१ यूहन्‍ना 4:6 - परमेश्‍वरए ताँ तमु क्युइर

⁶ दिलेया ङ्यो परमेश्‍वरए म्हिमैं ग। छतसि परमेश्‍वरलाइ ङो सेब्‍मैंइ ङ्योए ताँ थेम्, दिलेया परमेश्‍वरए म्हिमैं आङिंब्मैंइ ङ्योए ताँ आथे। चु ताँउँइँलेन् ङ्योइ क्ह्रोंसेंन्बै प्ल्ह नेरो स्योलिबै प्ल्ह था सेल् खाँम्।

१ यूहन्‍ना 4:6 ပူးပေါင်းရင်းမြစ်များ

लूका 10:22

“ङए परमेश्‍वर आबाजी तोन्दोंरि सै ङलाइ पिंइमुँ। च्‍ह खाब् जा बिसि परमेश्‍वर आबाजी मत्‍त्रे सेमुँ अरूमैंइ आसे, परमेश्‍वर आबा खाब् जा बिसि च्हइ मत्‍त्रे सेमुँ अरूमैंइ आसे। ‘परमेश्‍वर आबा ङो सेरिगे’ बिसि ङइ उँइँदा ङ्हाँब्मैंइ मत्‍त्रे खीलाइ ङो सेम्, अरू खाबज्‍यै या परमेश्‍वर आबा ङो आसे।”

यूहन्‍ना 10:16

ङला अरू क्युमैं या मुँ, चमैं चु प्ह्रोंर्बै आङिं। दिलेया ङइ चमैं या पखल् त्हुब्मुँ। चमैंइ ङए कै थेब्मुँ, धै ताँन् क्युमैं बगाल घ्रिन् तब्मुँ, छतसि प्ह्रोंछैं या घ्रिन् तब्मुँ।

यूहन्‍ना 10:27

ङए क्युमैंइ ङए कै थेम्, ङइ चमैंलाइ ङो सेम्। छतसि चमैं ङए लिलि खम्।

यूहन्‍ना 10:3

म्रा रुँबै म्हिइ प्ह्रोंछैंए ल्हागिर म्रा थोंमिंम्। झाइले प्ह्रोंछैंइ ह्रोंसए क्युमैंए मिं तेसि हुइमा क्युमैंइ खीए कै थेम्। धै प्ह्रोंछैंइ क्युमैं बैरु छबर बोयाम्।

यूहन्‍ना 13:20

क्ह्रोंसेंन ङ क्हेमैंने बिमुँ, ङइ कुल्मिंबै म्हिलाइ मान लब्मैंइ ङलाज्यै या मान लमुँ, छलेन ङलाइ मान लब्मैंइ ङ कुल्मिंबै आबालाज्यै या मान लमुँ।”

यूहन्‍ना 14:17

खी क्ह्रोंसेंन्बै ताँ लोमिंबै पबित्र प्ल्ह ग। ह्‍युलर्बै म्हिमैंइ खीलाइ आक्वें, तलेबिस्याँ ह्‍युलर्बै म्हिमैंइ खी म्रोंइ आम्रोंइमुँ, सेइ आसेइमुँ। दिलेया क्हेमैंमि खीलाइ सेइमुँ। तलेबिस्या खी क्हेमैंने बालुन् टिमुँ, धै खी क्हेमैंनेन् तरिब्मुँ।

यूहन्‍ना 15:26

“ङइ आबाउँइँले ल्होमिंबै पबित्र प्ल्ह क्हेमैं ङाँर कुल्मिंब्मुँ, खी परमेश्‍वर आबाउँइँले युब्मुँ, खीजीन् ङए बारेर ग्वाइ पिंब्मुँ।

यूहन्‍ना 16:13

दिलेया क्ह्रोंसेंन्बै ताँ लोमिंबै पबित्र प्ल्ह युब्मुँ, धै खीजी क्हेमैं ताँन् क्ह्रोंसेंन्बै छ्याँबै घ्याँर डोरेमिंब्मुँ। खीजी ह्रोंसए सैंर मैंब् धोंले आपों। खीजी तो ताँ थेमुँ चन् पोंब्मुँ, धै लिउँइँ तखबै ताँमैं क्हेमैंने बिमिंब्मुँ।

यूहन्‍ना 18:37

पिलाताइ खीने “छ बिस्याँ क्हि म्रुँन् वा?” बिसि ङ्योएमा येशूजी बिइ, “ङ म्रुँ ग बिसि क्‍हिइन बिइमुँ। क्‍ह्रोंसेंन्‍बै ताँए ग्वाइ पिंबै ल्हागिर ङ फिब् ग। छतसि ङ चु ह्‍युलर युब् ग। क्ह्रोंसेंन्बै ताँ खोब्मैंइ ङए ताँ थेमुँ।”

यूहन्‍ना 20:21

येशूजी धबै चमैंने बिइ, “क्‍हेमैं छिं ङ्हाँरिगे! आबाजी खैले ङ कुल्‍मिंइ, छलेन ङज्‍यै या क्‍हेमैं कुल्मिंब्मुँ।”

यूहन्‍ना 8:19

चमैंइ खीने “क्‍हिए आबा खनिर मुँ?” बिसि ङ्योएमा येशूजी चमैंने बिइ, “क्‍हेमैंइ ङै या ङो आसे, ङए आबालाज्यै या ङो आसे। क्‍हेमैंइ ङलाइ ङो सेस्‍याँ ङए आबालाज्यै ङो सेमल।”

यूहन्‍ना 8:23

धबै येशूजी चमैंने बिइ, “क्‍हेमैं न्होंउँइँबै ग। ङ क्‍होउँइँबै ग। क्‍हेमैं चु ह्‍युलर्बै ग। ङ चु ह्‍युलर्बै आङिं।

रोमी 1:1

येशू ख्रीष्‍टए के लबर त्हाँबै ङ पावलउँइँले क्हेमैं रोम सहरर्बै बिश्‍वासीमैंलाइ जय मसीह मुँ, सैं तोंबै ताँ बिप्रबै ल्हागिर नेरो कुल्मिंबै चेला चिब तबर परमेश्‍वरजी ङ त्‍हाँब् ग।

रोमी 11:8

परमेश्‍वरए छ्वेर छले प्ह्रिइमुँ, “परमेश्‍वरजी चमैंलाइ क्होल् आखाँबै सैं पिंइमुँ, चमैंलाइ आम्रोंबै मि नेरो आथेबै न्ह पिंइमुँ, छतसि तिंयाँ समन् चमैं छाबन् मुँ।”

१ कोरिन्थी 14:37

खाबज्यै या ह्रोंसलाइ अगमबक्‍ता अथवा पबित्र प्ल्ह मुँबै म्‍हि ग बिसि मैंम् बिस्याँ, ङइ प्‍ह्रिबै चु ताँमैं प्रभुजी लद् बिबै ताँमैं ग बिसि चइ सेरिगे।

२ कोरिन्थी 10:7

क्‍हेमैंइ ह्रोंसए मिइ म्रोंबै सैमैं मत्‍त्रे ङ्ह्‍योम्। क्हेमैंए न्होंरि खाबज्यै या “ङ येशू ख्रीष्‍टए म्‍हि ग!” बिम् बिस्याँ च धोंलेन् ङि या ख्रीष्‍टए म्हिन् ग बिसि चइ क्होल् त्हुम्।

२ थेसलोनिकी 1:8

परमेश्‍वर ङो सेल् आङिंब्मैं नेरो ङ्योए प्रभु येशूउँइँले खबै सैं तोंबै ताँ आक्वेंब्‍मैं ताँनलाइ खीजी दण्ड पिंब्‍मुँ।

१ तिमोथी 4:1

तारे खबै त्हेजरे स्योलिबै ताँ क्वेंसि दुष्‍टए घ्याँर प्रसि को-कोइ बिश्‍वास लबन् पिवाब्मुँ बिसि पबित्र प्ल्हजी छेनाले बिमिंइमुँ।

२ पत्रुस 3:2

स्‍योंम्‍बै पबित्र अगमबक्‍तामैंइ पोंबै अगमबाणिए ताँमैं नेरो क्‍हेमैं ङाँर खबै कुल्मिंबै चेला चिब्मैंइ बिबै ताँमैं क्हेमैंइ मैंरिगे बिब ङए सैं मुँ।

१ यूहन्‍ना 4:1

ओ ङइ खोबै थुमैं, “ङने परमेश्‍वरए प्ल्ह मुँ, ङ अगमबक्‍ता ग,” बिब्‍मैंए ताँ आक्‍वेंन्। चमैंइ पोंबै ताँ पबित्र प्ल्ह परमेश्‍वरउँइँले युबै ताँ ङिंब् उ आङिं बिसि छेनाले च्हैंब् मैंब् लद्। तलेबिस्याँ स्योलिबै ताँ पोंबै ल्हें अगमबक्‍तामैं खन्तोदोंन् फेनेइमुँ।

१ यूहन्‍ना 4:4

दिलेया ओ ङइ खोबै कोलोमैं, क्‍हेमैं परमेश्‍वरए म्हिमैं ग। क्‍हेमैंने मुँबै पबित्र प्ल्ह ख्रीष्‍टए फिर बिश्‍वास आलबै म्हिमैंने मुँबै प्ल्ह भन्दा थेबै शक्‍ति मुँबै प्ल्ह ग। छतसि क्‍हेमैंइ स्‍योलिबै ताँ पोंब्‍मैंलाइ ट्होवाइमुँ।

१ यूहन्‍ना 4:8

दिलेया सैं न्होंउँइँलेन् म्हाँया आलब्‍मैंइ परमेश्‍वरलाइ ङो आसे, तलेबिस्याँ परमेश्‍वरजी म्हाँया लम्।

१ यूहन्‍ना 5:19

ङ्योइ चु ताँ या सेइमुँ: चु ह्‍युलर्बै म्‍हिमैं दुष्‍टए न्होंर मुँ, ङ्यो बिस्याँ परमेश्‍वरए म्हिमैं ग।

यहूदाइ प्‍ह्रिबै प्ह्रिछ्या 1:17

छतसि ओ ङए खोबै थुमैं, ङ्योए प्रभु येशू ख्रीष्‍टजी कुल्मिंबै चेला चिब्मैंइ ओंसोंन् बिबै ताँमैं क्हेमैंइ मैंन्।