२ कोरिन्थी 12:11 - परमेश्‍वरए ताँ तमु क्युइर

¹¹ ङलाइ बुद्धि आरेबै म्हि तबर क्‍हेमैंन कर ल्‍हैदिइ। क्‍हेमैंइ अरूमैंए छ्याँबै बयन लसि चमैंलाइन “बेल्‍ले छ्याँबै कुल्मिंबै चेला चिब्मैं” बिमुँ, चमैंए उँइँरम् क्‍हेमैंइ ङए बारेर छ्याँबै बयन लल् त्‍हुमल। तलेबिस्याँ ङ तोइ आङिंलेया चमैं भन्दा ङ तोरै च्‍योंब् आरे।

२ कोरिन्थी 12:11 ပူးပေါင်းရင်းမြစ်များ

हितोपदेश 27:2

ह्रोंसन् थेब् प्हैंसि आपोंन्, आगुइन क्हिलाइ थेब् लरिगे; आगुइन क्हिए छ्याँबै बयन लरिगे।

लूका 17:10

छलेन क्‍हेमैंज्यै या ह्रोंसने ल्‍हैदिबै ताँन् केमैं लल् खाँसि ‘ङि केर आफेबै केब्छैं ग, ङिइ ललन् त्हुबै के मत्‍त्रे लइमुँ।’ बिद्।”

१ कोरिन्थी 13:2

छलेन ङइ अगमबाणि पोंबै भों योंलेया, क्होल् आखाँबै ताँमैं क्होल् खाँलेया, तोन्दोंरि सैर ह्रब-सेब तलेया, झाइले कोंमैं स्‍योवाल् खाँबै बिश्‍वास ङने मुँलेया ङइ अरूए फिर म्हाँया आलस्‍याँ ङ तोइ सैरै या केर आफेबै म्हि तम्।

१ कोरिन्थी 3:22

पावल, अपोल्‍लस, पत्रुस, चु ह्‍युल, तिंजोरोबै सैमैं, प्‍हँना लिउँइँबै सैमैं, क्हेमैं सोलेया, सिलेया — ताँन् क्‍हेमैंलन् ग।

२ कोरिन्थी 1:6

परमेश्‍वरजी क्हेमैंलाइ जोगेमिंसि ल्होमिंरिगे बिसि ङिइ दुःख नोसिन् मुँ। धै परमेश्‍वरजी ङिए दुःखर ल्होमिंब् धोंले खीजी क्हेमैंलाज्यै या ल्होमिंब्मुँ, झाइले ङिइ नोब् धों तबै दुःख क्हेमैंज्यै या नोस्याँ क्‍हेमैंइ सैदिबै भों योंम्।

२ कोरिन्थी 11:1

ङ तोइ बुद्धि आरेबै म्हि धों तलेया क्‍हेमैंइ सैदिल् खाँस्‍याँ छ्याँब तमल बिब ङए सैं मुँ। गार आम्हाँदिल्‍ले ङए ताँ थेमिंन् ओ!

२ कोरिन्थी 11:5

दिलेया “ङि कुल्मिंबै चेला चिब्मैं ग” बिसि थेब् प्हैंसि पोंब्मैं भन्दा ङ तोइ सैरै या च्योंरि आरे।

२ कोरिन्थी 12:12

“ङ क्‍ह्रोंसेंन कुल्मिंबै चेला चिब ग” बिसि उँइँबर ङइ सैदिल् त्हुबै सैमैं तोन्दोंरि सैदिसि क्‍हेमैंए उँइँर ङइ औदिबै चिनु मुँबै केमैं लल।

२ कोरिन्थी 12:6

ङइ प्हैंबै सैं ललेया ङ बुद्धि आरेब् धों आत, तलेबिस्याँ ङइ क्ह्रोंसेंन्बै ताँ मत्‍त्रे पोंमल। दिलेया छाबै ताँर ङ थेब् प्‍हैंदा आङ्हाँ। तलेबिस्याँ म्‍हिमैंइ ङइ तो लब म्रोंइमुँ, ङउँइँले तो ताँ थेइमुँ, च भन्दा बडि चमैंइ ङलाइ आमैंरिगे बिब ङए सैं मुँ।

२ कोरिन्थी 3:1

ङिइ ह्रोंसए बयन लइमुँ वा? ङिइ “छ्याँबै के लइमुँ” बिसि अरूमैंइ धोंले प्ह्रिछ्या प्ह्रिसिन् ङिइ क्‍हेमैंलाइ उँइँल् त्‍हुम्‌ रो वा? छलेन क्‍हेमैंज्यै अरूमैंलाइ छाबै प्ह्रिछ्या प्ह्रिसिन् उँइँल् त्‍हुम्मा?

२ कोरिन्थी 5:13

“ङिए सैं क्ल्ह्‍योर आरे,” बिसि म्हिमैंइ मैंस्याँ च परमेश्‍वरए ल्हागिर्न ग। ङिए सैं क्ल्ह्‍योर मुँस्‍याँ, च क्‍हेमैं छ्याँब् तबै ल्हागिर्न ग।

गलाती 6:3

तलेबिस्याँ तोइ आह्रबै म्हिइ “ङ थेबै म्हि ग” बिसि ह्रब् प्हैंस्याँ चइ ह्रोंसलाइन धोका पिंम्।

एफिसी 3:8

ङ परमेश्‍वरए म्‍हिमैं न्‍होंरि ताँन् भन्दा च्‍योंब मुँनबिलेया ख्रीष्‍टने घ्रिन् तसि खोंयोंइ आखाँबै सै न्होरए बारेर अरू ह्रेंमैंने बिप्रबै मौका ङलाइ पिंइ।