२ कोरिन्थी 8:10 - परमेश्‍वरए ताँ तमु क्युइर

¹⁰ क्हेमैंइ तुग्युमसेरो भेटि पिंबै के तों मत्‍त्रे आल, दिलेया ओंसों ओंनोंन् चु के लबै सैं क्हेमैंल मुँल। छतसि तारे चु के पूरा लस्याँ क्हेमैंए ल्हागिर छ्याँब तमुँ बिसि ङइ चु केर सल्‍ला पिंम्।

२ कोरिन्थी 8:10 ပူးပေါင်းရင်းမြစ်များ

हितोपदेश 19:17

आयो-आख्युब्मैंलाइ पिंब याहवेहलाइ खि पिंब् ग, धै खाबइ तो लइमुँ चए इनाम खीजी पिंब्मुँ।

मत्ती 10:42

‘चु म्‍हि येशूए म्‍हि ग,’ बिसि खाबज्यै ङए धाँसे च्‍योंबै चेलालाइ गिलाँस घ्रि ङ्युँबै क्‍यु मत्‍त्रे पिंनाबिले या चइ योंल् त्हुबै इनाम योंब्‍मुँ।”

यूहन्‍ना 11:50

“ताँन् ह्‍युलर्बै म्हिमैं नास तब् भन्दा बरु चमैंए ल्हागिर म्हि घ्रि सिबन् छ्याँब् तम् बिब क्हेमैंइ आक्हो वा?”

यूहन्‍ना 16:7

छान् तलेया ङइ क्हेमैंने क्ह्रोंसेंन्बै ताँ बिमुँ, ङ छुइले ह्‍याबन् क्हेमैंए ल्हागिर छ्याँब् तम्। तलेबिस्याँ ङ आह्‍याइ बिस्याँ ल्होमिंबै पबित्र प्ल्ह क्हेमैं ङाँर युरिब् आरे। ङ ह्‍याइ बिस्याँ पबित्र प्ल्ह क्हेमैं ङाँर कुल्मिंब्मुँ।

यूहन्‍ना 18:14

“ताँन् ह्रेंर्बै म्हिमैंए ल्हागिर म्हि घ्रि सिबन् छ्याँब तम् बिसि कैयाफाइ ओंसोंन् यहूदी चिब्मैंने बिल।”

१ कोरिन्थी 10:23

“क्हेमैंइ तो ललेन् तम्,” बिम्। दिलेया ताँन् सैइ क्हेमैंए फायदा आत। क्हेमैंइ “ताँन् सै छ्याँब मुँ बिमुँ,” दिलेया कति सैम् आछ्याँबै तम्।

१ कोरिन्थी 16:2

सद् ह्रोंसे क्हेमैं ताँनइ ह्रों‍-ह्रोंसए कमैं अनुसार मुइ स्यो थेंन्। छ लस्याँ ङ खबै त्हेर मुइ स्योरिल् आत्‍हु।

१ कोरिन्थी 6:12

खाबज्‍यै या “ताँन् सै ङए ल्हागिर ठिक मुँ” ङ्हाँलै, दिलेया ताँन् सै केर फेब् आरे। छलेन ङज्यै या “ताँन् सै ङए ल्हागिर ठिक मुँ” बिल् खाँम्, दिलेया ङ तोइ सैए न्होंर टिरिब् आरे।

१ कोरिन्थी 7:25

तारे कन्‍येमैंए बारेर प्रभु येशूउँइँले बिल् त्‍हुबै ताँ ङने तोइ आरे। दिलेया प्रभु येशूउँइँले दयाम्हाँया योंसि ङ म्हिमैंइ क्वेंल् खाँबै म्हि तबइले ङइ क्‍हेमैंलाइ सल्‍ला पिंम्।

१ कोरिन्थी 7:40

दिलेया चइ ब्ह्‍या आलल्‍ले टिम् बिस्याँ झन् छ्याँब तम्। चु ङए सैंर्बै ताँ ग, ङने या परमेश्‍वरए प्ल्ह मुँ बिब ङइ मैंमुँ।

२ कोरिन्थी 12:1

खाबलाइ तोइ फायदा आतलेया ङइ ङ्‍हो लोंबै के लल् त्‍हुम्। तोगो ङइ प्रभुउँइँले योंबै दर्शनमैं नेरो क्होसे क्होल् आखाँबै ताँमैंए बारेर बिरिइमुँ।

२ कोरिन्थी 8:6

छतसि चु भेटि रेबै केर तीतसइ क्हेमैंलाइ ल्होरिगे धै क्हेमैंज्यै च छ्याँबै के पूरा लल् खाँरिगे बिसि ङइ चने यो छ्युँ लइमुँ। तलेबिस्याँ ओंसों ओंनोंन् तीतसइ छाबै के लसेन्मुँ।

२ कोरिन्थी 8:8

ङइ क्‍हेमैंलाइ हुकुम पिंसि बिब आङिं, दिलेया अरूमैंइ भों खल्‍ले छ्याँबै के लब् म्रोंसि क्‍हेमैंए म्हाँया क्‍ह्रोंसेंन ङिंब् उ आङिं बिसि जाँच लबर ग।

२ कोरिन्थी 9:2

तलेबिस्याँ क्‍हेमैंइ पिंबै सैं मुँ बिब ङइ सेइमुँ। छतसि ङइ माकेडोनिया ह्‍युलर्बै म्‍हिमैंने क्‍हेमैंए बारेर छ्याँबै बयन लसि छ बिइ, “अखैया ह्‍युलर्बै अलिमैं तुग्‍युम् ओंनोंन् भेटि रेसि ल्होबर तयार तइमुँ।” आगुलाइ ल्होबै ल्हागिर क्‍हेमैंइ सैं थेब् लब् म्रोंसि म्‍हिमैं या छाबन् के लबर भों खइमुँ।

फिलिप्पी 4:17

ङइ क्हेमैंउँइँले भेटि म्‍हैब आङिं, क्‍हेमैंइ ङलाइ ल्होमिंबइले क्हेमैंइ ल्हें आशिक योंरिगे बिब ङए सैं मुँ।

हिब्रू 13:16

घ्रिइ घ्रिने छ्याँबै के लब नेरो ह्रोंसने मुँबै सै फा-फु चुब आम्‍लेद्, तलेबिस्याँ छाबै ख्रोमैं म्रोंसि परमेश्‍वर सैं तोंम्।