२ कोरिन्थी 11:13 - परमेश्‍वरए ताँ तमु क्युइर

¹³ तलेबिस्याँ छाबै म्‍हिमैं क्‍ह्रोंसेंन्‍बै कुल्मिंबै चेला चिब्मैं आङिं, दिलेया “ङि येशू ख्रीष्‍टए क्‍ह्रोंसेंन्‍बै कुल्मिंबै चेला चिब्मैं ग” बिसि स्योर तेसि लुप्रब्मैं मत्‍त्रे ग।

२ कोरिन्थी 11:13 ပူးပေါင်းရင်းမြစ်များ

मत्ती 25:24

“च लिउँइँ माराए सिक्‍का घ्रि योंबै केब्छैं क्ल्हे ङाँर खसि बिइ, ‘चिब! क्‍हि आरुँइँबै क्ल्ह्‍योउँइँले खैंमुँ, आटाबै क्ल्ह्‍योउँइँले खुमुँ, धै सारो सैं प्ह्‍याबै म्हि मुँ बिसि ङइ सेल।

चेला चिब्मैंए केमैं 15:1

छले एन्टिओखियार टिरिमा यहूदीया ह्‍युलउँइँले को-कोइ म्हिमैं चर युसि येशूए फिर बिश्‍वासीमैंने, “मोशाए ठिमर प्ह्रिब् धोंले क्हमैंलाइ ज्युर चिनु आललै बिस्याँ क्हेमैंइ खोंयोंन् बिलै आखाँबै छ्ह योंल् आखाँ,” बिसि लोमिंबर होंइ।

चेला चिब्मैंए केमैं 15:24

ङिए न्होंर्बै को-कोइ म्हिमैं चर ह्‍यासि स्योलिबै ताँमैं क्हेमैंलाइ लोमिंसि क्हेमैंए सैं ङ्हिरि लवासि दुःख पिंइ बिब ङिइ थेइमुँ। च म्हिमैं ङिंइ कुलब आङिं।

चेला चिब्मैंए केमैं 20:30

क्‍हेमैंए न्होंउँइँलेन् स्‍योर ताँमैं पोंबै म्हिमैं रेसि चेलामैं चमैंए लिलि बोयाब्मुँ।

रोमी 16:18

तलेबिस्याँ छाबै म्‍हिमैंइ ङ्योए प्रभु येशू ख्रीष्‍टए ल्हागिर आङिं, दिलेया ह्रोंसए फोए ल्हागिर सेवा लम्। चमैंइ ननाओलिबै छ्याँबै ताँमैं पोंसि सोजो म्‍हिमैं धोका पिंम्।

२ कोरिन्थी 11:15

छतसि दुष्‍टए सेवा लब्मैं परमेश्‍वरए सेवा लब्मैं धोंले प्रलेया औदिबै ताँ आङिं। चमैंइ लबै केए नों लिउँइँ योंब्‍मुँ।

२ कोरिन्थी 2:17

ल्हें म्हिइ धोंले परमेश्‍वरए ताँ छों लब्मैं ङि आङिं, तलेबिस्याँ ङिलाइमि परमेश्‍वरजीन् कुल्‍मिंब् ग। छतसि ङि ख्रीष्‍टए सेवा लसि खीए ओंसों स्योर ताँ आकोंल्‍ले परमेश्‍वरए ताँ पोंमुँ।

२ कोरिन्थी 4:2

छलु-म्हिलु नेरो फा पिन् तबै केमैं ङिइ पिवाइमुँ। छलेन ङिइ परमेश्‍वरए ताँमैं म्हिमैंने बिप्रमा स्योलिबै ताँमैं कोंसि आबि। बरु म्हिमैंलाइ क्ह्रोंसेंन्बै ताँ उँइँमिंसि परमेश्‍वर नेरो म्हिमैंए उँइँर ह्रोंसलाइ ठिक ठर्दिबै केमैं ङि लम्।

गलाती 1:7

क्‍ह्रोंसेंन येशू ख्रीष्‍टउँइँले खबै सैं तोंबै ताँ बाहेक अर्को सैं तोंबै ताँ आरे। ख्रीष्‍टउँइले खबै सैं तोंबै ताँलाइ तो धोंइ आङ्हाँन्ले खेंमैंए सैंर्बै ताँ पोंब्मैं को-कोइ मुँ। चमैंइ क्हेमैंए सैं ङ्हिंरि लवाइमुँ।

गलाती 2:4

दिलेया स्योलिबै ताँ लोमिंब्मैं ट्हुबि क्ह्‍याल् त्हुम् बिसि खाबज्यै आसेल्‍ले खसि बिश्‍वास लब्मैंए म्‍हाँजोर होंइ। धै ख्रीष्‍टउँइँले मुक्‍ति योंब्मैंलाइ छैं लसि स्योंम्बै ठिममैं म्हाँदिबर कर ल्हैदिमल।

गलाती 4:17

च स्‍योर ताँ लोमिंब्‍मैंइ क्‍हेमैंलाइ खेंमैं ङाँइ बोबै भों लम्, दिलेया क्हेमैंए फिर आछ्याँबै सैं मैंम्। चमैंइ बिबै ताँ क्‍हेमैंइ बेल्‍ले सैं तोंदै क्वेंरिगे बिसि चमैंइ क्‍हेमैंलाइ ङि ङाँइँले फ्रेसि बोल् म्‍हैम्।

गलाती 6:12

क्हेमैंलाइ ज्युर चिनु लल् त्‍हुम् बिसि कर ल्‍हैदिब्मैं बैरुबै सै म्रोंसि प्हैंदा ङ्हाँब्मैं ग। “परमेश्‍वरउँइँले खटिदिबै ख्रीष्‍ट म्रुँ क्रूसर च्योसि सिइ,” बिबै ताँ बिप्रमा यहूदीमैंउँइँले खेंमैंलाइ तोइ दुःख आतरिगे बिब् मैंसि चमैंइ “ज्युर चिनु लल् त्‍हुम्” बिब् ग।

एफिसी 4:14

धै ङ्यो कोलोमैं धों तरिब् आरे। म्हिमैंइ स्‍योर तेसि स्‍यो स्‍योबै ताँ लोमिंन बिलेया ङ्योइ च्हैब् मैंब् लल् खाँसि सैं ङ्हिं तरिब् आरे। च म्हिमैंइ लुसि स्योलिबै ताँ लोमिंलेया ङ्योइ क्‍वेंरिब् आरे।

फिलिप्पी 3:18

ङइ चु ताँ ल्‍हें खे क्हेमैंने बिल् खाँइमुँ, धबै या बिमुँ। ङए सैं बेल्‍ले नइमुँ। को-कोइ म्हिमैंम् अझै क्रूसर सिमिंबै येशू ख्रीष्‍टए शत्तुरन् तसि छ्ह थोम्।

फिलिप्पी 3:2

आछ्याँबै के लब्‍मैं, नगिमैं धोंले नेब्मैं, नेरो ज्युर्बै ट्हुबि क्‍याँब्मैंउँइँले न्ह क्रों मि क्रोंले टिद्।

कलस्सी 2:4

स्योलिबै ताँमैं पोंसि खाबज्यै क्हेमैं लुल् आखाँरिगे बिसि ङ क्‍हेमैंने बिइमुँ।

कलस्सी 2:8

छतसि न्ह क्रों मि क्रोंले टिद्! म्‍हिउँइँले खबै केर आफेबै स्योलिबै ताँइ क्‍हेमैं परमेश्‍वरए क्ह्रोंसेंन्बै घ्‍याँउँइँले फ्रेल् आखाँरिगे। छाबै स्योलिबै ताँमैं ख्रीष्‍टउँइँले खब आङिं, ह्‌युल ग्याल्स ओलेबै मोंमैंउँइँले नेरो म्‍हिमैंइ लबै रोसमैंउँइँले खब् ग।

१ यूहन्‍ना 2:18

ओ ङइ खोबै कोलोमैं, आखिरि त्हे तखइमुँ। क्‍हेमैंइ “आखिरि त्हेर ख्रीष्‍टए बिरोधी त्‍होंब्‍मुँ” बिबै ताँ थेल। धै तिंजोरो ख्रीष्‍टए बिरोधीमैं ल्‍हें त्‍होंइमुँ। छतमा आखिरि त्हे तखन बिसि ङ्योइ सेल् खाँम्।

१ यूहन्‍ना 4:1

ओ ङइ खोबै थुमैं, “ङने परमेश्‍वरए प्ल्ह मुँ, ङ अगमबक्‍ता ग,” बिब्‍मैंए ताँ आक्‍वेंन्। चमैंइ पोंबै ताँ पबित्र प्ल्ह परमेश्‍वरउँइँले युबै ताँ ङिंब् उ आङिं बिसि छेनाले च्हैंब् मैंब् लद्। तलेबिस्याँ स्योलिबै ताँ पोंबै ल्हें अगमबक्‍तामैं खन्तोदोंन् फेनेइमुँ।

यहूदाइ प्‍ह्रिबै प्ह्रिछ्या 1:4

तलेबिस्याँ को-कोइ म्‍हिमैं स्योलिबै ताँ बिबर क्हेमैंए म्हाँजोर था आसेल्‍ले होंयाल् खाँइमुँ। चुमैंइ परमेश्‍वरलाइ आम्हाँदि, धै चुमैंए आछ्याँबै केमैं लबै ल्हागिर ङ्योए परमेश्‍वरए दयाम्हाँयालाइ तो धोंइ आङ्हाँन्ल्‍ले छाइ खैने माइ खै लवाम्। धै ङ्योए घ्रि मत्‍त्रे क्ल्हे प्रभु येशू ख्रीष्‍टए फिर चमैंइ बिश्‍वास आल। छतसि ओंसों ओंनोंन् चमैं दण्ड योंबर ठर्दिल् खाँइमुँ।

दर्शन 19:20

दिलेया परमेश्‍वरए फौजमैंइ च खेदो नेरो स्योर तेबै अगमबक्‍तालाइ क्‍हाइ। (च स्योर तेबै अगमबक्‍ताइ च खेदोए उँइँर ओंसों औदिबै चिनुमैं लसि खेदोए छाप किंब्‍मैं नेरो चए कुए पूजा लब्‍मैंलाइ स्योलिबै ताँ पोंसि चमैंए सैं खेंमैं ङाँइ च्यारवाल।) छतसि चमैं ङ्हिं सोगोंन् मि लुँरिबै बारुदए होंल्दोंर भ्योंवाइ।

दर्शन 2:2

क्हिए बिश्‍वासीमैंइ लबै केमैं, क्हेमैंइ बेल्‍ले भोंले लबै केमैं नेरो क्हेमैंइ सैदिबै दु:खमैं ङइ सेइमुँ। झाइले क्हेमैंइ आछ्याँबै के लबै म्हिमैंलाइ आसैदि बिसे या ङइ सेइमुँ। को-कोइइ ‘ङि प्रभु येशूजी कुल्मिंबै चेला चिब्मैं ग’ बिसि स्योर तेमा चमैंए सैं फो किंसि क्हेमैंइ चमैं स्‍योर्गों मुँन बिब् सेबै या ङइ सेइमुँ।

दर्शन 2:20

दिलेया क्‍हेमैंए बिरोधर चु ताँ ङइ बिल् त्हुइमुँ: क्‍हिइ ईजेबेल बिबै च्हमिरिलाइ क्हेमैंने बालुन् टिल् पिंइमुँ। चइ ह्रोंसलाइन अगमबक्‍ता ग बिसि बिइमुँ, दिलेया चइ ङए के लब्‍मैंलाइ वाँसि ब्यभिचार लले या, कुर चडेबै सै चले या तोइ आत बिसि लोमिंम्।

दर्शन 2:9

क्‍हिए दुःखमैं नेरो क्‍हि ङ्हाँदु मुँ बिब ङइ सेइमुँ। दिलेया क्‍हिम् क्‍ह्रोंसेंन प्लब मुँ। कोइ म्‍हिमैंइ ‘ङ यहूदी ग,’ बिमुँ, दिलेया चमैं यहूदीमैं आङिं, चमैं दुष्‍टए न्होंर टिब्‍मैं ग। चमैंइ क्‍हिए फिर पोंबै आछ्याँबै ताँमैं ङइ सेइमुँ।