२ कोरिन्थी 10:7 - परमेश्‍वरए ताँ तमु क्युइर

⁷ क्‍हेमैंइ ह्रोंसए मिइ म्रोंबै सैमैं मत्‍त्रे ङ्ह्‍योम्। क्हेमैंए न्होंरि खाबज्यै या “ङ येशू ख्रीष्‍टए म्‍हि ग!” बिम् बिस्याँ च धोंलेन् ङि या ख्रीष्‍टए म्हिन् ग बिसि चइ क्होल् त्हुम्।

२ कोरिन्थी 10:7 ပူးပေါင်းရင်းမြစ်များ

मत्ती 23:5

दिलेया चमैंइ ह्रोंसइ लबै केमैं म्हिमैंइ म्रोंरिगे बिसि उँइँम्। ङि धर्मि ग बिसि उँइँबै ल्हागिर चमैंइ ठिमर्बै ताँमैं थेंबै बट्टामैं थे-थेब लसि ङ्‍हो नेरो यो पाख्रार खिम्, छलेन ह्रोंसइ खिबै क्‍वेंर ह्रिंग्यो ह्रिंग्यो झुम्कामैं च्योसि खिम्।

लूका 16:15

धबै येशूजी चमैंने बिइ, “क्‍हेमैं म्‍हिमैंए उँइँरि ‘ङ छ्याँब धर्मि म्‍हि ग’ बिसि थेब प्‍हैंम्। दिलेया क्हेमैंए सैं न्होंर तो मुँ बिसि परमेश्‍वरजी सेम्। म्‍हिमैंए सैंर थेब ङ्हाँबै सै परमेश्‍वरए उँइँर तोइ आङिंबै सै ग।

यूहन्‍ना 7:24

छतसि म्हि ङ्‍ह्‍योसि निसाफ आलद्, दिलेया छेनाले ताँ क्होसि निसाफ लद्।”

१ कोरिन्थी 1:12

क्‍हेमैं न्‍होंर कोइइ “ङ पावलए चेला ग,” कोइइ “ङ अपोल्‍लसए चेला ग,” कोइइ “ङ पत्रुसए चेला ग,” कोइइ “ङ ख्रीष्‍टए चेला ग,” बिम् रो।

१ कोरिन्थी 14:37

खाबज्यै या ह्रोंसलाइ अगमबक्‍ता अथवा पबित्र प्ल्ह मुँबै म्‍हि ग बिसि मैंम् बिस्याँ, ङइ प्‍ह्रिबै चु ताँमैं प्रभुजी लद् बिबै ताँमैं ग बिसि चइ सेरिगे।

१ कोरिन्थी 15:23

दिलेया ताँन् खें-खेंमैंए पलोर सोगों तम्। ख्रीष्‍ट बिस्याँ धाँसे ओंसों सोगों तइ, धै खी एयुबै त्हेर खीए फिर बिश्‍वास लब्मैं सोगों तब्‍मुँ।

१ कोरिन्थी 3:23

झाइले क्‍हेमैं ख्रीष्‍टल् ग, धै ख्रीष्‍ट परमेश्‍वरल् ग।

१ कोरिन्थी 9:1

ङ पावल खाबै न्होंर मुँ रो वा? ङ कुल्मिंबै चेला चिब आङिं वा? ङ्योए प्रभु येशूलाइ ङइ आम्रोंइमुँ वा? क्हेमैंन् प्रभुए ल्हागिर ङइ लबै केए रोमैं आङिं वा?

२ कोरिन्थी 10:1

क्‍हेमैंए न्‍होंरि को-कोइइ “पावल ङिउँइँले ह्रेंगो तमा ङिलाइ हौदिबै प्ह्रिछ्या प्‍ह्रिम्, दिलेया ङि ङाँर मुँमा च्‍योंब तसि तोइ आबिल्‍ले टिम्,” बिसि बिम् रो। दिलेया ख्रीष्‍टजी ङ्योए फिर म्हाँया लब् धोंले ङए सैंरै या ल्हयो खबइले क्हेमैने ङ यो छ्युँ लम्:

२ कोरिन्थी 11:18

ल्हें म्‍हिमैंइ थेब् प्‍हैंसि पोंबइले ङै या चमैं धोंले थेब् प्‍हैंसि पोंम्।)

२ कोरिन्थी 11:23

चमैं येशू ख्रीष्‍टए सेवा लब्मैं वा? चमैं भन्दा ङ झन् छेनाले सेवा लबै म्‍हि ग। छबिमा ङ सोबल धोंले पोंइ। ङइ बेल्‍ले दुःखले ख्रीष्‍टए सेवा लइमुँ, ङ ल्हें खे झेलर टिल् त्‍हुइ, ङलाइ ल्हें खे कोर्राइ प्रुइ, छले ल्हें खे ङ कालए सुँर फेइ।

२ कोरिन्थी 11:4

क्‍हेमैं ङाँर म्‍हि घ्रि खसि ङिइ बिबै येशू भन्दा अर्कोन् येशूए बारेर्बै ताँ बिइ बिस्याँ, झाइले क्‍हेमैंइ योंबै पबित्र प्ल्ह भन्दा चइ बिबै अर्कोन् प्ल्हए ताँ क्हेमैंइ क्वेंइ बिस्याँ, छलेन ङिइ बिमिंबै सैं तोंबै ताँ भन्दा अर्को ताँमैं क्‍हेमैंइ क्वेंइ बिस्याँ, च म्हिए ताँ क्हेमैंइ सैं तोंन्ले थेमना!

२ कोरिन्थी 12:11

ङलाइ बुद्धि आरेबै म्हि तबर क्‍हेमैंन कर ल्‍हैदिइ। क्‍हेमैंइ अरूमैंए छ्याँबै बयन लसि चमैंलाइन “बेल्‍ले छ्याँबै कुल्मिंबै चेला चिब्मैं” बिमुँ, चमैंए उँइँरम् क्‍हेमैंइ ङए बारेर छ्याँबै बयन लल् त्‍हुमल। तलेबिस्याँ ङ तोइ आङिंलेया चमैं भन्दा ङ तोरै च्‍योंब् आरे।

२ कोरिन्थी 13:3

छतसि ङउँइँले ख्रीष्‍ट पोंम् उ आपों बिब क्‍हेमैंइ प्रमाण म्हैम् बिस्याँ छेनाले मैंन्, ख्रीष्‍टजी क्‍हेमैंए म्हाँजोर खाबलाज्यै आफेलल्‍ले निसाफ लमा खी आभोंब् तरिब् आरे, खी बेल्‍ले भोंब् तब्मुँ।

२ कोरिन्थी 5:12

क्हेमैंए उँइँर ङिइ धबै ह्रोंसलाइन थेब् लदै प्‍हैंसि आपों, बरु को-कोइ म्हिमैंइ म्रोंल् खाँबै सैए बारेर थेब् प्हैंसि पोंम्, खों न्होंर्बै ताँए बारेर वास्ता आल। छाबै म्हिमैंए ताँ क्हेमैंइ थोल् खाँरिगे बिसि ङिए बारेर क्हेमैं थेब प्हैंसि चमैंए उँइँर पोंल् योंरिगे बिसि ङिइ क्‍हेमैंलाइ मौका पिंब् ग।

गलाती 3:29

छले क्‍हेमैं ख्रीष्‍टने घ्रिन् तबइले क्‍हेमैं अब्राहामए सन्‍तान ग। छतसि परमेश्‍वरजी अब्राहामने बाछा फैसि पिंम् बिबै आशिकए हकवालामैं क्‍हेमैंन् ग।

१ यूहन्‍ना 4:6

दिलेया ङ्यो परमेश्‍वरए म्हिमैं ग। छतसि परमेश्‍वरलाइ ङो सेब्‍मैंइ ङ्योए ताँ थेम्, दिलेया परमेश्‍वरए म्हिमैं आङिंब्मैंइ ङ्योए ताँ आथे। चु ताँउँइँलेन् ङ्योइ क्ह्रोंसेंन्बै प्ल्ह नेरो स्योलिबै प्ल्ह था सेल् खाँम्।