रोमियों 11:22 - Garhwali

²² अर यां से इन पता चलदु कि परमेस्वर कथगा निठुर अर कथगा दया करण वळु च। अर जु लोग वेकी आज्ञा को पालन नि करदिन ऊंतैं वु निठुर सजा देन्दु, मगर जथगा भि लोग वेकी आज्ञा को पालन करदिन ऊंकी भलै करणु खुणि उ सदनि अगनै रौन्दु। इलै अगर जु तुम लोग वेकी आज्ञा को पालन नि करिल्या, त तुमरि हालत भि जैतून का ऊं फौंकों का जन ह्‍वे जाण जौं तैं तोड़ि के अलग किये गै।

गढवली नयो नियम

²² इलै, तुम तैं यां पर ध्यान दींण चयणु च! परमेश्वर की मयलदु-पन अर कठोरता तैं, जु गिरी गैनी, ऊं पर कठोरता, पर तुम पर दया त हवे, तुम वेकी दया मा बंणयां रा, नथिरी तुम भि कटै जैला।

रोमियों 11:22 ပူးပေါင်းရင်းမြစ်များ

लूका 8:15

अर अच्छी जमीन मा पोड़यां बीज वु लोग छिन जु परमेस्वर का वचन तैं सुणी के वेतैं अपणा अच्छा अर आज्ञा मनण वळा मन मा समाळि के रखदिन, अर सबर रखी के अच्छा फल लेके औन्दिन।”

यूहन्ना 15:2

अर ज्वा फौंकि मि मा च अर अगर वीं पर फल नि लगदिन त वींतैं उ काटी देन्दु, अर ज्वा फळदि च वींतैं उ छाँटदु च, ताकि वे पर और भि जादा फल लगा।

यूहन्ना 8:31

तब यीशु न ऊं यहूदियों बटि जौन वे पर बिस्वास कैरी, ऊंकू बोलि, “अगर तुम मेरा वचनों का मुताबिक जीवन बितैल्या, त सच्‍चि मा मेरा चेला ह्‍वेल्या।

खास चेलों 11:23

अर बरनबास एक अच्छु बिस्वासी, पवित्र आत्मा से भरपूर अर एक भलु मनखि छौ। अर जब उ अन्ताकिया नगर मा पौंछी, अर लोगु पर होईं परमेस्वर की किरपा तैं देखि के बड़ु आनन्दित ह्‍वे, अर वेन ऊंतैं ईं बात की शिक्षा दिनी कि वु सब लोग पूरा मन से प्रभु मा बणयां रा, अर एक बड़ी भीड़ प्रभु पर बिस्वास करण लगि गै।

खास चेलों 14:22

अर बिस्वासी लोगु तैं ऊंका बिस्वास मा मजबूत कैरी, अर बिस्वास मा बणयूं रौणु खुणि ऊंकी हिम्मत भि बढै अर ऊंन ऊंकू बोलि, “हमतै बड़ु दुख झेली के परमेस्वर का राज मा जाणु पोड़लु।”

रोमियों 11:21

किलैकि जब पिता परमेस्वर न डाळा का असली फौंक्यों तैं नि छोड़ि, त तुम क्या चीज छाँ?

रोमियों 2:7

जु लोग लगातार भलै का काम करण मा, पिता परमेस्वर की बडै करण मा, अर सदनि का जीवन की खोज मा लग्यां रौनदिन, पिता परमेस्वर ऊंतैं सदनि को जीवन द्‍यालु।

1 कुरिन्थि 15:2

अर जु वचन तुमतै दिये गैनी ऊं वचनों तैं याद रखा। अर अगर जु तुम वामा मजबूत नि बणयां रैल्या, त फिर तुमतै कनकै बचयै जालु। अर अगर जु तुम इन नि करिल्या फिर त इन समझा कि तुमरो बिस्वास कन भि बेकार च।

गलातियों 6:9

इलै हमतै भलै का काम करण मा पिछनै नि हटण चयेणु, किलैकि अगर जु हम सभ्यों का दगड़ा मा भलै कना रौला, त ठिक बगत पर लवै करुला।

1 थिस्सलुनीकी 3:5

अर ईं ही वजै से जब मि बटि और नि रये गै, त मिन यू जनणु खुणि कि तुम बिस्वास मा बणयां छाँ की ना, तीमुथियुस भै तैं तुमरा पास भेजि। अर इन मिन इलै कैरी, ताकि इन पता चलि जौ कि कखि शैतान जु की भकलौण वळु च वेन तुमतै अपणी बातों से भकलै हो, अर हमरि पूरि मेनत बेकार चलि ह्‍वे गै हो।

1 थिस्सलुनीकी 3:8

किलैकि जब तक तुम बिस्वास मा मजबूत बणयां रैल्या, तब तक हमरु भि ज्यू मा ज्यू बणयूं रौन्दु।

इब्रानी 10:23

अर वीं आस तैं अपणा-अपणा जीवन मा बणै के रखा जिं पर हमतै पूरु यकीन च, किलैकि जु करार पिता परमेस्वर न हमरा दगड़ा मा कर्युं च वु जरुर पूरु होलु।

इब्रानी 3:14

हे मेरा दगड़्यों, हम सभ्या का सभि यीशु मसीह का दगड़ा मा हिस्सेदार छां, इलै हमतै आखिरी तक अपणा बिस्वास तैं मजबूत बणै के रखण चयेणु, ठिक उन्‍नि जन हमुन शुरुवात मा रखी छौ।

इब्रानी 3:6

मगर यीशु मसीह पिता परमेस्वर को पुत्र होण का नाता भरोसा का लैख च। अर हम लोग जु कि यीशु मसीह पर बिस्वास करद्‍यां, अगर जु हम अपणी आस अर भरोसा वे पर बणै के रखद्‍यां, त हम पिता परमेस्वर का घौर का छां।

1 यूहन्ना 2:19

असल मा यू लोग हमरा बीच मा बटि ही निकळि के ही ऐनी, मगर वु हमरा अपणा लोग नि छिन किलैकि अगर जु वु हमरा अपणा लोग होन्दा त वु हम दगड़ा मा रौन्दा। मगर ऊंन त हमतै छोड़याली, अर ऊंको इन करण से यू साबित ह्‍वे गै, कि ऊ हमरा अपणा लोग नि छिन।

दिब्य दरस 2:5

अर याद कैरा कि तुम पैलि कथगा प्यार करदा छा मगर अब तुमरो प्यार फिको पोड़ि गै, इलै मन से पस्ताप कैरा अर पैलि जन काम कैरा। अर अगर जु तुम पस्ताप नि करिल्या, त मिन तुमरा पास ऐके तुमरा दीपदान तैं वेकी जगा बटि हटै देण।