मत्ती 14:19 - परमेश्‍वरए ताँ तमु क्युइर

¹⁹ झाइले खीजी म्‍हिए हुल चउरर क्हुँबर ल्‍हैदिइ। धै च क्‍हें ङ्‌हबो नेरो ताँग ङ्हिं योर छेसि स्‍वर्गउँइँ ङ्‌ह्‍योसि परमेश्‍वरलाइ धन्‍यबाद पिंइ। धै क्‍हें लुँसि चेलामैंने पिंइ। चेलामैंइ म्‍हिए हुलमैं चुमिंइ।

मत्ती 14:19 ပူးပေါင်းရင်းမြစ်များ

मत्ती 14:18

येशूजी “च सैमैं ङ ङाँर पउ,” बिइ।

मर्कूस 6:39

झाइले येशूजी “चर मुँबै म्हिमैंलाइ टोलि टोलि लसि ल्हस्यारल्‍ले चउरर क्हुँबर ल्हैदिद्,” बिइ।

मर्कूस 6:41

झाइले येशूजी च क्‍हें ङ्‌हपो नेरो ताँग ङ्हिं किंसि मुउँइँ ङ्‌ह्‍योसि परमेश्‍वरलाइ धन्‍यबाद पिंइ। धै च क्‍हें लुँसि “म्हिमैं चुमिंन्,” बिसि चेलामैंने पिंइ। छलेन खीजी ताँग ङ्हिं या ताँनलाइ चुमिंइ।

मर्कूस 7:34

झाइले येशूजी मुउँइँ ङ्‌ह्‍योसि ह्रिंग्‍यो सो सेंसि चने “इफ्‍फाता” बिइ। (छ बिब “थोंयाँन्” बिब् ग।)

लूका 22:17

च लिउँइँ येशूजी प्‍हेला छेसि परमेश्‍वरलाइ धन्‍यबाद पिंसि चेलामैंने बिइ, “चु प्‍हेला किंसि क्‍हेमैं न्‍होंरि चुसि थुँन्।

लूका 22:19

झाइले येशूजी योर क्हें किंइ धै परमेश्‍वरलाइ धन्‍यबाद पिंसि क्‍हें लुँसि चेलामैं चुमिंसि बिइ, “चु क्‍हें ङए ज्यु ग। क्‍हेमैंए ल्हागिर ङए ज्यु ख्रो पिंब् ग। छतसि ङ मैंबै ल्हागिरि छलेन् क्हें चब्रें लद्।”

लूका 24:30

चमैंने बालु चब् चबर क्हुँमा खीजी क्‍हें किंसि परमेश्‍वरलाइ धन्यबाद पिंइ, धै क्‍हें लुँसि चमैंलाइ पिंइ।

लूका 9:14

च हुलर मुँयुँमैं मत्‍त्रे हजार ङ्‍हदे मुँल। दिलेया येशूजी खीए चेलामैंने बिइ, “ङ्‍हच्यु-ङ्‍हच्युबै ल्हस्यार लसि ताँन् म्हिमैं सर क्‍हुँल् पिंन्।”

लूका 9:16

झाइले येशूजी च क्‍हें ङ्‌हबो नेरो ताँग ङ्हिं छेसि मुउँइँ ङ्‍ह्‍योसि परमेश्‍वरलाइ धन्‍यबाद पिंसि क्‍हें लुँइ, धै “हुलमैं चुमिंन्” बिसि चेलामैंने पिंइ।

यूहन्‍ना 11:41

चमैंइ युँमा स्‍योवाबै लिउँइँ येशूजी मुउँइँ ङ्‌ह्‍योसि बिइ, “ओ आबा, ङ क्हिलाइ धन्यबाद पिंमुँ, तलेबिस्याँ क्‍हिजी ङए ताँ थेमिंइँमुँ।

यूहन्‍ना 6:23

च त्हेर्न तिबेरियास बिबै नाँसउँइँले अरू डुँङ्गामैं येशूजी धन्यबाद पिंसि म्हिमैंलाइ क्हें चल् पिंबै क्ह्‍योर फेखइ।

चेला चिब्मैंए केमैं 27:35

छबिसि पावलइ क्हें किंसि ताँनए उँइँर परमेश्‍वरलाइ धन्यबाद पिंइ, धै क्हें लुँसि चबर होंइ।

रोमी 14:6

कोइ त्हिंइ छ्याँब कोइ त्हिंइ आछ्याँब बिबै म्हिइ परमेश्‍वरए मान तरिगे बिसिन् छ बिब् ग। झाइले से चबै म्हिज्यै या परमेश्‍वरए मान तरिगे बिसिन् चब् ग, छलेन से आचबै म्हिज्‍यै या परमेश्‍वरए मान तरिगे बिसिन् आचब् ग, तलेबिस्याँ परमेश्‍वरए म्हिमैंइ तोन् ललेया खीलाइ धन्‍यबाद पिंम्।

१ कोरिन्थी 10:16

ङ्योइ प्रभु भोजरि परमेश्‍वरलाइ धन्‍यबाद पिंसि प्‍हेलाउँइँले थुँम्। छले थुँमा ङ्योइ ख्रीष्‍टए कोए भाग योंम्। छलेन क्‍हें चमा ङ्योइ ख्रीष्‍टए ज्युए भाग योंम्।

१ कोरिन्थी 10:31

ङइ तो बिम् बिस्‍याँ: क्‍हेमैंइ चलेया, थुँलेया, तो ललेया परमेश्‍वरए थेबै मान तबै ल्हागिर मत्‍त्रे लद्।

१ कोरिन्थी 11:24

झाइले परमेश्‍वरलाइ धन्‍यबाद पिंसि क्‍हें लुँसि छ बिइ, “चु क्‍हें क्‍हेमैंए ल्हागिर ङए ज्यु ग। ङलाइ मैंबै ल्हागिर चब्रें लद्।”

कलस्सी 3:17

क्हेमैंइ तो ताँ पोंलेया, तो के ललेया, येशूउँइँलेन् परमेश्‍वर आबालाइ धन्यबाद पिंदै प्रभु येशूए मिंर लद्।