यूहन्‍ना 19:11 - परमेश्‍वरए ताँ तमु क्युइर

¹¹ येशूजी बिइ, “परमेश्‍वरजी आपिंस्याँ क्हिला ङए फिर तोइ हग आतमल। छतसि ङलाइ क्हिए योर पिंवाबै म्हिए फिर पापए छ्याब् झन् ल्हें तब्मुँ।”

यूहन्‍ना 19:11 ပူးပေါင်းရင်းမြစ်များ

भजनमैं 39:9

ङ च्याँले टिइ, ङइ तोइ आपों, तलेबिस्याँ क्हिजीन् ङलाइ छले टिल् पिंइ।

भजनमैं 62:11

परमेश्‍वरजी ताँ घ्रि पोंइमुँ, ङइ ल्हें खे च ताँ थेइमुँ: ओ परमेश्‍वर, क्हि बेल्‍ले भोंब मुँ,

मत्ती 26:65

छ बिब् थेसि ख्रो पिंबै खेगि क्रथेइ ह्रोंसए क्‍वें ट्होसि चर्बै चिबनाँब्मैंने बिइ, “चुइ परमेश्‍वर स्यारसि पोंइ। तारे ङ्योलाइ अरू ग्वाइ तले चैदिइ? चुइ परमेश्‍वरए क्ल्ह्‍योर खी तसि पोंब क्हेमैंइ थेइ।

मत्ती 27:2

झाइले चमैंइ खीलाइ फैसि रोमी क्रथे पिलातस ङाँर बोसि पिंवाइ।

मत्ती 6:13

ङिलाइ पापर च्होल् आपिंनु, दुष्‍टउँइँले जोगेमिंनु। [तलेबिस्याँ ग्याल्स, शक्‍ति नेरो थेबै मान खोंयोंइ बिले क्हिलन् ग। आमेन।]

मर्कूस 14:44

च यहूदाइ ओंसोंन् च क्‍हाबै म्‍हिमैंने छ बिथेंल, “ङ ह्‍यासि म्वें लबै म्हिलाइन क्हेमैंइ क्‍हासि बोद्।”

लूका 22:53

ङ त्हिंइ ह्रोंसे क्‍हेमैंने ‍बालुन् मन्दिरर मुँमा क्‍हेमैंइ ङ आक्हा। दिलेया तारे क्हेमैंए त्हे तइमुँ। छतसि क्हेमैं तो के लबर खल, च के लद्, तलेबिस्याँ मिछु खैबर्बै शक्‍तिए के लबै त्हे चुन् ग।”

यूहन्‍ना 18:13

ओंसों चमैंइ खी हन्‍नास ङाँर बोइ। हन्‍नास बिब च सालर्बै ख्रो पिंबै खेगि क्रथे कैयाफाए क्यें मुँल।

यूहन्‍ना 18:3

च त्हेर्न यहूदाइ रोमी सिपाइमैं ख्रो पिंबै खेगि चिब्मैं नेरो फरिसीमैंइ कुल्मिंबै मन्दिर रुँबै म्हिमैं च बगैंचार बत्ति नेरो प्हरे-क्होजमैं छेसि मेंदों म्रोसि चर फेखइ।

यूहन्‍ना 19:10

छतमा पिलातसइ खीने बिइ, “क्हि ङने आपों वा? क्हि पिवाबै हग ङने मुँ, धै क्रूसर च्योवाबै हगै या ङने मुँ बिसि क्हिजी आसेइमुँ वा?”

यूहन्‍ना 3:27

यूहन्‍नाइ बिइ, “परमेश्‍वरजी स्वर्गउँइँले आपिंइ बिस्‍याँ म्हिमैंइ तोइ सै योंल् आखाँ।

यूहन्‍ना 7:30

चु ताँ थेसि चर्बै म्हिमैंइ खीलाइ क्हाबर होंइ। दिलेया खाबज्यै खीए फिर यो झोंल् आखाँ। तलेबिस्याँ खीए सिबै त्हे अझै आतल।

यूहन्‍ना 9:41

येशूजी चमैंने बिइ, “क्‍हेमैं कनमैं मुँस्‍याँम् पापए दोषि आतमल, दिलेया क्हेमैंइ ‘ङि म्रोंल् खाँम्’ बिमुँ, छतसि क्हेमैंए पाप क्हेमैंनेन् तरिम्।”

चेला चिब्मैंए केमैं 2:23

दिलेया परमेश्‍वरजी ओंसोंन् चाँजो लसि येशूलाइ क्‍हेमैंए योर पिंवाँइ। धै दुष्‍ट म्हिमैंउँइँले क्हेमैंइ येशू क्रूसर च्योवासि सैवाइ।

चेला चिब्मैंए केमैं 3:13

अब्राहाम, इसहाक नेरो याकूबए परमेश्‍वर, ङ्योए खेमैंए परमेश्‍वरजी ह्रोंसए सेवा लबै येशूलाइ कति थेब लमिंइ। दिलेया क्हेमैंइ खी क्हासि सैबर पिलातसलाइ पिंवाइ। पिलातसइ खीलाइ पिमिंबै सैं ललेया क्हेमैंइ पिलातसए उँइँर्न खीए बिरोध लसि खीलाइ पिल् आपिं।

चेला चिब्मैंए केमैं 4:28

छतमा ओंसों ओंनोंन् क्हिए योउँइँले क्हिजी लबै चाँजोमैं च बिरोधीमैंइ पूरा लइ।

रोमी 11:36

तलेबिस्याँ परमेश्‍वरजी तोन्दोंरि सै बनेइ, तोन्दोंरि सै खीउँइँलेन् खीए ल्हागिर्न ग। परमेश्‍वरए मिं खोंयोंन् बिलै थेब तरिगे। आमेन, छान् तरिगे।

रोमी 13:1

ताँन् म्हिमैं सरकारए ठिमए न्होंर टिल् त्‍हुम्, तलेबिस्याँ परमेश्‍वरए इच्छा आरेस्याँ सरकार तल् आखाँ। ताँन् सरकारलाइ परमेश्‍वरजीन् खटिदिब् ग।

याकूब 1:17

तलेबिस्याँ ताँन् छ्याँबै दान बरदानमैं त्हिंयाँ नेरो लयाँ बनेबै परमेश्‍वरउँइँले युम्। तलेबिस्याँ खी खोंयोंइ ङ्हरि कुरि आत।

याकूब 4:17

छतसि ठिक के लल् ह्रसेया आलबै म्हिइ पाप लम्।