यूहन्‍ना 5:23 - परमेश्‍वरए ताँ तमु क्युइर

²³ तलेबिस्याँ खैले म्हिमैंइ परमेश्‍वर आबाए मान लमुँ, छलेन ताँन् म्हिमैंइ खीए च्हए मान लरिगे। च्‍हए मान आलब्मैंइ च्‍हलाइ कुल्‍मिंबै आबालै या मान आल।

यूहन्‍ना 5:23 ပူးပေါင်းရင်းမြစ်များ

भजनमैं 2:12

च्हलाइ मान लसि फ्योद्, छ आलस्याँ खी ह्रिस खब्मुँ, धै क्हेमैं घ्याँर्न सिब्मुँ, तलेबिस्याँ खी युनन् ह्रिस खम्। खीए प्हलेर ग्वार ह्रिबर ह्‍याब्मैंइ आशिक योंब्मुँ।

मत्ती 10:37

“खाबइ ङ भन्दा ह्रोंसए आबा-आमाए म्हाँया ल्हें लमुँ, च ङए म्‍हि तल् आखाँ। छलेन खाबइ ङ भन्दा ह्रोंसए च्‍ह-चमिए म्हाँया ल्हें लमुँ च ङए म्‍हि तल् आखाँ।

मत्ती 11:27

येशूजी धबै बिइ, “ङए आबाजी तोन्दोंरि सै ङने पिंइमुँ। परमेश्‍वर आबाजी बाहेक अरू खाबज्‍यै परमेश्‍वरए च्‍हलाइ ङो आसे। छलेन च्ह बाहेक खाबज्यै परमेश्‍वर आबालाइ ङो आसे। ‘परमेश्‍वर आबा ङो सेरिगे’ बिसि च्हजी तेंमिंब्मैंइ मत्‍त्रे परमेश्‍वर आबा ङो सेमुँ।

मत्ती 12:21

छतसि खीए मिंर्न ताँन् ह्रेंमैंइ आशा थेंब्‍मुँ।”

मत्ती 15:8

‘चु ह्रेंइ सुँइ मत्‍त्रे ङए मान लम्, दिलेया चमैंए सैं बिस्‍याँ ङ ङाँइँले ह्रेंगो मुँ।

मत्ती 28:19

छतसि क्‍हेमैं ह्‍युलर्बै ताँन् ह्रेंमैं ङाँर ह्‍यासि चेलामैं लदु, धै परमेश्‍वर आबा, परमेश्‍वर च्‍ह नेरो पबित्र प्ल्हए मिंर क्‍युर प्‍ल्हुँमिंसि बप्‍तिस्‍मा पिंन्।

लूका 10:16

येशूजी धबै चेलामैंने बिइ, “खाब‍इ क्‍हेमैंइ बिबै ताँ थेमुँ, चइ ङए ताँ थेम्। दिलेया खाबइ क्‍हेमैंइ बिब आङिंसि बिरोध लम्, चइ ङए बिरोध लम्। छलेन खाबइ ङइ बिब आङिंसि बिरोध लमुँ, चइ ङ कुल्‍मिंबै परमेश्‍वर आबालाज्यै या बिरोध लम्।”

यूहन्‍ना 14:1

“क्‍हेमैंए सैं खैता-खैता आङ्हाँन्। क्हेमैंइ परमेश्‍वरए फिर बिश्‍वास लमुँ, छलेन ङए फिरै या बिश्‍वास लद।

यूहन्‍ना 16:14

ङइ बिबै ताँमैं खीजी क्हेमैंने बिमिंसि ङए मान लब्मुँ।

यूहन्‍ना 17:10

ङने मुँबै ताँन् म्हि क्‍हि‍लन् ग, धै क्हिने मुँबै ताँन् म्हि ङल् ग। ङए मान चमैंउँइँले तइमुँ।

रोमी 1:7

परमेश्‍वरजी क्‍हेमैंए फिर म्हाँया लसि खीए म्‍हिमैं तरिगे बिसि त्‍हाँइमुँ। छतसि क्‍हेमैं रोमर टिब्‍मैंलाइ ङइ चु ताँमैं प्‍ह्रिसिन् मुँ: ङ्योए परमेश्‍वर आबा नेरो प्रभु येशू ख्रीष्‍टउँइँले क्‍हेमैंए फिर दयाम्हाँया नेरो शान्‍ति तरिगे।

रोमी 15:12

झाइले यशैया अगमबक्‍ताज्‍यै या येशू ख्रीष्‍ट युबै बारेर छ बिल, “दाऊद म्रुँए खलकउँइँले म्‍हि घ्रि युब्‍मुँ, खीजी अरू ह्रेंर्बै म्‍हिमैंए फिर ग्याल्स लब्‍मुँ, खीए फिर अरू ह्रेंर्बै म्‍हिमैंइ आशा थेंब्‍मुँ।”

रोमी 6:22

दिलेया तारे क्‍हेमैं पापउँइँले फ्रेसि परमेश्‍वरए के लबै म्हिमैं तइमुँ। छतसि तारे क्हेमैंने तल् त्हुबै रो छ्याब् आरेबै छ्ह ग। छले क्हेमैंइ खोंयोंइ आखाँबै छ्ह योंम्।

रोमी 8:9

दिलेया परमेश्‍वरए प्ल्ह क्‍ह्रोंसेंन्‍ले क्‍हेमैंने टिस्याँ क्‍हेमैं ओंसोंबै बानिए लिलि आप्र, बरु परमेश्‍वरए प्ल्हए लिलि प्रम्। येशू ख्रीष्‍टए प्ल्ह आरेबै म्‍हि ख्रीष्‍टल् आङिं।

१ कोरिन्थी 1:3

ङ्योए परमेश्‍वर आबा नेरो प्रभु येशू ख्रीष्‍टउँइँले क्‍हेमैं ताँनइ दयाम्हाँया नेरो शान्‍ति योंरिगे।

१ कोरिन्थी 10:31

ङइ तो बिम् बिस्‍याँ: क्‍हेमैंइ चलेया, थुँलेया, तो ललेया परमेश्‍वरए थेबै मान तबै ल्हागिर मत्‍त्रे लद्।

१ कोरिन्थी 16:22

प्रभुलाइ म्हाँया आलबै म्हिइ सराप योंरिगे। ओ प्रभु यु।

१ कोरिन्थी 6:19

परमेश्‍वरजी क्हेमैंलाइ पबित्र प्ल्ह पिंइ, छतसि क्हेमैंए ज्यु पबित्र प्ल्ह टिबै मन्‍दिर ग बिब क्‍हेमैंइ आसे वा? क्‍हेमैं ह्रोंसल्न आङिं, क्‍हेमैं परमेश्‍वरल् ग।

२ कोरिन्थी 1:9

तारेम् च्हगन् तइ ङिम् सिबन् मुँन बिब् समन् ङिइ मैंयाल। दिलेया ङिइ ह्रोंसए फिर भर आलरिगे बरु सिब्‍मैंलाइ सोगों लमिंबै परमेश्‍वरए फिर भर लरिगे बिसि छ तब् मुँन।

२ कोरिन्थी 13:14

प्रभु येशू ख्रीष्‍टजी पिंबै दयाम्हाँया, परमेश्‍वर आबाजी लबै म्हाँया नेरो पबित्र प्ल्हउँइँले तबै संगति क्‍हेमैं ताँनने तरिगे।

२ कोरिन्थी 5:14

येशू ख्रीष्‍टजी ङ्योने म्हाँया लबइले ङ्यो खीए अधीनर मुँ, तलेबिस्याँ ताँन् म्‍हिमैंए ल्हागिर ख्रीष्‍ट सिमिंबइले ङ्यो ताँन् खीने बालुन् सिब् धोंन् तइ बिबै ताँ ङ्योइ सेइमुँ।

२ कोरिन्थी 5:19

ङिइ बिबै सैं तोंबै ताँ चुन् ग: परमेश्‍वरजी ख्रीष्‍टउँइँले ताँन् म्‍हिमैंलाइ खीने बालु क्ह्रिल् लमिंइमुँ। म्‍हिमैंइ लबै पापए सजैं परमेश्‍वरजी आपिं। छतसि म्‍हिमैंलाइ खीने बालु क्ह्रिल् लमिंबै ल्हागिर खीए बारेर्बै ताँ म्हिमैंने बिमिंबै जिम्‍मा ङिलाइ पिंथेंइमुँ।

एफिसी 6:24

छले ङ्योए प्रभु येशूए फिर म्हाँया लब्मैं ताँनने खोंयोंन् बिलै परमेश्‍वरए दयाम्हाँया तरिगे।

२ तिमोथी 1:12

छतसि तोगो ङइ चु दुःखमैं नोरिइमुँ, दिलेया ङ फापिसि सैं च्योंब् आल। तलेबिस्याँ ङइ खाबै फिर बिश्‍वास लइमुँ बिब ङइ सेइमुँ, ङलाइ ढुक्‍का मुँ तो सैमैं ङइ खीने थेंल् पिंइमुँ, च सैमैं खीजी छेनाले थेंमिंम्।

हिब्रू 1:6

खीए घ्रि मुँबै च्ह ह्‍युलर कुलमा खीजी छ बिइमुँ, “परमेश्‍वरए ताँन् स्वर्गदूतमैंइ खीलाइन फ्योरिगे।”

२ पत्रुस 1:1

येशू ख्रीष्‍टए के लबै कुल्मिंबै चेला चिब ङ सिमोन पत्रुसउँइँले क्हेमैंलाइ जय मसीह मुँ। ङ्योए परमेश्‍वर नेरो ङ्योलाइ जोगेमिंबै येशू ख्रीष्‍टजी खाबलाज्यै या आफेलल्‍ले ठिक के लइमुँ। खीजी ङिलाइ पिंब् धोंले क्हेमैंलाज्यै या ठिक बिश्‍वास लल् पिंइमुँ।

२ पत्रुस 3:18

बरु ङ्योलाइ जोगेमिंबै प्रभु येशू ख्रीष्‍टए थेबै दयाम्हाँया नेरो बुद्धिर बडिदै ह्‍याद्। खीलाइ तोगो नेरो खोंयोंइ या थेबै मान तरिगे। आमेन, छान् तरिगे।

१ यूहन्‍ना 2:23

च्‍हलाइ मान आलबै म्हिने आबा आटि। बरु “ङ च्‍हलाइ सैं पिंसि मान लमुँ” बिबै म्हिए सैंर आबा टिम्।

२ यूहन्‍ना 1:9

ख्रीष्‍टजी बिब् धोंले आप्रब, खीजी बिबै ताँए फिरि अरू ताँ थप्‍दिब्‍मैंने परमेश्‍वर आटि। दिलेया खीजी बिब् धोंले प्रब्मैंने बालु परमेश्‍वर आबा नेरो च्‍ह ङ्हिंना ङ्हिंन् टिम्।