लूका 10:21 - परमेश्‍वरए ताँ तमु क्युइर

²¹ च त्‍हेर्न येशू परमेश्‍वरए पबित्र प्ल्हजी प्लिंसि सैं तोंदै बिइ, “ओ आबा, स्वर्ग नेरो पृथ्‍बीर्बै क्‍ल्‍हे क्हिन् ग, ज्ञान मुँब्‍मैं नेरो ह्रब्-सेब्मैंउँइँले लोथेंबै छ्याँबै ताँ कोलोमैं धों तबै तोइ आह्र आसेब्मैंलाइ क्‍हिइ क्होमिंइमुँ। ओ आबा, क्‍हिजी छान् लब छ्याँब ङ्हाँइ। छतसि ङ क्हिलाइ धन्यबाद पिंमुँ।

लूका 10:21 ပူးပေါင်းရင်းမြစ်များ

भजनमैं 24:1

पृथ्‍बी नेरो चर मुँबै तोन्दोंरि सैमैं याहवेहलन् ग, ह्‍युल नेरो चर टिब्मैं ताँन् खीलन् ग,

भजनमैं 25:14

याहवेहलाइ मान लब्मैंने बालु खी बेल्‍ले क्ह्रिबै थु तम्, धै खीजी फैबै बाछाए ताँमैं चमैंलाइ सेल् पिंम्।

भजनमैं 8:2

कोलोमैं नेरो ङ्‍हे थुँबै कोलो ओंलाँमैंए सुँउँइँले या क्हिजी ह्रोंसए मिंर क्वे प्रिंल् पिंइमुँ। क्हिए शत्तुरमैं नेरो बिरोधीमैंए सुँ म्रुबै ल्हागिर क्हिजी छ लब् ग।

मत्ती 16:17

येशूजी चने बिइ, “ओ, योनाए च्‍ह सिमोन, क्‍ह्रोसेंन क्‍हिइ आशिक योंइमुँ! तलेबिस्याँ छाबै ताँ क्‍हिइ म्‍हिउँइँले था सेब आङिं, दिलेया स्‍वर्गर मुँबै ङए आबाजी क्हिलाइ सेल् पिंब् ग।

मत्ती 21:16

“चु कोलोमैंइ बिरिबै ताँ क्‍हिइ थेइमुँ वा?” बिसि येशूने ङ्योएइ। येशूजी बिइ, “थेइमुँ, तले आथेब! ‘च्‍योंबै कोलोमैं नेरो ओलाँ कोलोमैंए सुँउँइँले या परमेश्‍वरजी खीए मिं क्वेबर ल्हैदिइमुँ,’ बिसि परमेश्‍वरए छ्वेर प्ह्रिबै ताँ क्‍हेमैंइ खोंयोंइ आखेइमुँ वा?”

मत्ती 3:7

दिलेया फरिसीमैं नेरो सदुकीमैं न्होंर्बै ल्हें म्हि या खीने बप्‍तिस्‍मा किंबर खब् म्रोंसि यूहन्‍नइ चमैंने बिइ, “ओ प्‍हुरि धों तबै म्‍हिमैं, परमेश्‍वरए ह्रिसउँइँले स्योल् खाँम् बिसि खाबइ क्‍हेमैंने बिइ?

मर्कूस 10:15

क्ह्रोंसेंन्ले ङ क्हेमैंने बिमुँ, च्‍योंबै कोलोमैंइ [खेंमैंए आबा-आमाए फिर छेनले भर लब्] धोंले, परमेश्‍वरए फिर भर थेंसि म्‍हाँदिब्मैंइ मत्‍त्रे परमेश्‍वरउँइँले आशिक योंब्‍मुँ, धै परमेश्‍वरए ग्याल्सर होंब्‍मुँ।”

लूका 15:5

म्हयाबै क्यु योंबै लिउँइँ च क्‍ल्‍हे बेल्‍ले सैं तोंसि क्यु काँधर तेंसि प्‍ह्रोंर पखम्।

लूका 15:9

च मुइ योंबै लिउँइँ ह्रोंसए थुमैं नेरो ङ्‌हेब्-ट्हुब्‍मैं हुइसि ‘ङ बेल्‍ले सैं तोंइमुँ, क्‍हेमैं या सैं तोंन्। तलेबिस्याँ ङए म्‍हयाबै मुइ योंइ,’ बिसि चइ बिब्मुँ।

यूहन्‍ना 11:41

चमैंइ युँमा स्‍योवाबै लिउँइँ येशूजी मुउँइँ ङ्‌ह्‍योसि बिइ, “ओ आबा, ङ क्हिलाइ धन्यबाद पिंमुँ, तलेबिस्याँ क्‍हिजी ङए ताँ थेमिंइँमुँ।

२ कोरिन्थी 4:3

छतसि ङिइ बिबै सैं तोंबै ताँ नास तब्मैंए ल्हागिर मत्‍त्रे हुथेंब् धों तइमुँ।

एफिसी 1:11

खीजी मैंबै ताँन् केमैं परमेश्‍वरजी ह्रोंसए चाँजोर्न लम्। छले खीजी ओंसोंन् चाँजो लबइले ङि यहूदीमैंलाइ ख्रीष्‍टने घ्रिन् लमिंसि खीए म्‍हिमैं तबर त्हाँइ।

एफिसी 1:5

परमेश्‍वरजी ङ्योए फिर म्हाँया लसि येशू ख्रीष्‍टउँइँले खीए सन्तान तबर ङ्योलाइ ओंसों ओनोंन् त्‍हाँल। ओंसों ओंनोंन् खीजी ङ्योलाइ त्हाँबै सैं लल।