चेला चिब्मैंए केमैं 1:14 - परमेश्‍वरए ताँ तमु क्युइर

¹⁴ कोइ च्हमिरिमैं नेरो येशूए आमा मरियम, येशूए अलिमैंने बालु सैं घ्रि तसि खोंयोंन् बिलै प्राथना लरिमल।

चेला चिब्मैंए केमैं 1:14 ပူးပေါင်းရင်းမြစ်များ

मत्ती 12:46

येशूजी म्‍हिए हुलने चु ताँमैं पोंरिमा खीए आमा नेरो अलिमैं खीने ताँ लदा ङ्हाँसि बैरु रारिल।

मत्ती 21:22

क्हेमैंइ परमेश्‍वरए फिर बिश्‍वास लसि प्राथनानर तो सै ह्रिलेया योंब्‍मुँ।”

मत्ती 27:55

चर ह्रेंगोउँइँले ङ्‌ह्‍योरिबै ल्‍हें च्हमिरिमैं या मुँल। चमैं येशूए सेवा लदै खीए लिलि गालील ह्‍युलउँइँले खल।

मर्कूस 15:40

चर च्हमिरिमैं या ह्रेंगोउँइँले ङ्‌ह्‍योरिल। चमैंए म्‍हाँजोरि मरियम बिबै मग्‍दालाथेंस्‍यो, च्‍योंब याकूब, योसेफए आमा मरियम नेरो सलोमि बिबै च्हमिरि मुँल।

मर्कूस 16:1

प्रिबै त्हिंइ लिउँइँ मग्‍दालाथेंस्‍यो मरियम, याकूबए आमा मरियम नेरो सलोमि बिबै च्हमिरिमैंइ येशूए सिनुर फोब् बिसि लिंबै थाँ खबै छ्युगु किंइ।

लूका 11:13

क्‍हेमैं दुष्‍ट तलेया ह्रोंसए प्हसेमैंलाइ छ्याँबै सैमैं पिंल् ह्रम् बिस्याँ, झन् स्‍वर्गर टिबै क्हेमैंए परमेश्‍वर आबाजी खीने बालु ह्रिब्मैंलाइ कति ल्हें पबित्र प्ल्ह पिंब्‍मुँ।”

लूका 18:1

चेलामैं खोंयोंन् बिलै प्राथना लरिगे धै सैं च्योंब आलरिगे बिबै सैंले येशूजी अहान् घ्रि बिइ।

लूका 23:49

छलेन खीलाइ ङो सेब्मैं नेरो गालील ह्‍युलउँइँले खीए लिलि खबै च्हमिरिमैं ह्रेंगोन् रासि चर तरिबै ताँन् सै ङ्‍ह्‍योरिल।

लूका 23:55

गालील ह्‍युलउँइँले येशूने खबै च्हमिरिमैं योसेफए लिलि ह्‍यासि सिनु थेंबै क्‍ल्‍ह्‍यो ङ्‍ह्‍योइ।

लूका 24:10

च च्हमिरिमैं मग्‍दलाथेंस्‍यो मरियम, योअन्‍ना नेरो याकूबए आमा मरियम बिब् मुँल। चमैंने मुँबै अरू च्हमिरिमैंज्यै या चु ताँ कुल्मिंबै चेला चिब्मैंने बिइ।

लूका 24:33

च त्हेर्न चमैं रेसि यरूशलेमउँइँ एह्‍याइ। धै च्युसे घ्रि कुल्मिंबै चेला चिब्मैं नेरो चमैंने मुँबै अरू म्हिमैंने त्‍होइ।

लूका 24:53

झाइले खोंयोंन् बिलै परमेश्‍वए मिं क्वेदै चमैं यरूशलेमर्बै मन्दिरर्न टिरिमल।

लूका 8:20

छतमा म्‍हि घ्रिइ येशूने बिइ, “क्‍हिए आमा नेरो अलिमैं क्हिने त्होबै सैं लसि बैरु रारिइमुँ।”

चेला चिब्मैंए केमैं 2:1

पेन्‍तिकोसए त्हिंइर खमा, येशूए फिर बिश्‍वास लब्मैं ताँन् क्ल्ह्‍यो घ्रिर खागु तल।

चेला चिब्मैंए केमैं 2:42

चमैं प्रभु येशूए फिर बिश्‍वास लसि कुल्मिंबै चेला चिब्मैंने लोदै, संगति लदै, बालुन् चब् चसि प्रभु भोज चदै, खोंयोंन् बिलै प्राथना लरिमल।

चेला चिब्मैंए केमैं 2:46

चमैं त्हिंइ ह्रोंसे मन्दिरर खागु तमल, धै धिं-धिंर चमैं सैं घ्रिले प्रभु भोज चसि सैं तोंदै बालुन् चब् चब्रें लमल।

चेला चिब्मैंए केमैं 6:4

ङि बिस्याँ खोंयोंन् बिलै प्राथना नेरो परमेश्‍वरए ताँ बिमिंबै केर प्रब्मुँ।”

रोमी 12:12

क्‍हेमैंइ थेंबै आशार सैं तोंन्ले टिरिद्। दुःख तमा सैं भोंब लद्। झाइले खोंयोंन् बिलै प्राथना लरिद्।

१ कोरिन्थी 14:13

छतसि क्होल् आखाँबै क्युइ पोंबै म्‍हिइ च क्युइए अर्थ खोल्‍दिबै बरदान योंबै ल्हागिर प्राथना लरिगे।

एफिसी 6:18

च ताँन् के लमा तोन्‍दोंरि ताँर तो सै चैदिले या प्राथना लदै परमेश्‍वरने ह्रिद्। झाइले ह्रोंसए ल्हागिर मत्‍त्रे आङिं, ताँन् बिश्‍वासीमैंए ल्हागिरै या प्राथना लद्, खोंयोंन् बिलै न्ह क्रों मि क्रोंले चमैंए ल्हागिर प्राथना लरिद्।

कलस्सी 4:2

परमेश्‍वरलाइ धन्‍यवाद पिंसि आनारल्‍ले न्ह क्रो मि क्रोंले खोंयोंइ या प्राथना लरिद्।