चेला चिब्मैंए केमैं 2:39 - परमेश्‍वरए ताँ तमु क्युइर

³⁹ परमेश्‍वरजी ‘पबित्र प्ल्ह पिंब्मुँ’ बिसि फैबै बाछा क्हेमैंए ल्हागिरि, क्हेमैंए सन्तानए ल्हागिरि, नेरो अरू ह्रें-ह्रेंगो मुँबै अरू ह्रेंर्बै म्हिमैंए ल्हागिरि ग। ङ्योए प्रभु परमेश्‍वरजी हुइब्मैं ताँनए ल्हागिर च बाछा फैइमुँ।”

चेला चिब्मैंए केमैं 2:39 ပူးပေါင်းရင်းမြစ်များ

चेला चिब्मैंए केमैं 10:45

अरू ह्रेंमैंए फिरै या पबित्र प्ल्ह युब् म्रोंसि पत्रुसने बालु खबै प्रभुए फिर बिश्‍वास लबै यहूदीमैं बेल्‍ले प्लेटोयाइ।

चेला चिब्मैंए केमैं 14:27

झाइले चमैं एन्‍टिओखियार फेखसि चर्चर्बै म्हिमैं खागु लसि परमेश्‍वरजी खेंमैंउँइँले लबै ताँन् केमैं सुनेइ, धै परमेश्‍वरजी खैले अरू ह्रेंमैंए ल्हागिर प्रभुए फिर बिश्‍वास लबै म्रा थोंमिंइ बिबै ताँ या बिइ।

चेला चिब्मैंए केमैं 15:14

परमेश्‍वरजी अरू ह्रेंमैंए फिर ल्हयो खसि ह्रें घ्रि त्हाँसि आशिक पिंइ बिबै ताँ सिमोन पत्रुसइ भर्खर बिमिंइ।

चेला चिब्मैंए केमैं 15:3

छतमा चर्चर्बै म्हिमैंइ चमैं छाइले बिदा लसि कुल्मिंइ। चमैं फोनिके नेरो सामरिया ह्‍युल तसि ह्‍यामा अरू ह्रेंमैंज्यै या येशूए फिर बिश्‍वास लबै ताँ चमैंने छेनाले बिमिंइ। चु ताँ थेसि चर्बै ताँन् अलि-अङाँमैं बेल्‍ले सैं तोंइ।

चेला चिब्मैंए केमैं 15:8

खोंर्बै ताँ सेबै परमेश्‍वरजी ङ्योलाइ पबित्र प्ल्ह पिंब् धोंलेन् अरू ह्रेंर्बै म्हिमैंलाज्यै या पबित्र प्ल्ह पिंसि चमैं खीए म्हिमैं तल् पिंइमुँ बिबै ताँ ङ्योने उँइँमिंइ।

रोमी 11:29

तलेबिस्याँ परमेश्‍वरजी खीजी त्‍हाँबै म्हिमैंलाइ युगुर्ले आत्‍याग्‍दि, धै खीजी पिंबै आशिकमैं या आप्हें।

रोमी 8:30

छतसि परमेश्‍वरजी ओंसोंन् त्हाँब्‍मैं हुइइ, धै हुइब्‍मैंलाइ ह्रोंसए उँइँरि ठिक ठर्दिइ, ठिक ठर्दिब्‍मैंलाइ खीजी थेबै मान या पिंइमुँ।

रोमी 9:24

तलेबिस्याँ खीजी हुइबै म्‍हिमैं ङ्यो ग। खीजी यहूदीमैं मत्‍त्रे हुइब आङिं, अरू ह्रेंमैंलाज्यै या हुइमुँ।

रोमी 9:4

परमेश्‍वरजी चमैंलाइ ह्रोंसए म्‍हिमैं तबै ल्हागिर त्‍हाँइ। खीजी चमैंलाइ ह्रोंसए प्‍हसेमैं लसि खीए औदिबै केमैं उँइँमिंइ। खीजी चमैंए खेमैंने बाछा फैसि ठिम पिंइ, धै खीए सेवा लबै या लोमिंइ, छले खीजी फैबै बाछामैं चमैंइ योंइ।

१ कोरिन्थी 7:14

तलेबिस्याँ बिश्‍वास लबै प्ह्रेंस्योउँइँले बिश्‍वास आलबै प्युँ पबित्र तम्। छलेन अबिश्‍वासी प्ह्रेंस्यो बिश्‍वासी प्‍युँउँइँले पबित्र तम्। च पबित्र आतस्‍याँ क्‍हेमैंए प्‍हसेमैं पबित्र आतमल, छतसि क्ह्रोंसेंन क्‍हेमैंए प्‍हसेमैं या परमेश्‍वरए म्‍हिमैं तसि पबित्र तइमुँ।

एफिसी 1:18

क्‍हेमैंए सैं न्‍होंर्बै मि थोंसि परमेश्‍वरए चारबै ह्‍वे म्रोंरिगे बिसे या ङइ प्राथना लम्। तलेबिस्‍याँ च ह्‍वे म्रोंस्‍याँ क्‍हेमैंइ चु ताँ सों था सेब्‍मुँ: घ्रि, खीजी प्‍हना लिउँइँ क्‍हेमैंलाइ खैबै खालर्बै छार छ्ह पिंम् बिसि क्‍हेमैंइ था सेब्‍मुँ। ङ्हिं, खीए म्‍हिमैंलाइ पिंबै बेल्‍ले छ्याँबै आशिकमैं कति थेब मुँ बिसि क्‍हेमैंइ सेब्‍मुँ।

एफिसी 2:12

च त्हेर क्‍हेमैं ख्रीष्‍टउँइँले ह्रेंगो मुँल, परमेश्‍वरजी त्‍हाँबै ह्रें इस्राएलीमैंने बालु आरेल, छतसि क्‍हेमैं बिदेशिमैं धोंन् तइ टिल, परमेश्‍वरजी खीए म्‍हिमैंने बाछा फैसि पिंम् बिबै आशिकए न्होंर क्हेमैं आरेल, धै चु ह्‍युलर टिमा क्हेमैं परमेश्‍वरलाइ ङो आसेसि आशा आरेल्‍ले टिल।

एफिसी 4:4

ज्यु घ्रिन् मुँ, पबित्र प्ल्ह या घ्रिन् मुँ। च धोंलेन् परमेश्‍वरजी ङ्योलाइ पिंबै आशा या घ्रिन् मुँ।

२ थेसलोनिकी 1:11

छतसि ङ्योए परमेश्‍वरजी क्‍हेमैंलाइ खैबै छ्ह थोबर त्‍हाँइमुँ छाबन् छ्ह थोल् खाँब लमिंरिगे, झाइले क्‍हेमैं ताँनइ छ्याँबै सैंइ बिश्‍वास लसि लल् त्हुबै केमैं खीए शक्‍तिउँइँले छेनाले लल् खाँरिगे बिसि ङिइ क्हेमैंए ल्हागिर खोंयोंइन बिलै प्राथना लरिइमुँ।

२ तिमोथी 1:9

परमेश्‍वरजी ङ्यो जोगेमिंसि खीए म्‍हिमैं लबै ल्हागिर त्‍हाँइ। ङ्योइ छ्याँबै केमैं लमा आङिं, ङ्योए फिर मुँबै खीए दयाम्हाँयाउँइँले परमेश्‍वरजी ङ्यो त्हाँबै सैं खइ। तलेबिस्याँ ह्‍युल बनेब् भन्दा ओंसों ओंनोंन् ख्रीष्‍ट येशूउँइँले खीजी च दयाम्हाँया ङ्योलाइ पिंल।

हिब्रू 3:1

छतसि ओ परमेश्‍वरजी त्‍हाँबै ङिने स्वर्गर्बै हग योंबै अलि अङाँमैं, ङ्योइ बिश्‍वास लबै ङ्योए खेगि क्रथे येशूलाइ मैंन्।

हिब्रू 9:15

छतसि ख्रीष्‍टजी छारा बाछा लमिंबइले परमेश्‍वरजी त्‍हाँबै म्‍हिमैंइ खीजी फैबै बाछार्बै खोंयोंन् बिलै तरिबै आशिक योंल् खाँम्। तलेबिस्याँ ओंसोंबै बाछाए न्‍होंर टिमा चमैंइ पाप लइ, दिलेया चमैंए पापए ल्हागिर ख्रीष्‍ट सिमिंसि चमैंलाइ जोगेमिंइमुँ।

१ पत्रुस 5:10

दयाम्हाँया मुँबै परमेश्‍वरजी क्हेमैंलाइ येशू ख्रीष्‍टने घ्रिन् लमिंइमुँ, धै खीजी योंब् धों तबै खोंयोंइ आनुबै मान ङ्योज्यै या योंरिगे बिसि खीजी ङ्योलाइ त्‍हाँइमुँ। क्‍हेमैंइ तिस्याँदे दुःख योंबै लिउँइँ खीजीन् क्हेमैंलाइ धबै छारा लमिंसि, भोंसि लमिंब्मुँ धै बेल्‍ले शक्‍ति मुँब लमिंब्‍मुँ।

२ पत्रुस 1:10

छतसि ओ ङए अलि-अङाँमैं, परमेश्‍वरजी क्‍हेमैंलाइ त्हाँसि हुइमुँ बिबै ताँ क्ह्रोंसेंन् ग बिसि उँइँबै ल्हागिर क्हेमैं छेनले छ्ह थोद्। छ लस्‍याँ क्‍हेमैं परमेश्‍वरउँइँले खोंयोंइ ह्रेंगो तरिब् आरे।

२ पत्रुस 1:3

परमेश्‍वर बेल्‍ले छ्याँब नेरो थेब मुँ। ङ्योलाइ हुइबै परमेश्‍वरलाइ ङ्योइ ङो सेइमुँ, छतसि खीए सेवा लबर ङ्योए छ्हर चैदिबै तोन्दोंरि सैमैं खीए अचम्मबै शक्‍तिउँइँले खीजी ङ्योलाइ पिंइमुँ।

दर्शन 17:14

चमैंइ क्‍यु च्हजए बिरोधर ल्हडें लब्‍मुँ। दिलेया क्‍यु च्हज नेरो खीजी हुइसि त्‍हाँबै बिश्‍वास लबै म्‍हिमैंइ चमैंलाइ ट्होवाब्‍मुँ, तलेबिस्याँ खी प्रभुमैंए फिर्बै प्रभु नेरो म्रुँमैंए फिर्बै म्रुँ ग।”

दर्शन 19:9

च लिउँइँ स्‍वर्गदूतइ ङने बिइ, “चु ताँ प्‍ह्रिद्: क्‍यु च्हजए ब्ह्‍याए न्हिम्तोर हुइब्मैं ङ्‍हो सब्मैं ग।” स्‍वर्गदूतइ धबै बिइ, “परमेश्‍वरजी बिबै क्ह्रोंसेंन्बै ताँमैं चुमैंन् ग।”