यूहन्‍ना 8:12 - परमेश्‍वरए ताँ तमु क्युइर

¹² येशूजी धबै चमैंने बिइ, “ङ ह्‍युलर्बै चारबै ह्‍वे ग। ङए लिलि प्रबै म्हि मिछु खैबर प्रल् त्‍हुरिब् आरे। दिलेया चइ खोंयोंइ आखाँबै छ्ह पिंबै चारबै ह्‍वे योंब्‍मुँ।”

यूहन्‍ना 8:12 ပူးပေါင်းရင်းမြစ်များ

भजनमैं 18:28

ओ याहवेह, क्हिजी ङए बत्ति लुँरिल् पिंम्, ङ मिछु खैबर प्ररिमा ङए परमेश्‍वरजी मि म्रोंल् लमिंम्।

भजनमैं 49:19

च ह्रोंसए खेमैं माँमैंनेन् च्ह्‍यालनेब्मुँ, चइ खोंयोंइ आखाँबै चारबै छ्ह योंबै ह्‍वे म्रोंल् योंरिब् आरे।

भजनमैं 97:11

ठिक के लब्मैंए फिर परमेश्‍वरए ह्‍वे चारम्, धै छ्याँबै खों प्ह्‍याब्मैं सैं तोंल् योंब्मुँ।

मत्ती 5:14

“झाइले अर्को ताँ, क्‍हेमैं ह्‍युलर्बै चारबै ह्‍वे ग। कोंर बनेबै सहर लोल् आखाँ।

लूका 2:32

चु कोलोन् अरू ह्रेंर्बै म्‍हिमैंलाइ क्‍हिए घ्‍याँ उँइँमिंबै चारबै ह्‍वे ग, छलेन क्हिए इस्राएली ह्रेंर्बै म्‍हिमैंए मिं थेब् लमिंबै चारबै ह्‍वे खीन् ग।”

यूहन्‍ना 12:35

येशूजी चमैंने बिइ, “अझै तिस्याँदे समा चारबै ह्‍वे क्‍हेमैंनेन् तब्मुँ। मिछु खैबइ क्हेमैं आहुरिगे बिसि चारबै ह्‍वे क्हेमैंने मुँरिबर्न प्ररिद्। मिछु खैबर प्रबै म्हिइ ह्रोंस् खनिर ह्‍यारिइमुँ बिसि सेल् आखाँ।

यूहन्‍ना 12:36

क्हेमैं चारबै ह्‍वे योंब्मैं तरिगे बिसि ह्‍वे क्हेमैंने मुँरिबर्न चारबै ह्‍वेर बिश्‍वास लद्।” चु ताँ बिबै लिउँइँ येशू च क्ल्ह्‍योउँइँले ह्‍याइ, धै चमैंउँइँले लोसि टिइ।

यूहन्‍ना 12:46

ङए फिर बि‍श्‍वास लब्मैं मिछु खैबर टिल् आत्हुरिगे बिसि ङ ह्‍युलर चारबै ह्‍वे तसि युइमुँ।

यूहन्‍ना 14:6

येशूजी चने बिइ, “घ्याँ, क्ह्रोंसेंन्बै ताँ, नेरो छ्ह ङन् ग। ङउँइँले बाहेक् खाबै या परमेश्‍वर आबा ङाँर फेनेल् आखाँ।

यूहन्‍ना 3:19

ताँ चुन् ग: चारबै ह्‍वे ह्‍युलर युइमुँ, दिलेया म्हिमैंए के दुष्‍ट मुँबइले चमैंइ चारबै ह्‍वे भन्दा मिछु खैबन् खोइ।

यूहन्‍ना 7:17

खाबज्यै परमेश्‍वरजी बिब् धोंले के लदा ङ्हाँम् बिस्याँ, ‘ङइ लोमिंबै ताँ परमेश्‍वरउँइँले युब् उ, ह्रोंसए सैंर मैंसि पोंब् जा’ बिसि चइ सेब्मुँ।

यूहन्‍ना 9:5

ङ ह्‍युलर मुँरिन् समा ङ ह्‍युलर्बै चारबै ह्‍वे ग।”

चेला चिब्मैंए केमैं 13:47

तलेबिस्याँ प्रभुजी ङिने छान् लद् बिइमुँ: ‘पृथ्‍बी तिगोंन् मुक्‍ति योंबै ताँमैं बिमिंबर अरू ह्रेंमैंए ल्हागिरि ह्‍वे तबर ङइ क्‍हि त्हाँइमुँ।’”

चेला चिब्मैंए केमैं 26:23

तो ताँमैं जा बिस्याँ, परमेश्‍वरजी कुल्मिंबै म्रुँ ख्रीष्‍टजी दुःख योंसि सिल् त्हुब्मुँ, धै सिसि धबै सोगों तब्मैंए न्होंर ताँन् भन्दा ओंसों खी सोगों तसि ह्रोंसए यहूदी ह्रें नेरो अरू ह्रेंमैंने या परमेश्‍वरए ह्‍वे सेल् पिंब्मुँ बिसि चमैंइ बिल।”

२ पत्रुस 2:17

चु स्‍योर ताँ लोमिंब्‍मैं क्‍यु आयुबै मुल नेरो थेबै खैंइ नोइ बोवाबै म्हस्यो धों तब् ग। परमेश्‍वरजी चमैंए ल्हागिर क्रोंर्बै मिछु खैबै क्‍ल्‍ह्‍यो साँथेंइमुँ।

२ पत्रुस 2:4

आछ्याँबै के लमा स्‍वर्गदूतलाज्यै या परमेश्‍वरजी ल्हयो आखल्‍ले निसाफ लबै त्हिंइ समा फैसि नर्गर्बै मिछु खबै क्ल्ह्‍योर भ्योंवाइ।

१ यूहन्‍ना 1:6

छतसि ङ्योइ “परमेश्‍वरने सैं घ्रिन् तसि प्रम्” बिलेया अझै पाप केन् लप्रइबिस्‍याँ ङ्योम् स्‍योर तेब्मैं नेरो क्ह्रोंसेंन्बै घ्‍याँर आप्रब्मैं तम्।

यहूदाइ प्‍ह्रिबै प्ह्रिछ्या 1:13

चमैं मा ङ्युँरर्बै थेबै भेल्‍गामैं धों तब्मैं ग। चुमैंइ फापिल्‍ले ह्रोंसइ लबै आछ्याँबै केमैं उँइँम्। चमैं क्‍ल्‍ह्‍यो घ्रिर आटिबै मुसारा धोंब मुँ। छाबै म्‍हिमैंए ल्हागिर क्रोंर्बै मिछु खैबै क्‍ल्‍ह्‍यो परमेश्‍वरजी खोंयोंइन साँथेंइमुँ।

यहूदाइ प्‍ह्रिबै प्ह्रिछ्या 1:6

धै अर्को ताँ, को-कोइ स्‍वर्गदूतमैंइ ह्रोंसए पदर टिसि लल् त्हुबै के आलल्‍ले अर्कोन् के लल् म्हैइ, टिल् त्हुबै क्ल्ह्‍यो पिवाइ। छतसि चमैंलाइ दण्‍ड पिंबै त्हिंइ समा खोंयोंइ त्होंल् आखाँल्‍ले मिछु खैबै क्ल्ह्‍योर खीजी फैथेंइमुँ।

दर्शन 21:24

ह्‍युलर्बै म्‍हिमैं च सहरर परमेश्‍वरए छ्याँबै ह्‍वेर प्रब्मुँ, झाइले ह्‍युलर्बै म्रुँमैंइ खेंमैंए सै न्होर चर पखब्मुँ।