मत्ती 14:6 - परमेश्‍वरए ताँ तमु क्युइर

⁶ दिलेया हेरोद फिबै त्हिंइ म्हाँदिमा हेरोदियासए च्हमि प्‍ह्रेंमैंए उँइँर म्रुँ सैं तोंन् लबर बेल्‍ले छेन्‍ले सेइ।

मत्ती 14:6 ပူးပေါင်းရင်းမြစ်များ

उत्पत्ति 40:20

सोंरो लिउँइँ फारो फिबै त्हिंइ मुँल। छतमा फारो म्रुँइ च त्हिंर ह्रोंसए ताँन् चिबनाँब्मैं चब्-थुँब् लबर हुइल। धै चए थुँबै सैमैं पिंब नेरो चबै सैमैं ह्‍योबै चिब्मैं या झेलउँइँले तेपखसि चमैं ङाँर राल् पिंइ।

एस्तर 2:18

च लिउँइँ म्रुँइ ह्रोंसए ग्याल्सर्बै ताँन् ह्‍युलर छुट्टि लसि ह्रोंसए ग्याल्सर्बै चिबनाँब्मैं नेरो ह्रोंसए सेवा लब्मैं हुइसि एस्तरए मिंर थेबै भत्तेर पिंइ। धै ताँनलाइ सै ल्हें फेबै सैमैं पिंइ।

मत्ती 14:3

ह्रोंसए अलि फिलिपए प्ह्रेंस्योए घ्याँउँइँले हेरोदइ ओंसों यूहन्‍ना क्हासि झेलर च्युवाल।

मत्ती 14:7

छाब् म्रोंसि हेरोद बेल्‍ले सैं तोंसि “क्‍हिइ तो ह्रिदा ङ्हाँइमुँ ह्रिद्, तो ह्रिलेया ङइ पिंस्‍यो,” बिसि च छमिंने बाछा फैसि कसम चइ।

मत्ती 22:24

“ओ गुरु, खाब् मुँले म्‍हि प्हसे आफिन्‍ले सियास्‍याँ चए अलिइ चों बोसि आघेंए ल्हागिरि सन्‍तान योंमिंरिगे बिसि मोशाइ बिल।

मर्कूस 6:14

येशूजी लबै केए बारेर्बै ताँमैं खन्तोदोंन् थेनेल। छतसि हेरोद म्रुँज्यै या खीए बारेर्बै ताँ थेइ। को-कोइइ “बप्‍तिस्‍मा पिंबै यूहन्‍ना सिबउँइँले सोसि खना! छतैग चइ औदिबै केमैं लल् खाँना बिमल।”

मर्कूस 6:17

तलेबिस्याँ च भन्दा ओंसों हेरोद म्रुँइ ह्रोंसए अलि फिलिपए प्ह्रेंस्यो हेरोदियासने ब्ह्‍या लल। छतसि “ह्रोंसए अलिए प्ह्रेंस्योने ब्ह्‍या लल् आत!” बिसि यूहन्‍नाइ बिबइले हेरोदइ यूहन्‍नालाइ क्हाबर ल्हैदिसि फैसि झेलर च्युवाल।

मर्कूस 6:19

हेरोदियासइ यूहन्‍नाने इख थेंसि चलाइ सैबै सैं लल, दिलेया सैल् आखाँल,

मर्कूस 8:15

छले ह्‍यारिमा येशूजी खीए चेलामैंने लोदा सैंदा लसि बिइ, “फरिसीमैं नेरो हेरोद म्रुँए क्हेंर झोंबै प्लेढाउँइँले न्ह क्रों मि क्रोंले टिद्।”

लूका 13:31

च त्‍हेर्न को-कोइ फरिसीमैं येशू ङाँर खसि खीने बिइ, “छुइले छ्युडिह्‍याद् तलेबिस्याँ हेरोद म्रुँइ क्‍हि सैल् म्‍हैइमुँ।”

लूका 23:11

च लिउँइँ हेरोद नेरो चए सिपाइमैंइ येशूए आब्रु वासि बेल्‍ले बिल्‍लि लइ। च लिउँइँ म्रुँइ खिब् धों तबै क्‍वें येशूलाइ खिमिंसि पिलातस ङाँर एमिंइ।

लूका 23:7

छले ङ्योएमा येशू हेरोद म्रुँए ह्‍युलर्बै म्‍हि मुँन बिब् सेसि चइ येशूलाइ हेरोद ङाँर कुलइ, तलेबिस्याँ च त्‍हेर हेरोद म्रुँ यरूशलेम सहरर्न मुँल।

लूका 3:1

रोम सहरर्बै तिबेरियस बिबै म्‍हिइ च्युसे ङ्‍हदिं समा ग्याल्स लमा पन्‍तियस पिलातस यहूदीया ह्‍युलर्बै क्रथे मुँल। च त्हेर गालील बिबै ह्‍युलर हेरोद म्रुँ मुँल। इतुरिया नेरो त्राखोनितिस बिबै ह्‍युलर हेरोदए अलि फिलिप म्रुँ मुँल। अबिलेने बिबै ह्‍युलर लुसानियास बिबै म्हि म्रुँ मुँल।

लूका 3:19

दिलेया हेरोद म्रुँइ ह्रोंसए अलिए प्ह्रेंस्यो हेरोदियासलाइ प्ह्रेंस्यो लसि थेंब नेरो चइ आछ्याँबै केमैं लबइले यूहन्‍नाइ चलाइ हौदिल।

लूका 8:3

चमैं न्‍होंरि योअन्‍ना बिबै च्हमिरि घ्रि मुँल। च खुजास बिबै म्‍हिए प्ह्रेंस्यो मुँल। च खुजास हेरोद म्रुँए दरबारर चिबै के लमल। झाइले अर्को सुसन्‍ना बिबै च्हमिरि मुँल। चमैं नेरो अरू ल्‍हें च्हमिरिमैंज्‍यै या ह्रोंसए मुइ खर्ज लसि खीए सेवा लमल।

चेला चिब्मैंए केमैं 12:1

च त्हेजरे हेरोद म्रुँइ को-कोइ बिश्‍वासीमैं क्हासि चमैंए फिर बेल्‍ले दुःख पिंबर होंइ।

चेला चिब्मैंए केमैं 4:27

क्ह्रोंसेंन हेरोद म्रुँ, पन्तियस पिलातस, अरू ह्रेंमैं नेरो इस्राएलीमैं या चु सहरर्न क्हिजी त्हाँबै सेवा लबै पबित्र येशूए बिरोधर खागु तल।