१ थेसलोनिकी 2:19 - परमेश्‍वरए ताँ तमु क्युइर

¹⁹ तो तलेया ङ्योए प्रभु येशू युमा खीए उँइँर राबै त्हेर ङिए इनाम योंबै आशा, सैं तोंबै ताँ क्हेमैंन् ग। धै क्हेमैं म्रोंसि ङि थेब् प्हैंबै क्रेगि योंब्मुँ।

१ थेसलोनिकी 2:19 ပူးပေါင်းရင်းမြစ်များ

हितोपदेश 12:4

सिर सुबास मुँबै च्हमिरि ह्रोंसए प्युँए ल्हागिर मुकुट ग, दिलेया प्युँलाइ फापिल् लबै प्ह्रेंस्यो प्युँए ह्रिब क्राँयाब धोंन् तब् ग।

हितोपदेश 16:13

ठिक के लबै म्हिमैंइ पोंबै ताँ थेसि म्रुँ सैं तोंम्, धै क्ह्रोंसेंन्बै ताँ पोंब्मैंलाइ म्रुँइ खोम्।

हितोपदेश 17:6

क्वें-क्वेंमिमैं बाज्यु-भुज्युए क्रेगि ग, धै आबा-आमा प्हसेमैंए ङ्‍हो लोंबै सै ग।

हितोपदेश 4:9

क्हिए खरिर चइ बेल्‍ले ङ्‍हेंबै माल पैरेमिंब्मुँ; धै क्हिए क्रर बेल्‍ले ङ्‍हेंबै मुकुट कुमिंब्मुँ।”

मत्ती 16:27

तलेबिस्याँ म्हिए च्ह खीए आबाए मान योंसि स्‍वर्गदूतमैंने युमा म्‍हिमैंइ खैबै के लइमुँ छाबन् नों खीजी पिंब्‍मुँ।

मर्कूस 8:38

छतसि खाबइ चु आछ्याँबै पापि जुगरि ङ नेरो ङए ताँ थेसि फापिमुँ, ङ म्हिए च्ह या ह्रोंसए आबाजी पिंबै मान नेरो पबित्र स्‍वर्गदूतमैंने बालु चु ह्‍युलए निसाफ लबर युमा च म्‍हि म्रोंसि ङै या फा पिब्‍मुँ।”

यूहन्‍ना 21:22

येशूजी चने बिइ, “ङ आयुन् समा चइ ङ पैंरिगे बिब ङए सैं मुँलेया क्हिलाइ चु ताँ तले चैदिइ? क्हिम् ङए लिलि प्रद्!”

१ कोरिन्थी 15:23

दिलेया ताँन् खें-खेंमैंए पलोर सोगों तम्। ख्रीष्‍ट बिस्याँ धाँसे ओंसों सोगों तइ, धै खी एयुबै त्हेर खीए फिर बिश्‍वास लब्मैं सोगों तब्‍मुँ।

१ कोरिन्थी 4:5

छतसि ठिक त्हे आतन् समा खाबै फिरै या क्हेमैंइ छ्याब् आल्हैदिद्, ताँनए निसाफ प्रभुजीन् च त्हेर लम्। म्हिमैंइ आसेल्‍ले लबै आछ्याँबै केमैं या ताँनइ सेल् लमिंब्मुँ, छलेन म्‍हिमैंए सैं न्‍होंर्बै ताँमैं या उँइँमिंब्‍मुँ। धै म्हिमैंइ खैबै केमैं लइमुँ च अनुसार्बै इनाम परमेश्‍वरजी चमैंलाइ पिंब्‍मुँ।

२ कोरिन्थी 1:14

तोगो समा क्‍हेमैंइ ङि छेनाले आसेइमुँ, दिलेया लिउँइँ ङ्योए प्रभु येशू युबै त्हिंइर ङिलाइ क्‍हेमैंइ छेनाले सेब्मुँ। क्हेमैं म्रोंसि ङि ङ्‍हो लोंब् धोंले च्हमा ङि म्रोंसि क्हेमैं या ङ्‍हो लोंब्मुँ।

फिलिप्पी 2:16

क्‍हेमैंलाइ छ्ह पिंबै परमेश्‍वरए ताँ भोंन्ले क्हाथेंन्। छले क्हाथेंस्याँ येशू ख्रीष्‍ट युबै त्हिंइर ङइ क्हेमैंए ल्हागिर लबै दुःख छलेन् खेरो आह्‍याना बिसि ङए सैं तोंब्मुँ।

फिलिप्पी 4:1

छतसि, ङइ खोबै अलि-अङाँमैं, छलेन् क्हेमैं प्रभुए भोंब् तरिद्। ङइ क्‍हेमैंलाइ म्हाँया लमुँ, धै क्हेमैंए साँ खरिम्। क्हेमैंइ ङए सैं तोंन् लमिंइमुँ छतसि क्हेमैं ङए मुकुट ग।

१ थेसलोनिकी 2:20

ङिए सैं थेब् लसि सैं तोंन् लमिंब क्ह्रोंसेंन क्हेमैंन् ग।

१ थेसलोनिकी 3:13

खीजी क्हेमैंलाइ भोंब् लमिंब्मुँ, धै प्रभु येशू खीए म्हिमैंने बालु धबै चु ह्‍युलर युमा क्हेमैं ङ्योए परमेश्‍वर आबाए उँइँर बेल्‍ले छ्याँब खोट आरेब तब्मुँ।

१ थेसलोनिकी 4:15

प्रभुजी बिबै ताँउँइँले ङिइ क्‍हेमैंने बिमुँ, ङ्यो प्रभु युबै त्हिंइ समा सोरिब्मैं खीए फिर बिश्‍वास लसि ओंसों सियाब्‍मैं भन्दा ओंसों ह्‍याल् आयों,

१ थेसलोनिकी 5:23

शान्ति पिंबै परमेश्‍वरजी ताँन् सैर क्‍हेमैंलाइ पबित्र लमिंरिगे, धै ङ्योए प्रभु येशू युबै त्हेर क्हेमैंए ज्यु, सैं, खों, बेल्‍ले छ्याँब नेरो खोट आरेब तरिगे।

२ थेसलोनिकी 1:4

क्हेमैंए फिर कति दुःख तलेया च दुःख सैदिसि क्हेमैं बिश्‍वासर भोंब् तब् म्रोंसि परमेश्‍वरए फिर बिश्‍वास लब्मैंए म्हाँजोर ङिइ प्हैंदै पोंल् योंमा ङिए ङ्‍हो च्हौ प्ल्ह्‍याब् धों ङ्हाँइमुँ। धै ङि क्हेमैंए बारेर प्हैंसि पोंम्।

२ थेसलोनिकी 1:7

झाइले क्‍हेमैं दुःख योंब्‍मैं नेरो ङि या परमेश्‍वरजी सुख पिंब्‍मुँ। प्रभु येशू ह्रोंसए शक्‍ति मुँबै स्‍वर्गदूतमैंने लुँरिबै मिने स्‍वर्गउँइँले युबै त्हेर परमेश्‍वरजी ङ्योलाइ च सुख पिंब्मुँ।

२ थेसलोनिकी 2:1

ओ अलि-अङाँमैं, अर्को ताँ, ङ्योए प्रभु येशू ख्रीष्‍ट धबै युबै ताँ नेरो ङ्यो खागु तसि खीने त्होबै ताँए बारेर ङिइ क्‍हेमैंने चु यो छ्युँ लम्:

तीतस 2:13

छाबै छ्ह थोमा ङ्योइ थेंबै आशा तो जा बिस्याँ: ङ्योए ताँन् भन्दा थेबै परमेश्‍वर ङ्योलाइ जोगेमिंबै येशू ख्रीष्‍ट थेबै मानले युबै त्हिंइ पैंरिब् ग।

याकूब 5:7

छतसि ओ अलि-अङाँमैं, प्रभु आयुन् समा ढुक्‍काले टिद्। ताँ घ्रि बिले, म्रों रुँइँसि म्‍हिइ बालि आखुन् समा ढुक्‍काले टिरिम्। चइ आरुँइँन् समा बर्ख नेरो सर्खर्बै नाँ युब पैंरिम्।

याकूब 5:8

च धोंलेन् क्‍हेमैं या ह्रेसि टिरिद्। ह्रोंसए सैं भोंब् लद्, तलेबिस्याँ प्रभु येशू युनन् युब्मुँ।

१ पत्रुस 5:4

छलस्याँ ताँन् भन्दा मूलि प्‍ह्रोंछैं युबै त्हेर क्‍हेमैंइ खोंयोंइ आङ्योंलोंब नास आतबै छ्याँबै मुकुट योंब्‍मुँ।

२ पत्रुस 1:16

ङ्योए प्रभु येशू ख्रीष्‍टए शक्‍तिए बारेर नेरो खी धबै युब्मुँ बिबै ताँ ङिइ क्‍हेमैंने बिल। चु ताँ म्हिमैंइ पार्दिबै स्योलिबै ताँमैं आङिं। खीए थेबै शक्‍तिए औदिबै केमैं ङिए मिइन म्रोंल।

२ पत्रुस 3:4

“येशूजी खी धबै युम् बिसि बाछा फैल। तिंयाँ समा तले आयु? ङ्योए खेमैं-माँमैं सियाल् खाँइ, झाइले ह्‍युलर मुँबै सैमैं या ह्‍युल् बनेब् ओंनोंबै खैब मुँल तिंयाँ या छाबन् मुँ!” बिसि चमैंइ बिब्मुँ।

१ यूहन्‍ना 2:28

ओ ङइ खोबै कोलोमैं, ख्रीष्‍ट युमा ङ्यो भोंब तरिगे, धै खी युबै त्हिंइर खीए उँइँर ङ्यो फापिल् आत्‍हुरिगे बिसि खीनेन् घ्रिन् तसि प्रद्।

यहूदाइ प्‍ह्रिबै प्ह्रिछ्या 1:24

क्‍हेमैंलाइ पापर च्होवाबै सैउँइँले परमेश्‍वरजी जोगेल् खाँम्, धै तोइ छ्याब् आरेब् लमिंसि परमेश्‍वरए उँइँर सैं तोंन्ले टिल् योंब लमिंल् खाँम्।

दर्शन 1:7

ङ्ह्‍योत्ति, येशू न्‍हाँम्‍स्योर युइन मुँ। खीलाइ सैब्मैं नेरो अरू ताँन् म्हिमैंज्यै या खी म्रोंब्‍मुँ। छले खि युरिब् म्रोंमा ह्‍युलर्बै ताँन् म्हिमैं न्हुँ लसि क्रोब्‍मुँ। आमेन, छान् तरिगे।

दर्शन 22:12

“थेद्! म्हिमैंइ खैबै के लइमुँ छाबन् नों पिंबर ङ युनन् युब्‍मुँ बिसि,” येशूजी बिइमुँ।