यूहन्‍ना 12:26 - परमेश्‍वरए ताँ तमु क्युइर

²⁶ “ङए सेवा लदा ङ्हाँब्मैं ङए लिलि प्ररिगे। छलमा ङ खनिर टिमुँ, ङए सेवा लब्मैं चर्न तब्मुँ। ङए सेवा लब्मैंलाइ ङए आबाजी मान लब्मुँ।”

यूहन्‍ना 12:26 ပူးပေါင်းရင်းမြစ်များ

भजनमैं 17:15

ङ ठिक के लसि क्हिए लि ङ्‍ह्‍योब्मुँ, धै छोरमा ङ क्हिलाइ म्रोंसि सैं तोंब्मुँ।

भजनमैं 91:15

चइ ग्वार ह्रिमा ङइ चलाइ ज्वाफ पिंब्मुँ; चए दुःखर ङ चने बालु तब्मुँ; चए दुःखउँइँले ङइ फ्रेमिंब्मुँ, धै चलाइ थेब् लब्मुँ।

हितोपदेश 27:18

तोंबु धुँलाइ छेनाले ङ्‍ह्‍योबै म्हिइन चए रो चब्मुँ, छलेन ह्रोंसए क्ल्हेए सेवा लबै म्हिइन मान योंब्मुँ।

मत्ती 16:24

झाइले येशूजी खीए चेलामैंने बिइ, “ङए लिलि खदा ङ्हाँम्मैं, ह्रोंसए ज्यु म्हाँया आलल्‍ले दुःख नोसि ङए लिलि खल् त्‍हुम्।

मत्ती 25:21

“चए के म्रोंसि क्ल्हेजी चने बिइ, ‘स्‍याबास! क्‍हि छ्याँबै के लब नेरो भर लल् खाँब् तइ! क्हि च्युगुदे सैरै या भर लल् खाँब् तइ। छतसि तारे ङइ ल्‍हें सैमैंए जिम्मा क्हिलाइ पिंब्मुँ। क्हि ह्रोंसए क्ल्हेने बालुन् सैं तोंन्ले टिद्।’

मर्कूस 8:34

झाइले येशूजी खीए चेलामैं नेरो म्हिए हुल खी ङाँर हुइसि बिइ, “खाब् मुँलेया ङने बालु प्रबै सैं मुँ बिस्‍याँ चइ ज्युए म्हाँया आलरिगे बरु क्रूस नोसि ङने बालु प्ररिगे।

लूका 12:37

धिं क्‍ल्‍हे एखमा केब्छैंमैं तयार तसि न्ह क्रों मि क्रोंले टिरिब स्यास्‍याँ क्ल्हे सैं तोंसि केब्छैंमैंइ स्‍याबासि योंब्‍मुँ। क्ह्रोंसेंन ङ क्‍हेमैंने बिमुँ, धिं क्‍ल्‍हेइ ह्रोंसए केब्छैंमैं प्‍ह्रेंमैं धोंले टिबै सै तिमिंसि चबै सैं चल् पिंम्।

लूका 6:46

येशूजी धबै अर्को ताँ बिइ, “ङइ बिबै ताँ आङिंस्‍याँ क्‍हेमैंइ तले ङने ‘ओ प्रभु, प्रभु’ बिमुँ?

लूका 9:23

धै खीजी चमैं ताँन्‍ने बिइ, “खाबै ङए लिलि खबै सैं लस्याँ, चइ ह्रोंसए तोन्‍दोंरि इच्‍छामैं पिवाल् त्‍हुम्, कति दुःख तलेया सैदिसि त्हिंइ ह्रोंसे ङए लिलि प्रल् त्‍हुम्।

यूहन्‍ना 10:27

ङए क्युमैंइ ङए कै थेम्, ङइ चमैंलाइ ङो सेम्। छतसि चमैं ङए लिलि खम्।

यूहन्‍ना 13:16

क्ह्रोंसेंन ङ क्हेमैंने बिमुँ, केब्छैं ह्रोंसए क्ल्हे भन्दा थेब आत, छलेन स्यार्बो चलाइ कुल्मिंबै म्हि भन्दा थेब आत।

यूहन्‍ना 14:15

“क्‍हेमैंइ ङलाइ म्हाँया लम् बिस्याँ ङइ बिबै ताँमैं या ङिंब्‍मुँ।

यूहन्‍ना 14:3

ङ ह्‍यासि क्हेमैंए ल्हागिर क्ल्ह्‍यो तयार लल् खाँबै ‍लिउँइँ ङ धबै युब्मुँ, धै क्हेमैं ङ ङाँर बोयाब्मुँ। झाइले ङ टिबै क्ल्ह्‍योर क्हेमैं या टिल् योंब्मुँ।

यूहन्‍ना 15:20

केब्छैं ह्रोंसए क्ल्हे भन्दा थेब् आत बिसि ङइ क्हेमैंने बिबै ताँ मैंन्। म्हिमैंइ ङ ह्रुगुदिइ बिस्याँ क्हेमैंलाज्यै या ह्रुगुदिब्मुँ। चमैंइ ङए ताँ ङिंइ बिस्याँ क्हेमैंए ताँ या ङिंब्मुँ।

यूहन्‍ना 17:24

“ओ आबा, चु ह्‍युल बनेब् भन्दा ओंसों ओंनोंन् क्हिजी ङलाइ म्हाँया लसि थेबै मान पिंइ। क्हिजी ङने पिंबै म्हिमैं ङए थेबै मान म्रोंबर चमैं ङ टिबै क्ल्ह्‍योरि ङने बालुन् तरिगे बिब ङए सैं मुँ।

यूहन्‍ना 21:22

येशूजी चने बिइ, “ङ आयुन् समा चइ ङ पैंरिगे बिब ङए सैं मुँलेया क्हिलाइ चु ताँ तले चैदिइ? क्हिम् ङए लिलि प्रद्!”

रोमी 1:1

येशू ख्रीष्‍टए के लबर त्हाँबै ङ पावलउँइँले क्हेमैं रोम सहरर्बै बिश्‍वासीमैंलाइ जय मसीह मुँ, सैं तोंबै ताँ बिप्रबै ल्हागिर नेरो कुल्मिंबै चेला चिब तबर परमेश्‍वरजी ङ त्‍हाँब् ग।

रोमी 14:18

खाबइ छले येशू ख्रीष्‍टए सेवा लमुँ, छाबै म्हिने परमेश्‍वर सैं तोंम्, झाइले चइ म्हिमैंउँइँले या स्‍याबासि योंम्।

२ कोरिन्थी 4:5

ङिइ ह्रोंसए ताँ आबि, दिलेया येशूए ल्हागिर ङि क्‍हेमैंए केब्छैंमैं धोंन् तसि येशू ख्रीष्‍टन् प्रभु ग बिबै ताँ ङि बिप्रम्।

२ कोरिन्थी 5:8

ङ्योए सैंर बेल्‍ले भों खम्, धै ङ्यो चु ज्युउँइँले फ्रेसि ङ्यो प्रभुने बालुन् टिबै सैं खम्।

गलाती 1:10

ङइ म्हिमैंउँइँले स्‍याबासि म्‍हैरिइमुँ उ परमेश्‍वरउँइँले स्‍याबासि म्‍हैरिइमुँ? ङइ म्‍हिमैंए सैं तोंन् लल् म्हैरिइमुँ वा? ङइ अझै म्‍हिमैंए सैं तोंन् लल् म्‍हैरिस्‍याँ ङ ख्रीष्‍टए सेवा लल् आखाँमल।

फिलिप्पी 1:23

ङए सैं ङ्हिरि तइमुँ। चु ङ्हिरोबै छ्ह पिसि ख्रीष्‍टने बालु टिब ङए थेबै सैं मुँ, ङए ल्हागिरि च ताँ बेल्‍ले छ्याँब तमल।

कलस्सी 3:24

छ लस्याँ क्‍हेमैंइ योंल् त्हुबै इनाम प्रभुए योउँइँले योंब्मुँ, तलेबिस्याँ क्‍हेमैंइ प्रभु ख्रीष्‍टए सेवा लरिइमुँ।

कलस्सी 4:12

क्‍हेमैं न्‍होंर्बै अर्को येशू ख्रीष्‍टए के लबै म्‍हि इपाफ्रासज्यै या क्‍हेमैंने जय मसीह बिमिंइमुँ। क्‍हेमैंए सैं भोंब् तरिगे, ताँन् सैरि पक्‍का तरिगे, झाइले परमेश्‍वरजी बिब् धोंले क्‍हेमैंइ ताँन् लरिगे बिसि चइ खोंयोंइन क्‍हेमैंए ल्हागिर बेल्‍ले प्राथना लसेन्‍मुँ।

२ पत्रुस 1:1

येशू ख्रीष्‍टए के लबै कुल्मिंबै चेला चिब ङ सिमोन पत्रुसउँइँले क्हेमैंलाइ जय मसीह मुँ। ङ्योए परमेश्‍वर नेरो ङ्योलाइ जोगेमिंबै येशू ख्रीष्‍टजी खाबलाज्यै या आफेलल्‍ले ठिक के लइमुँ। खीजी ङिलाइ पिंब् धोंले क्हेमैंलाज्यै या ठिक बिश्‍वास लल् पिंइमुँ।

१ यूहन्‍ना 5:3

ङ्योइ क्ह्रोसेंन्लेन् परमेश्‍वरलाइ म्हाँया लम् बिस्‍याँ खीजी बिबै ताँमैं ङ्योइ ङिंम्। धै खीए ताँ म्हाँदिबर ङ्योलाइ ल्‍हें गारो आरे।

यहूदाइ प्‍ह्रिबै प्ह्रिछ्या 1:1

येशू ख्रीष्‍टए के लबै म्हि ङ याकूबए अलि यहूदाउँइँले परमेश्‍वरजी खोसि त्‍हाँबै म्‍हिमैंलाइ जय मसीह मुँ। परमेश्‍वर आबाजी क्हेमैंलाइ म्हाँया लइमुँ, धै येशू ख्रीष्‍टजी क्हेमैंलाइ रक्षा लथेंइमुँ।

दर्शन 14:4

चुमैं च्हमिरिमैंने आन्‍होंल्‍ले टिब्‍मैं ग। क्‍यु च्हज खनि खनि ह्‍यामुँ, चुमैं या खीए लिलिन् ह्‍यामल। चुमैं परमेश्‍वर नेरो क्‍यु च्हजए ल्हागिर म्हिमैंए न्होंउँइँले खासि ओंसोंबै रोए फुइ धोंले त्हाँब्मैं ग।