यूहन्‍ना 3:21 - परमेश्‍वरए ताँ तमु क्युइर

²¹ दिलेया क्ह्रोंसेंन्बै छ्ह थोबै म्हिमैं चारबै ह्‍वेर खम्। धै चमैंइ लबै केमैं परमेश्‍वरजी बिब् धोंले लब् ग बिसि छेनले म्रोंल् खाँम्।”

यूहन्‍ना 3:21 ပူးပေါင်းရင်းမြစ်များ

भजनमैं 119:105

क्हिए ताँ ङए प्हलेमैंए ल्हागिर बत्ति ग, धै ङ प्रल् त्हुबै घ्याँर ङलाइ डोरेबै ह्‍वे ग।

भजनमैं 119:80

ङ फापिल् आत्हुबै ल्हागिर क्हिए निसाफमैंइ बिब् धोंले ङए खों छ्याब मुँब आतरिगे।

यूहन्‍ना 1:47

येशूजी नथानेल खी ङाँइ खरिब् म्रोंसि चए बारेर बिइ, “ङ्‌ह्‍योत्ति, पक्‍क इस्राएलीथें घ्रि। चने तोइ छल आरे।”

यूहन्‍ना 3:20

तलेबिस्याँ दुष्‍ट के लब्मैंइ चारबै ह्‍वेलाइ आखो, तलेबिस्याँ खेंमैंइ लबै के म्‍हिमैंइ म्रोंवाब्मुँ बिसि चमैं चारबै ह्‍वेर आखा।

यूहन्‍ना 5:39

“परमेश्‍वरए छ्वेर खोंयोंइ आखाँबै छ्ह योंम् बिसि क्‍हेमैंइ म्हैरिम्, ङए बारेर ग्वाइ पिंबम् परमेश्‍वरए छ्वे ग।

यूहन्‍ना 7:17

खाबज्यै परमेश्‍वरजी बिब् धोंले के लदा ङ्हाँम् बिस्याँ, ‘ङइ लोमिंबै ताँ परमेश्‍वरउँइँले युब् उ, ह्रोंसए सैंर मैंसि पोंब् जा’ बिसि चइ सेब्मुँ।

१ कोरिन्थी 15:10

दिलेया परमेश्‍वरए दयाम्हाँया योंसि ङ तिंजोरो कुल्मिंबै चेला चिब तइ। झाइले परमेश्‍वरजी ङए फिर लबै दयाम्हाँया फाक्‍कर्बै आतइमुँ, बरु ङइ अरू कुल्मिंबै चेला चिब्मैंइ भन्दा ल्हें के लइमुँ। दिलेया चु छाबै के ङ ह्रोंसैन लब आङिं, ङने मुँबै परमेश्‍वरए दयाम्हाँयाजी लब् ग।

२ कोरिन्थी 1:12

चु ताँ बिल् योंमा ङि ङ्‍हो च्हौ प्ल्ह्‍याब् धों ङ्हाँइमुँ, ङिए सैंज्यै या छान् बिम्। ङिइ चु ह्‍युलर छ्ह थोमा छ्याँबै केमैं लसि छेनाले प्रब्-टिब लइ, क्‍हेमैंने मुँमै या ङि छेनाले प्रब्-टिब पोंब लसि परमेश्‍वरए क्‍ह्रोंसेंन्बै घ्याँर प्रल। ङिइ छाबै केमैं म्‍हिए ज्ञान बुद्धिउँइँले लब आङिं, चु केमैं ङिइ परमेश्‍वरए दयाम्हाँयाउँइँले लल् खाँब् ग।

गलाती 6:8

खाबइ ह्रोंसए आछ्याँबै सैंउँइँले आछ्याँबै इच्‍छाए केमै लमुँ, च नास तयाब्‍मुँ, दिलेया खाबइ पबित्र प्ल्हजी बिब् धोंबै केमैं लमुँ, चइ पबित्र प्ल्हउँइँलेन् खोंयोंइ आखाँबै छ्ह योंब्‍मुँ।

एफिसी 5:9

तलेबिस्याँ खीए ह्‍वेर टिबइले क्हेमैंइ ताँन् खालर्बै छ्याँबै केमैं, ठिक केमैं, नेरो क्ह्रोंसेंन्बै ताँमैं लम्।

फिलिप्पी 1:11

झाइले परमेश्‍वरलाइ मान लसि खीए मिं थेब लबै ल्हागिर येशू ख्रीष्‍टउँइँले योंबै छ्याँबै बानि क्हेमैंने तरिगे।

फिलिप्पी 2:13

तलेबिस्याँ परमेश्‍वरजी क्‍हेमैं खीए सैंर मैंब् धोंले प्ररिगे धै खीए के लरिगे बिसि खीजी क्हेमैंए न्‍होंर खोंयोंइन के लरिम्।

कलस्सी 1:29

ङए सैं न्होंर ख्रीष्‍टजी थेंमिंबै भोंउँइँले ङ खैबै दुःखन् तलेया चु के लम्।

हिब्रू 13:21

क्‍हेमैं ताँनलाइ छ्याँबै गुनइ प्लिंमिंरिगे, धै खीए सैंर मैंब् धों तब क्हेमैंइ लल् खाँरिगे। परमेश्‍वरजी खोबै के येशू ख्रीष्‍टउँइँले खीजी क्हेमैंए म्हाँजोर लरिगे। येशूए मिं खोंयोंन् बिलै थेब तरिगे। आमेन, छान् तरिगे।

१ पत्रुस 1:22

क्‍हेमैंइ क्ह्रोंसेंन्बै परमेश्‍वर म्हाँदिसि ह्रोंसलाइ चोखो लबइले, ह्रोंसए आघें अलिलाइ आफेलनाले म्हाँया लद्, धै घ्रिइ घ्रिलाइ सैं न्होंउँइँलेन् म्हाँया लद्,

१ यूहन्‍ना 1:6

छतसि ङ्योइ “परमेश्‍वरने सैं घ्रिन् तसि प्रम्” बिलेया अझै पाप केन् लप्रइबिस्‍याँ ङ्योम् स्‍योर तेब्मैं नेरो क्ह्रोंसेंन्बै घ्‍याँर आप्रब्मैं तम्।

३ यूहन्‍ना 1:11

ओ ङइ खोबै थु, आछ्याँबै के लब्मैंइ धोंले आलद्, बरु छ्याँबै के लब्मैंइ धोंलेन् क्हिज्यै या छ्याँबै केमैं लद्। छ्याँबै के लब्मैं परमेश्‍वरए म्हिमैं ग, आछ्याँबै के लब्मैंइ परमेश्‍वरलाइ आम्रोंइमुँ।

दर्शन 3:15

क्हेमैंइ लबै ताँन् के ङइ सेइमुँ। क्हेमैंए बिश्‍वास ललै आरे, ङ्युँबै आरे। क्हेमैं तो तलेया तिथु तस्याँ तमल।