यूहन्‍ना 10:28 - परमेश्‍वरए ताँ तमु क्युइर

²⁸ ङइ चमैंलाइ खोंयोंइ आखाँबै छ्ह पिंमुँ, झाइले चमैं खोंयोंइ या नास आत। धै ङए योउँइँले खाबज्यै चमैं प्हेंसि बोल् खाँरिब् आरे।

यूहन्‍ना 10:28 ပူးပေါင်းရင်းမြစ်များ

भजनमैं 31:5

ङए छ्ह क्हिए योर्न पिंमुँ; ओ क्ह्रोंसेंन्बै याहवेह परमेश्‍वर, ङलाइ दु:खउँइँले फ्रेमिंबमुँ।

भजनमैं 37:28

तलेबिस्याँ ठिक निसाफ लबै म्हिमैंलाइ याहवेहजी खोम्; खीए म्हिमैं खीजी पिरिब् आरे। चमैंलाइ खोंयोंन् बिलै खीजी जोगेसि थेंमुँ, दिलेया दुष्‍ट म्हिमैंए सन्तान बिस्याँ नास लवाब्मुँ।

हितोपदेश 24:16

तलेबिस्याँ ठिक के लबै म्हि ङिखे समा क्हुरियालेया धबै रेम्, दुष्‍ट म्हिमैं बिस्याँ थेबै दु:ख तसि नास तब्मुँ।

हितोपदेश 4:18

दिलेया ठिक के लप्रबै म्हि प्रबै घ्याँ चारबै ह्‍वे धोंन् तम्, च ह्‍वे त्हिंयाँ आधा समा बेल्‍ले चारदै ह्‍याम्।

मर्कूस 13:22

तलेबिस्याँ ‘परमेश्‍वरजी कुल्‍मिंबै म्रुँ ङन् ग’ बिब्‍मैं नेरो ‘अगमबक्‍ता ङन् ग’ बिसि स्‍योर तेब्मैं ल्‍हें त्‍होंब्‍मुँ। परमेश्‍वरजी त्‍हाँबै म्‍हिमैंलाइ खाँन् समा लुबै ल्हागिर स्योलिबै ताँ बिब्मैंइ औदिबै चिनुमैं नेरो केमैं लब्‍मुँ।

लूका 23:46

झाइले येशूजी थेबै कैले बिइ, “ओ आबा, ङए प्ल्ह ङइ क्‍हिए योर्न थेंमुँ।” च्हौ बिसि येशूजी खीए सो पिवाइ।

यूहन्‍ना 10:29

तलेबिस्याँ ङए आबाजी चमैं ङलाइ पिंइँमुँ, खी ताँन् भन्दा थेब मुँ। छतसि ङए आबाए योउँइँले खाब‍ज्‍यै चमैं प्हेंसि बोल् खाँरिब् आरे।

यूहन्‍ना 11:25

येशूजी चने बिइ, “सियाब्‍मैं सोगों लमिंब नेरो खोंयोंइ आखाँबै छ्ह पिंब ङन् ग। ङए फिर बिश्‍वास लब्‍मैं सिलेया सोगों तब्‍मुँ।

यूहन्‍ना 14:19

तारे तिस्‍याँदे लिउँइँ ह्‍युलर्बै म्हिमैंइ ङ म्रोंरिब् आरे। दिलेया क्हेमैंइ बिस्याँ ङ म्रोंब्मुँ। ङ सोगों तबइले क्हेमैं या सोगों तरिब्मुँ।

यूहन्‍ना 17:2

खीने पिंबै ताँन् म्हिमैंलाइ खीजी खोंयोंइ आखाँबै छ्ह पिंरिगे बिसि क्‍हिजी खीलाइ ताँन् म्हिमैंए फिर हग पिंइँमुँ।

यूहन्‍ना 18:9

“क्हिजी ङलाइ पिंब्मैं न्होंरि घ्रि या म्हल् आपिं” बिसि खीजी बिबै ताँ पूरा तबै ल्हागिर छ तब् ग।

यूहन्‍ना 3:36

परमेश्‍वरए च्‍हए फिर बिश्‍वास लब्मैंने खोंयोंइ आनुबै छ्‍ह मुँ। परमेश्‍वरए च्हइ बिबै ताँ आङिंब्मैंइ खोंयोंइ आनुबै छ्‍ह योंल् आखाँ, दिलेया परमेश्‍वरए दण्ड खोंयोंइ बिलै चए फिर तरिम्।”

यूहन्‍ना 4:14

दिलेया ङइ पिंबै क्‍यु थुँब्मैं खोंयोंइ क्‍यु पिरिब् आरे। तलेबिस्याँ ङइ पिंबै क्‍यु चए न्‍होंर खोंयोंइ आखाँबै छ्ह योंबै ल्हागिरि प्योरिबै मुल तब्मुँ।”

यूहन्‍ना 5:24

“क्ह्रोंसेंन ङ क्हेमैंने बिमुँ, खाबइ ङए ताँ थेसि ङ कुल्मिंबै आबाए फिर बिश्‍वास लमुँ, चइ खोंयोंइ आनुबै छ्ह योंम्। चए निसाफ आत, चइ सजैं योंल् आत्हु, बरु च म्हि सिबउँइँले धबै सोसि खोंयोंइ आखाँबै छ्ह योंइमुँ।

यूहन्‍ना 6:27

नास तयाबै चबै सैए ल्हागिर दुःख आलद्, बरु खोंयोंइ बिलै सोरिल् योंबै चबै सैए ल्हागिर दुःख लद्। चु खोंयोंन् बिलै सोल् योंबै क्हें म्हिए च्ह ङइ क्हेमैंलाइ पिंब्मुँ, तलेबिस्याँ क्हेमैं खोंयोंन् बिलै सोरिगे बिसि परमेश्‍वर आबाजी ङलाइ त्हाँसि कुल्मिंब् ग।”

यूहन्‍ना 6:37

ङए आबाजी ङने पिंब्‍मैं ताँन् ङ ङाँर खब्‍मुँ, धै ङ ङाँर खब्‍मैंलाइ ङइ खैलसे या पिरिब् आरे।

यूहन्‍ना 6:47

क्ह्रोंसेंन ङ क्हेमैंने बिमुँ, ङए फिर बिश्‍वास लब्मैंने खोंयोंइ आखाँबै छ्‍ह मुँ।

यूहन्‍ना 6:68

सिमोन पत्रुसइ बिइ, “ओ प्रभु, क्हिनेन् खोंयोंइ आखाँबै छ्ह पिंबै ताँमैं मुँ। ङि खाबै ङाँर ह्‍याब?

चेला चिब्मैंए केमैं 7:59

चमैंइ युँमाइ ल्हिरिमा स्तिफनसइ बिइ, “ओ प्रभु येशू, ङए प्ल्ह क्हिजी किंनु।”

रोमी 5:17

म्‍हि घ्रिए पापइ लमा ताँन् म्‍हिमैं सिल त्हुइ बिस्याँ, झन ल्हें परमेश्‍वरए दयाम्हाँया नेरो येशू ख्रीष्‍टए छ्याँबै केउँइँले आशिक छलेन् योंबै म्हिमैंइ येशू ख्रीष्‍टउँइँले खोंयोंइ आखाँबै छ्ह योंब्‍मुँ।

रोमी 5:2

खीए फिर बिश्‍वास लबइले ङ्योइ खीए दयाम्हाँया योंइमुँ। परमेश्‍वरए दयाम्हाँया तोगो ङ्योइ योंइमुँ, छतसि ङ्योइ परमेश्‍वरए चारबै ह्‍वे योंम् बिबै आशा थेंसि ङ्यो सैं तोंम्।

रोमी 5:21

पापइ लमा खैले म्हिमैं सिल् त्हुइ, छलेन परमेश्‍वरए दयाम्हाँयाजी लमा खीजी ङ्योलाइ ठिक ठर्दिमिंइमुँ, धै प्रभु येशू ख्रीष्‍टउँइँले ङ्योइ खोंयोंइ आखाँबै छ्ह योंइमुँ।

रोमी 5:9

छतसि ङ्योए पापए ल्हागिर येशू ख्रो तसि सिमिंबइले ङ्यो परमेश्‍वरए उँइँर ठिक ठर्दिइमुँ। छतसि परमेश्‍वरए ह्रिसउँइँले येशूजी ङ्योलाइ जोगेमिंब्मुँ।

रोमी 6:23

तलेबिस्याँ पाप लब्मैंइ योंबै नों सिब ग! दिलेया परमेश्‍वरजी छलेन् पिंबै दान ङ्योए प्रभु येशू ख्रीष्‍टउँइँले खोंयोंइ आखाँबै छ्ह योंब् ग।

रोमी 8:1

छतसि ख्रीष्‍ट येशूए फिर बिश्‍वास लब्‍मैंए ल्हागिर दण्ड आरे।

रोमी 8:29

तलेबिस्याँ खीए च्‍ह येशू ल्हें अलि-अङाँमैं न्‍होंर्बै च्ह थेब तरिगे बिसि खीजी ओंसोंन् ङो सेबै म्‍हिमैंलाइ ह्रोंसए च्‍ह-च्हमिमैं लबै ल्हागिर त्हाँइ।

फिलिप्पी 1:6

परमेश्‍वरजी क्हेमैंए न्होंरि छ्याँबै के तों लइ, खीजीन् येशू ख्रीष्‍ट युबै त्हिंइ समा च के नुमिंब्मुँ बिसि ङइ बिश्‍वास लइमुँ।

२ थेसलोनिकी 2:13

प्रभुजी खोबै अलि-अङाँमैं, क्‍हेमैंए ल्हागिर ङिइ खोंयोंन् बिलै परमेश्‍वरलाइ धन्‍यबाद पिंल् त्हुम्, तलेबिस्याँ परमेश्‍वरए प्ल्हजी क्हेमैंलाइ पबित्र लमिंबै केउँइँले नेरो क्हेमैंइ क्ह्रोंसेंन्बै ताँ क्वेंबइले परमेश्‍वरजी क्‍हेमैंलाइ जोगेबर त्हाँइ।

१ तिमोथी 1:16

धै पापिमैं न्होंरि ताँन् भन्दा ल्हें पाप लबै म्‍हि ङ मुँनबिलेया खीए फिर बिश्‍वास लसि खोंयोंइ आखाँबै छ्ह योंब्‍मैं ताँनए ल्हागिर ङ नमुना तरिगे बिसि येशू ख्रीष्‍टए सैदिबै शक्‍ति ङउँइँले म्हिमैंइ म्रोंरिगे बिसि परमेश्‍वरजी ङए फिर ल्हयो लइ।

२ तिमोथी 1:12

छतसि तोगो ङइ चु दुःखमैं नोरिइमुँ, दिलेया ङ फापिसि सैं च्योंब् आल। तलेबिस्याँ ङइ खाबै फिर बिश्‍वास लइमुँ बिब ङइ सेइमुँ, ङलाइ ढुक्‍का मुँ तो सैमैं ङइ खीने थेंल् पिंइमुँ, च सैमैं खीजी छेनाले थेंमिंम्।

हिब्रू 7:25

छतसि खीउँइँले परमेश्‍वर ङाँर ह्‍याब्‍मैंलाइ येशूजी खोंयोंइन जोगेमिंल् खाँम्, तलेबिस्याँ चमैंए ल्हागिर परमेश्‍वरने प्राथना लबर खी खोंयोंन् बिलै सोगों तरिम्।

१ पत्रुस 1:5

क्‍हेमैंइ परमेश्‍वर फिर बिश्‍वास लइ। छतसि खीए शक्‍तिउँइँले क्‍हेमैंइ चु आशिक योंबै ल्हागिर खीजी क्हेमैंलाइ जोगेसि थेंइमुँ। च आशिक चु ह्‍युल नुयाबै त्हिंइर खीजी उँइँमिंब्‍मुँ।

१ यूहन्‍ना 1:2

खी चु ह्‍युलर मुँमा ङिइ खीलाइ म्रोंल, छतसि खीए बारेर ङिइ ग्वाइ पिंम्। च खोंयोंइ आखाँबै छ्ह ओंसों ओंनोंन् परमेश्‍वर आबाने मुँल, धै तिंजोरो ङ्यो ङाँर म्रोंयुइ बिसि ङिइ क्हेमैंने बिम्।

१ यूहन्‍ना 2:19

च म्हिमैं ङ्योए संगतिउँइँले त्‍होंइ ह्‍याइ, तलेबिस्याँ चमैं ङ्योल आङिंल। चमैं ङ्योल ङिंस्‍याँम् ङ्योनेन् टिमल। दिलेया चमैं ताँन् ङ्योल आङिं बिसि उँइँबर चमैं त्होंसि ह्‍याब् ग।

१ यूहन्‍ना 2:25

धै ख्रीष्‍टजी ङ्योने बाछा फैसि पिंम् बिबै सै खोंयोंइ आखाँबै छ्ह ग!

१ यूहन्‍ना 5:11

परमेश्‍वरजी पिंबै ग्वाइ चुन् ग: खीजी ङ्योलाइ खोंयोंइ आखाँबै छ्ह पिंइमुँ, धै च छ्ह खीए च्‍हउँइँले ङ्योइ योंम्।

यहूदाइ प्‍ह्रिबै प्ह्रिछ्या 1:1

येशू ख्रीष्‍टए के लबै म्हि ङ याकूबए अलि यहूदाउँइँले परमेश्‍वरजी खोसि त्‍हाँबै म्‍हिमैंलाइ जय मसीह मुँ। परमेश्‍वर आबाजी क्हेमैंलाइ म्हाँया लइमुँ, धै येशू ख्रीष्‍टजी क्हेमैंलाइ रक्षा लथेंइमुँ।

यहूदाइ प्‍ह्रिबै प्ह्रिछ्या 1:21

धै खोंयोंइ आखाँबै छ्ह योंबै ल्हागिर ङ्योए प्रभु येशू ख्रीष्‍टजी लबै ल्हयो ह्रेरिमा क्हेमैं परमेश्‍वरए म्हाँयार टिरिद्।

यहूदाइ प्‍ह्रिबै प्ह्रिछ्या 1:24

क्‍हेमैंलाइ पापर च्होवाबै सैउँइँले परमेश्‍वरजी जोगेल् खाँम्, धै तोइ छ्याब् आरेब् लमिंसि परमेश्‍वरए उँइँर सैं तोंन्ले टिल् योंब लमिंल् खाँम्।