२ पत्रुस 3:15 - परमेश्‍वरए ताँ तमु क्युइर

¹⁵ झाइले ङ्योए प्रभुजी म्‍हिमैंए पापमैं सैदिमा ङ्यो जोगेबै मौका पिंइमुँ बिसि सैंर मैंन्। चु ताँ ङ्योए खोबै आघें पावलज्यै या परमेश्‍वरजी पिंबै बुद्धिजी चु ताँमैं खीए प्ह्रिछ्यार क्‍हेमैंए ल्हागिर प्ह्रिइमुँ।

२ पत्रुस 3:15 ပူးပေါင်းရင်းမြစ်များ

प्रस्थान 31:3

ङइ चलाइ परमेश्‍वरए प्ल्हजी प्लिंसि ह्रब सेब नेरो ताँन् खालर्बै के लल् ह्रबै सिप पिंइमुँ।

प्रस्थान 31:6

चलाइ ल्होबर दान कुलर्बै अहीसामाकए च्ह ओहोलीआबलाइया त्हाँइमुँ। धै ङइ क्हिने लद् बिबै तोन्दोंरि सैमैं बनेबर अरू ताँन् के लब्मैंलाइ ङइ सिप पिंइमुँ।

प्रस्थान 35:31

खीजी चलाइ परमेश्‍वरए प्ल्हजी प्लिंमिंइमुँ, धै सिप, ज्ञान बुद्धि, नेरो तोन्दोंरि लल् ह्रब लमिंइमुँ।

प्रस्थान 35:35

चमैंइ ताँन् खालर्बै भाँडार बुट्टा झोंब, मु रङर्बै क्वें, कलेजी रङर्बै क्वें, ओल्ग्या रङर्बै क्वें नेरो छेनाले ख्रिंबै सुतिए क्वें रोसि बुट्टा झोंबै केमैं छेनाले लल् खाँरिगे बिसि खीजी चमैंलाइ सिपमैं पिंइमुँ।”

लूका 21:15

तलेबिस्याँ ङइ क्‍हेमैंलाइ छाबै ज्ञान बुद्धिए ताँ पोंल् पिंब्मुँ, च ताँ पोंमा चमैंइ क्‍हेमैंए ताँए ज्वाफ पिंल् खाँरिब् आरे, क्हेमैंए ताँ थोल् खाँरिब् आरे।

चेला चिब्मैंए केमैं 15:25

छतसि ङि ताँनइ सल्‍ला लसि ङिंए ताँमैं क्हेमैं ङाँर बिमिंबर ङिए न्होंर्बै कोइ म्हिमैं त्हाँसि ङिए खोबै थुमैं बारनाबास नेरो पावलने क्हेमैं ङाँर कुलब छ्याँब ङ्हाँइ।

चेला चिब्मैंए केमैं 7:10

परमेश्‍वरजी चए ताँन् दुःखउँइँले फ्रेमिंसि मिश्र ह्‍युलर्बै फारो म्रुँए उँइँरि चलाइ बुद्धि पिंमा फारोइ चलाइ मिश्र ह्‍युल नेरो ह्रोंसए धिंर्बै ताँन् सैमैंए फिरि क्ल्हे तल् पिंइ।

चेला चिब्मैंए केमैं 9:17

छबिमा हननिया ह्‍यासि शाऊल टिबै धिं न्होंर होंइ। धै चए फिर यो थेंसि बिइ, “ओ अलि शाऊल, क्हि खरिबै घ्याँर क्हि ङाँर म्रोंयुबै येशूजीन् क्हिए मि म्रोंरिगे धै पबित्र प्ल्हजी प्लिंरिगे बिसि ङ कुल्मिंब् ग।”

रोमी 2:4

परमेश्‍वरजी क्हिए फिर ल्हयो खम्, छतसि युनन् सजैं आपिं, बरु ल्हें समा क्हिलाइ सैदिसि म्हाँया लम्। दिलेया क्‍हिइ खीलाइ अझै म्‍हि आल! क्‍हिए सैं खी ङाँइ एरिगे बिसि परमेश्‍वरजी क्हिए फिर ल्हयो लम् बिब क्‍हिइ आसे वा?

१ कोरिन्थी 12:8

पबित्र प्ल्हउँइँले कोइइ ज्ञान-बुद्धि मुँबै ताँ पोंबै भों योंइमुँ, कोइइ परमेश्‍वरए बारेर्बै छ्याँबै ताँमैं पोंबै भों योंइमुँ,

१ कोरिन्थी 2:13

छतसि ङ्योइ बिप्रबै ताँमैं म्‍हिमैंए बुद्धिउँइँले खबै ताँमैं आङिं, पबित्र प्ल्हउँइँले लोमिंबै ताँमैं ग। छतमा पबित्र प्ल्हउँइँले खबै ताँमैंए अर्थ ङ्योइ पबित्र प्ल्ह मुँबै म्हिमैंलाइ क्होमिंम्।

१ कोरिन्थी 3:10

परमेश्‍वरउँइँले योंबै ज्ञान बुद्धिउँइँले ङइ धिं बनेबै सिपालु कर्मिइ धोंले छेनाले तें (जग) झोंइमुँ। च तेंए फिर गारा झोंब्मैं ताँनइ छेनाले च्हैंसि मैंसि परमेश्‍वरउँइँले योंबै भों मुँबै बरदान अनुसार के लसि छेनाले गारा झोंल् त्हुम्।

एफिसी 3:3

परमेश्‍वरजी खीए सैंर्बै लोथेंबै चाँजो ङने बिइमुँ। चु ताँए बारेर ङइ ओंसों या च्युगुदे ताँ प्‍ह्रिल् खाँइमुँ।

१ तिमोथी 1:16

धै पापिमैं न्होंरि ताँन् भन्दा ल्हें पाप लबै म्‍हि ङ मुँनबिलेया खीए फिर बिश्‍वास लसि खोंयोंइ आखाँबै छ्ह योंब्‍मैं ताँनए ल्हागिर ङ नमुना तरिगे बिसि येशू ख्रीष्‍टए सैदिबै शक्‍ति ङउँइँले म्हिमैंइ म्रोंरिगे बिसि परमेश्‍वरजी ङए फिर ल्हयो लइ।

याकूब 1:5

क्‍हेमैंए न्‍होंर खाबलाज्यै बुद्धि चैदिस्याँ ह्रिस आखल्‍ले सैं तों-तोंदै पिंबै परमेश्‍वरने ह्रिरिगे। छले ह्रिस्याँ खीजी पिंब्‍मुँ।

याकूब 3:17

दिलेया परमेश्‍वरजी ह्रब्-सेबै लमिंबै म्‍हिए सैं छ्याँब तम्, धै चइ आक्ह्रिब्मैं क्ह्रिमिंब, आगुए फिर ल्हयो खब, च्हैंसि मैंसि के लब, दयाम्हाँया लब, छ्याँबै केमैं लब, खाबै आफेलल्‍ले क्ह्रोंसेंन्बै ताँ लब तम्।

१ पत्रुस 3:20

चमैं स्‍योंम्‍बै नोआ बिबै म्‍हिए पलोर्बै म्‍हिमैं मुँल। नोआइ क्यु झाज बनेरिमा परमेश्‍वरजी बिबै ताँ चमैंइ ङिंम् उ आङिं बिसि परमेश्‍वरजी पैंरिल। दिलेया क्यु झाजर क्रेबै म्हि प्रे मत्‍त्रे थेबै नाँ बाडिउँइँले जोगेमिंइ, अरू ताँन् सियाइ।

२ पत्रुस 3:2

स्‍योंम्‍बै पबित्र अगमबक्‍तामैंइ पोंबै अगमबाणिए ताँमैं नेरो क्‍हेमैं ङाँर खबै कुल्मिंबै चेला चिब्मैंइ बिबै ताँमैं क्हेमैंइ मैंरिगे बिब ङए सैं मुँ।

२ पत्रुस 3:9

को-कोइए सैंर “प्रभु युबर क्‍हैल् लइ,” ङ्हाँलेया प्रभुजी खीजी फैबै बाछा पूरा लबर क्हैल् आल। खाबै या नास आतरिगे बरु ह्रोंसए पापउँइँले सैं एसि खिउँइँ तोरिगे बिसि प्रभुजी क्हेमैंलाइ सैदिसि पैंरिइमुँ।