१ कोरिन्थी 2:10 - परमेश्‍वरए ताँ तमु क्युइर

¹⁰ चुन् क्होल् आखाँबै ताँमैं परमेश्‍वरजी खीए पबित्र प्ल्हउँइँले ङ्योलाइ क्होल् लमिंइ। तलेबिस्याँ पबित्र प्ल्हजी परमेश्‍वरए ताँन् सै म्हैमुँ, तिफुँइ क्होल् आखाँबै परमेश्‍वरए गैरु-गैरु ताँमैं या खीजी म्हैमुँ।

१ कोरिन्थी 2:10 ပူးပေါင်းရင်းမြစ်များ

मत्ती 13:11

छबिमा येशूजी चमैंने बिइ, “परमेश्‍वरजी स्‍वर्गर्बै ग्याल्सए न्होंर्बै ताँमैं क्‍हेमैंलाइ सेल् पिंइमुँ। दिलेया अरू म्हिमैंलाइ बिस्‍याँ खीजी चुए बारेर सेल् आपिंइमुँ।

मत्ती 16:17

येशूजी चने बिइ, “ओ, योनाए च्‍ह सिमोन, क्‍ह्रोसेंन क्‍हिइ आशिक योंइमुँ! तलेबिस्याँ छाबै ताँ क्‍हिइ म्‍हिउँइँले था सेब आङिं, दिलेया स्‍वर्गर मुँबै ङए आबाजी क्हिलाइ सेल् पिंब् ग।

लूका 10:21

च त्‍हेर्न येशू परमेश्‍वरए पबित्र प्ल्हजी प्लिंसि सैं तोंदै बिइ, “ओ आबा, स्वर्ग नेरो पृथ्‍बीर्बै क्‍ल्‍हे क्हिन् ग, ज्ञान मुँब्‍मैं नेरो ह्रब्-सेब्मैंउँइँले लोथेंबै छ्याँबै ताँ कोलोमैं धों तबै तोइ आह्र आसेब्मैंलाइ क्‍हिइ क्होमिंइमुँ। ओ आबा, क्‍हिजी छान् लब छ्याँब ङ्हाँइ। छतसि ङ क्हिलाइ धन्यबाद पिंमुँ।

लूका 2:26

परमेश्‍वरजी कुल्‍मिंबै म्रुँ ख्रीष्‍ट आम्रोंन् समा क्हि आसि बिसि पबित्र प्ल्हजी चने ओंसोंन् था पिंल।

यूहन्‍ना 14:26

आबाजी ङए मिंर क्हेमैंलाइ ल्होमिंबै पबित्र प्ल्ह कुलमिंब्मुँ। खीजी क्‍हेमैंलाइ तोन्दोंरि ताँमैं लोमिंब्‍मुँ। धै ङइ क्‍हेमैंने ओंसोंन् बिबै ताँन् ताँमैं क्हेमैंलाइ चिमिंब्‍मुँ।

यूहन्‍ना 16:13

दिलेया क्ह्रोंसेंन्बै ताँ लोमिंबै पबित्र प्ल्ह युब्मुँ, धै खीजी क्हेमैं ताँन् क्ह्रोंसेंन्बै छ्याँबै घ्याँर डोरेमिंब्मुँ। खीजी ह्रोंसए सैंर मैंब् धोंले आपों। खीजी तो ताँ थेमुँ चन् पोंब्मुँ, धै लिउँइँ तखबै ताँमैं क्हेमैंने बिमिंब्मुँ।

१ कोरिन्थी 14:30

दिलेया चर मुँबै म्हिमैंए न्होंरि खाबलाज्यै या परमेश्‍वरजी “चु ताँ बिद्” बिस्याँ, ओंसों पोंरिबै म्‍हि आपोंरिगे।

१ कोरिन्थी 2:11

म्हिमैंए सैंर तो मुँ बिब ह्रोंसए सैंइ मत्‍त्रे सेमुँ, अरूइ आसे, छलेन परमेश्‍वरए सैंर्बै ताँ या खीए पबित्र प्ल्हजी मत्‍त्रे सेम्।

गलाती 1:12

ङइ चु सैं तोंबै ताँ म्‍हिउँइँले योंब आङिं, खाबज्यै या ङलाइ चु ताँ लोमिंब आङिं, येशू ख्रीष्‍टन् ङलाइ खीए शक्ति उँइँमिंइ। धै चु सैं तोंबै ताँ खि ङाँइँले योंब् ग।

एफिसी 3:3

परमेश्‍वरजी खीए सैंर्बै लोथेंबै चाँजो ङने बिइमुँ। चु ताँए बारेर ङइ ओंसों या च्युगुदे ताँ प्‍ह्रिल् खाँइमुँ।

एफिसी 3:5

स्‍योंमन् परमेश्‍वरजी म्हिमैंलाइ चु चाँजो आबिल, दिलेया तिंजोरो परमेश्‍वरजी खीए पबित्र प्ल्हउँइँले कुल्मिंबै चेला चिब्मैं नेरो अगमबक्‍तामैंने च चाँजो बिमिंइमुँ।

१ तिमोथी 4:1

तारे खबै त्हेजरे स्योलिबै ताँ क्वेंसि दुष्‍टए घ्याँर प्रसि को-कोइ बिश्‍वास लबन् पिवाब्मुँ बिसि पबित्र प्ल्हजी छेनाले बिमिंइमुँ।

१ पत्रुस 1:12

चमैंने उँइँमिंबै ताँ चमैंए ल्हागिर आङिं, चमैंइ क्‍हेमैंए सेवा लरिल बिसि परमेश्‍वरजी सेल् पिंइ। धै चु ताँ स्वर्गउँइँले कुल्मिंबै पबित्र प्ल्हउँइँले क्हेमैंने सैं तोंबै ताँ बिमिंबै म्हिमैंउँइँले क्हेमैंइ थेइमुँ। स्‍वर्गदूतमैंज्यै या चु ताँ था सेदा ङ्हाँइमुँ।

१ यूहन्‍ना 2:20

दिलेया क्‍हेमैंए फिर ख्रीष्‍टजी पबित्र प्ल्ह प्लिंमिंइमुँ, छतसि क्‍हेमैं ताँनइ क्ह्रोंसेंन्बै ताँ सेइमुँ।

१ यूहन्‍ना 2:27

दिलेया ख्रीष्‍टजी ह्रोंसए पबित्र प्ल्हजी क्‍हेमैंलाइ प्लिंमिंइमुँ, छतसि क्‍हेमैंलाइ अरू लोमिंबै म्‍हि आचैदि। ताँन् सैए बारेर खीए प्ल्हजी क्‍हेमैंलाइ लोमिंम्, खीजी लोमिंबै ताँ क्ह्रोंसेंन्बै ग, स्‍योर आङिं। छतसि पबित्र प्ल्हजी लोमिंबै ताँमैं ङिंनु, धै छ्ह तिगोंन् ख्रीष्‍टनेन् घ्रिन् तसि प्रद्।

दर्शन 1:1

येशू ख्रीष्‍टजी उँइँमिंबै ताँमैं, तारे युनन् तखबै ताँमैं खीए के लब्‍मैंइ क्होरिगे बिसि परमेश्‍वरजी येशूलाइ चु ताँ पिंब् ग। येशूजी खीए सेवा लबै म्‍हि यूहन्‍ना ङाँर खीए स्‍वर्गदूत कुल्‍मिंसि चु ताँमैं बिमिंइ।

दर्शन 2:24

“दिलेया क्‍हेमैं न्होंर ईजेबेलए लिलि आप्रबै म्हिमैं मुँ। को-कोइ म्‍हिमैंइ चइ लोमिंबै ताँमैंलाइ ‘दुष्‍टए गैरु ताँ ग’ बिलेया क्‍हेमैंइ च ताँ आलोइमुँ। छतसि ङइ क्‍हेमैंने बिमुँ, ङइ क्‍हेमैंए फिर अरू दु:ख पिंरिब आरे।