

चमैंइ म्हरेस्‍योमैंए धिं नाँ लुडिमुँ। दिलेया म्‍हिमैंए उँइँरि बिस्याँ बेल्‍ले प्राथना लब् प्हैंम्। छाब्‍मैंइ झन् थेबै सजैं योंब्‍मुँ।”

यूहन्‍ना 12:43

तलेबिस्याँ चमैंइ परमेश्‍वरउँइँले योंबै मान भन्दा म्हिमैंउँइँले योंबै मान खोमल।

यूहन्‍ना 5:44

क्‍हेमैं न्होंरि घ्रि-घ्रिइ ह्रोंसलाइन थेब लरिगे ङ्हाँमुँ, दिलेया घ्रि मत्‍त्रे मुँबै परमेश्‍वरउँइँले योंबै मान आम्‍है। छ तसेरो क्‍हेमैंइ ङए फिर खैले बिश्‍वास लल् खाँमुँ?

यूहन्‍ना 7:18

ह्रोंसन् ह्रब् सेब् प्हैंसि पोंब्मैंइ ह्रोंसए मान म्हैम्, दिलेया खाबइ खी कुल्मिंबै परमेश्‍‍वरए मान म्हैमुँ, चन् क्ह्रोंसेंन्बै सैं प्ह्‍याबै म्हि ग। चइ तो ताँरै या स्योर आतेनाले क्ह्रोंसेंन्बै ताँ पोंम्।

फिलिप्पी 1:15

दिलेया को-कोइ ङए फिर सैं आससि ह्रिस लसि येशूए सैं तोंबै ताँ बिप्रम्। को-कोइइ बिस्याँ छ्याँबै सैं मैंसिन् येशूए सैं तोंबै ताँ बिप्रम्।

फिलिप्पी 2:3

ह्रोंसए फायदाए ल्हागिर मत्‍त्रे तोइ आलद्। तोन् तोर्न थेब प्हैंदै तोइ आलद्, बरु ह्रोंसन् च्‍योंने तसि घ्रिइ घ्रिलाइ ह्रोंस भन्दा थेब् मैंन्।

२ थेसलोनिकी 2:4

म्हिमैंइ म्हाँदिरिबै ताँन् सैमैं भन्दा खी थेब् ग बिसि म्हिमैंइ म्हाँदिरिबै सैमैंए बिरोध चइ लम्। धै ङन् परमेश्‍वर ग बिसि च परमेश्‍वरए मन्‍दिरर क्हुँम्।