१ कोरिन्थी 7:17 - परमेश्‍वरए ताँ तमु क्युइर

¹⁷ परमेश्‍वरजीन् ङ्यो ताँनलाइ त्हाँब् ग, बरदानै या खीजीन् पिंब् ग। छतसि ह्रोंसइ योंबै बरदान अनुसार्बै केमैं लसि छ्ह थोल् त्हुम्। ताँन् क्‍ल्‍ह्‍योर्बै बिश्‍वासीमैंने ङइ चु ताँन् बिइमुँ।

१ कोरिन्थी 7:17 ပူးပေါင်းရင်းမြစ်များ

मत्ती 19:12

तलेबिस्याँ कोइ फिब् ओनोंबै हिचड तमुँ, कोइ म्हिमैंइ लबै हिचड तमुँ। धै कोइ ‘स्‍वर्गर्बै ग्याल्सए के लबै ल्हागिरि ब्ह्‍या आललेन् तम्’ बिसि ब्ह्‍या आल। छतसि ब्ह्‍या आलल्‍ले टिल् खाँब्‍मैंइ चु ताँ ङिंरिगे।”

१ कोरिन्थी 10:32

क्‍हेमैंइ छ्ह थोमा यहूदी मुँले, अरू ह्रेंमैं मुँले, परमेश्‍वरए फिर बिश्‍वास लब्मैं मुँले, खाबलाज्यै या सैं नल् लबै के आलद्।

१ कोरिन्थी 11:16

दिलेया चु ताँए बारेर को-कोइइ तोइ बिदा ङ्हाँम् बिस्‍याँ ङइ चमैंने बिमुँ, ङिए न्होंरि अरू तोइ रोसमैं आरे, परमेश्‍वरए बिश्‍वासीमैं न्‍होंरै या अरू तोइ रोसमैं आरे।

१ कोरिन्थी 11:34

बरु क्‍हेमैंइ प्रभु भोज चमा परमेश्‍वरजी दोषि आठर्दिरिगे बिसि क्‍हेमैं न्‍होंरि को-कोइ फो ख्रेंस्‍याँ धिंर्न चद्। अरू ताँमैं ङ क्‍हेमैं ङाँर खसि लस्यो।

१ कोरिन्थी 14:33

तलेबिस्याँ क्हेमैंइ परमेश्‍वरए सेवा लमा गोलमोल आतल्‍ले छेनाले लल् त्हुम् बिब खीए सैं मुँ। ताँन् क्‍ल्‍ह्‍योर्बै परमेश्‍वरए फिर बिश्‍वास लबै म्‍हिमैं धोंले

१ कोरिन्थी 16:1

यहूदीया ह्‍युलर्बै परमेश्‍वरए म्‍हिमैंलाइ ल्होबर रेबै भेटिए बारेर ताँ घ्रि बिल् त्‍हुम्। ङइ गलातिया ह्‍युलर्बै बिश्‍वासीमैंने बिब् धोंले क्‍हेमैंज्‍यै या लद्।

१ कोरिन्थी 4:17

ङइ क्हेमैं ङाँर प्रभुए फिर बिश्‍वास लबै खोबै तिमोथी कुलइमुँ। च ङए च्‍ह धोंन् तब् ग। ङइ क्ल्ह्‍यो-क्ल्ह्‍योर्बै बिश्‍वासीमैंलाइ लोमिंब् धोंलेन् ख्रीष्‍टर ङइ खैबै छ्ह थोइमुँ बिबै ताँ चइ क्‍हेमैंने बिब्‍मुँ।

१ कोरिन्थी 7:18

ज्युर चिनु लबै म्हिलाइ परमेश्‍वरजी त्हाँइमुँ बिस्याँ चइ च चिनु मेटिदिवाबै सैं आलरिगे। छलेन ज्युर चिनु आलबर्न परमेश्‍वरजी त्हाँइमुँ बिस्याँ चइ ज्युर चिनु आलरिगे।

१ कोरिन्थी 7:24

ओ ङए अलि-अङाँमैं, परमेश्‍वरजी त्हाँमा क्‍हेमैंइ खैले छ्ह थोरिल, छलेन् परमेश्‍वरने संगति लसिन् टिरिद्।

१ कोरिन्थी 7:7

ङए सैंरम् क्‍हेमैं ताँन् ङ धोंलेन् ब्ह्‍या आलल्‍ले टिरिगे ङ्हाँइमुँ। दिलेया ताँन् म्हिलाइ परमेश्‍वरजी स्‍यो-स्‍योबै बरदान पिंइमुँ। कोइलाइ घ्रि खालर्बै बरदान पिंइमुँ बिस्याँ, कोइलाइ अर्कोन् खालर्बै बरदान पिंइमुँ।

२ कोरिन्थी 11:28

च्हौ मत्‍त्रे आङिं, च भन्दा थेबै दुःख त्हिंइ ह्रोंसे ताँन् क्‍ल्‍ह्‍योर्बै बिश्‍वासीमैंए ल्हागिर ङलाइ न्हुँ मुँ।

२ कोरिन्थी 8:18

ङिइ तीतसने अर्को अलि या कुलसिन् मुँ। सैं तोंबै ताँ बिप्रमा ताँन् क्‍ल्‍ह्‍योर्बै बिश्‍वासीमैं न्‍होंरि च अलि मान योंसि मिं कालिदिइमुँ।

गलाती 1:22

च त्हे समा यहूदीया ह्‍युलर्बै बिश्‍वासीमैंइ ङलाइ आम्रोंल,

१ थेसलोनिकी 2:14

ओ अलि-अङाँमैं, यहूदीया ह्‍युलर्बै बिश्‍वासीमैंइ योंब् धों तबै दुःख क्हेमैंज्यै योंइ। तलेबिस्याँ चमैंइ खेंमैंए यहूदी म्हिमैंउँइँलेन् दुःख योंब् धोंले क्हेमैंज्यै या ह्रोंसए ह्‍युलर्बै म्‍हिमैंउँइँले दुःख योंइ।

२ थेसलोनिकी 1:4

क्हेमैंए फिर कति दुःख तलेया च दुःख सैदिसि क्हेमैं बिश्‍वासर भोंब् तब् म्रोंसि परमेश्‍वरए फिर बिश्‍वास लब्मैंए म्हाँजोर ङिइ प्हैंदै पोंल् योंमा ङिए ङ्‍हो च्हौ प्ल्ह्‍याब् धों ङ्हाँइमुँ। धै ङि क्हेमैंए बारेर प्हैंसि पोंम्।