यूहन्‍ना 17:23 - परमेश्‍वरए ताँ तमु क्युइर

²³ क्हिजी ङ कुल्मिंब् ग धै क्हिजी ङने म्हाँया लब् धोंलेन् क्हिजी चमैंलाज्यै या म्हाँया लइमुँ। छतसि चमैं तोन्दोंरि सैर क्ह्रिसि घ्रिन् तरिगे बिसि ङ चमैंने बालु मुँ, क्हि ङने बालु मुँ बिब ह्‍युलर्बै म्हिमैंइ सेरिगे।

यूहन्‍ना 17:23 ပူးပေါင်းရင်းမြစ်များ

यूहन्‍ना 10:38

दिलेया ङइ आबाए केंमैं लसेया क्हेमैंइ ङए फिर बिश्‍वास आल बिस्याँ चु केमैं फिर बिश्‍वास लद्। झाइले बल्‍ल ‘आबा ङने मुँ, ङै या आबाने मुँ,’ बिब क्‍हेमैंइ था सेब्मुँ।”

यूहन्‍ना 13:35

छले क्हेमैंइ घ्रिइ-घ्रिने म्हाँया लइ बिस्याँ, क्हेमैं ङए चेलामैं मुँन बिसि ताँनइ सेब्मुँ।”

यूहन्‍ना 14:10

ङ आबाने मुँ, आबा या ङने बालु मुँ बिबै ताँ क्हिइ आक्वें वा? ङइ क्हेमैंने बिबै ताँमैं ङ ह्रोंसए सैंर मैंसि पोंब् आङिं। दिलेया ङने टिबै आबाजी ङउँइँले ह्रोंसए केमैं लम।

यूहन्‍ना 14:23

येशूजी चने बिइ, “खाबइ ङलाइ म्हाँया लमुँ, चइ ङए ताँ ङिंमुँ, धै ङए आबाजी चलाइ म्‍हाँया लब्‍मुँ, झाइले आबा नेरो ङ च ङाँर युसि चने बालु टिब्‍मुँ।

यूहन्‍ना 15:9

“आबाजी ङने खैले म्‍हाँया लइमुँ, ङज्यै या क्हेमैंने छाबन् म्हाँया लइमुँ। छतसि क्हेमैं ङए म्हाँयार टिरिद्।

यूहन्‍ना 16:27

तलेबिस्याँ आबाजी क्‍हेमैंने म्हाँया लम्। तलेबिस्याँ क्हेमैंइ ङलाइ म्हाँया लइमुँ, धै ङ परमेश्‍वर आबाउँइँले युब् ग बिसि क्वेंइमुँ।

यूहन्‍ना 17:11

तारे ङ क्हि ङाँर खसिन् मुँ। ङ चु ह्‍युलर ल्हें आटि, चुमैं बिस्याँ चु ह्‍युलर्न टिम्। ओ पबित्र आबा, ङ्यो घ्रि तब् धोंलेन् क्हिजी ङने पिंब्मैं या घ्रिन् तरिगे बिसि क्हिए मिंए शक्‍तिउँइँले चमैं जोगेसि थेंमिंन्।

यूहन्‍ना 17:21

ओ आबा, चमैं ताँन् घ्रिन् तरिगे बिसि ङ प्राथना लम्। धै क्हि ङने बालु मुँ, ङ क्हिने बालु मुँब् धोंलेन् चमैं या ङ्योने बालु तरिगे। चमैं ताँन् घ्रिन् तमा क्हिजी ङ कुल्मिंब् ग बिसि ह्‍युलर्बै म्हिमैंइ क्वेंरिगे बिसि ङ प्राथना लम्।

यूहन्‍ना 17:24

“ओ आबा, चु ह्‍युल बनेब् भन्दा ओंसों ओंनोंन् क्हिजी ङलाइ म्हाँया लसि थेबै मान पिंइ। क्हिजी ङने पिंबै म्हिमैं ङए थेबै मान म्रोंबर चमैं ङ टिबै क्ल्ह्‍योरि ङने बालुन् तरिगे बिब ङए सैं मुँ।

यूहन्‍ना 17:26

क्हिजी ङने खैबै म्हाँया लइमुँ, छाबन् म्हाँया चमैंने या तरिगे, धै ङ चमैंने बालु तरिगे बिसि ङइ क्हिए मिं चुमैंलाइ सेल् पिंइमुँ, अझै सेल् पिंरिब्मुँ।”

यूहन्‍ना 17:3

म्हिमैंइ क्हि घ्रि मत्‍त्रे क्ह्रोंसेंन्बै परमेश्‍वरलाइ ङो सेब नेरो क्हिजी कुल्मिंबै येशू ख्रीष्‍टलाइ ङो सेबन् खोंयोंइ आखाँबै छ्ह ग।

यूहन्‍ना 17:8

तलेबिस्याँ क्हिजी ङने पिंबै ताँ ङइ चमैंने पिंइँमुँ। धै चमैंइ च ताँ क्वेंसि ङ क्हि ङाँइले युब् ग बिसि क्ह्रोंसेंन्ले सेइमुँ। झाइले क्हिजीन् ङ कुल्मिंब् ग बिसि चमैंइ क्वेंइँमुँ।

यूहन्‍ना 3:17

तलेबिस्याँ ह्‍युलर्बै म्हिमैं दोषि ठर्दिबर परमेश्‍वरजी ह्रोंसए च्हलाइ कुलब आङिं, दिलेया चमैंलाइ जोगेबर कुल्मिंइ।

यूहन्‍ना 6:56

ङए ज्यु चब्मैं नेरो ङए को थुँब्मैं ङने तरिम्, धै ङ चमैंने बालु तरिम्।

१ कोरिन्थी 1:30

तलेबिस्याँ ख्रीष्‍टउँइँलेन् परमेश्‍वरजी ङ्योलाइ छ्ह पिंइमुँ, ख्रीष्‍टउँइँले ङ्योइ बुद्धि योंइमुँ, ख्रीष्‍टउँइँलेन् ङ्योइ ठिक के लल् खाँमुँ, ख्रीष्‍टउँइँलेन् ङ्यो पबित्र तइमुँ, ख्रीष्‍टउँइँलेन् परमेश्‍वरजी ङ्योलाइ जोगेमिंइमुँ।

२ कोरिन्थी 5:21

तलेबिस्याँ ङ्यो ख्रीष्‍टउँइँले ठिक ठर्दिरिगे बिसि तोइ पाप आरेबै येशू ख्रीष्‍टलाइ परमेश्‍वरजी ङ्योइ लबै पापए ति नोल् पिंइ।

गलाती 3:28

छतसि ङ्यो न्होंर खाबै या तोइ सैरैया फरक आरे - यहूदीमैं मुँलेया, अरू ह्रेंमैं मुँलेया, केब्छैं ङिंलेया केब्छैं आङिंलेया, मुँयुँ मुँलेया च्हमिरि मुँलेया, तोइ फरक आरे। तलेबिस्याँ क्‍हेमैं ख्रीष्‍ट येशूने घ्रिन् तसि ताँन् घ्रिन् तइमुँ।

फिलिप्पी 3:15

ङ्यो येशू ख्रीष्‍टए फिर बिश्‍वास लब्मैं ताँनइ छाबन् सैं मैंल् त्‍हुम्। दिलेया क्‍हेमैं न्‍होंरि को-कोइ स्योबन् सैं मैंस्‍याँ परमेश्‍वरजी च ताँ या क्‍हेमैंलाइ क्होमिंब्‍मुँ।

कलस्सी 1:28

ताँन् म्हिमैं ख्रीष्‍टर भोंसि तरिगे बिसि ङिइ ख्रीष्‍टउँइँले खबै बुद्धिए ताँमैं लोमिंदै ताँन् म्हिमैंने न्ह क्रों मि क्रोंले टिद् बिम्।

कलस्सी 2:2

क्‍हेमैं ह्रों-ह्रोंसए न्होंर म्हाँयार सैं घ्रि तसि क्हेमैंए सैं भोंब् तरिगे, धै परमेश्‍वरउँइँले खबै क्ह्रोंसेंन्बै बुद्धिइ प्लिंसि परमेश्‍वरइ लोथेंबै ताँ क्‍हेमैंइ सेरिगे। च ताँ तो जा बिस्याँ, येशू ख्रीष्‍ट ङो सेल् योंब् ग।

कलस्सी 3:14

चु ताँन् सै भन्दा अरूलाइ ल्हें म्हाँया लबै सैं प्‍ह्‍याद्। म्हाँयाइ लमा आक्ह्रिब्मैं ताँन् क्ह्रिल् खाँम्।

१ पत्रुस 5:10

दयाम्हाँया मुँबै परमेश्‍वरजी क्हेमैंलाइ येशू ख्रीष्‍टने घ्रिन् लमिंइमुँ, धै खीजी योंब् धों तबै खोंयोंइ आनुबै मान ङ्योज्यै या योंरिगे बिसि खीजी ङ्योलाइ त्‍हाँइमुँ। क्‍हेमैंइ तिस्याँदे दुःख योंबै लिउँइँ खीजीन् क्हेमैंलाइ धबै छारा लमिंसि, भोंसि लमिंब्मुँ धै बेल्‍ले शक्‍ति मुँब लमिंब्‍मुँ।

१ यूहन्‍ना 1:3

क्हेमैं या ङिने बालु सैं घ्रिन् तसि प्रल् खाँरिगे बिसि ङिइ थेबै ताँ नेरो म्रोंबै ताँ क्‍हेमैंने बिम्। परमेश्‍वर आबा नेरो खीए च्‍ह येशू ख्रीष्‍टने ङ्यो सैं घ्रिन् तसि प्रम्।

१ यूहन्‍ना 3:1

मैंन्दि, परमेश्‍वर आबाजी ङ्योलाइ कति थेबै म्हाँया लइमुँ। च्‍हौ थेबै म्हाँया लसि खीजी ङ्योलाइ “ह्रोंसए प्‍हसेमैं” बिइमुँ। क्ह्रोंसेंन ङ्यो परमेश्‍वरए प्‍हसेमैं तइमुँ। चु ह्‍युलर्बै म्‍हिमैंइ परमेश्‍वरलाइ ङो आसेइमुँ, छतसि ङ्योलाइ “परमेश्‍वरए प्‍हसेमैं ग,” बिसि आसे।

१ यूहन्‍ना 4:19

परमेश्‍वरजी ओंसोंन् ङ्योए फिर म्हाँया लबइले ङ्योज्यै (खी नेरो ङ्योए बिश्‍वासी अलि-अङाँमैंलाइ) म्हाँया लम्।

दर्शन 3:9

थेद्, को-कोइ दुष्‍टए न्होंर टिब्मैंइ ‘ङ यहूदी ग’ बिम् दिलेया चमैं क्ह्रोंसेंन्बै यहूदी आङिं। च स्‍योर्गुमैंलाइ ङइ क्‍हेमैंए प्‍हले फ्‍योबर ल्‍हैदिब्‍मुँ। झाइले ङइ क्‍हेमैंलाइ म्हाँया लरिमना बिब चमैं ताँनइ था सेब्‍मुँ।