खास चेलों 1:13 - Garhwali

¹³ अर जब यू लोग यरूशलेम नगर मा ऐनी, त वे घौर का मंज्यूळ मा गैनी जख यू सब रुक्यां छा। अर यों लोगु का नौ इन छिन, पतरस, यूहन्‍ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई को नौनु याकूब, शमौन जेलोतेस, अर याकूब को नौनु यहूदा।

गढवली नयो नियम

¹³ जब उ शहर मा पौंछिनी त वीं मथि का कोठरी मा गैनी। यूं प्रेरित पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई को नौंनो याकूब, शमौन जु रोमी कानून को विरोधी छो अर याकूब को नौंनो यहूदा जु उख उपस्थित छा।

खास चेलों 1:13 ပူးပေါင်းရင်းမြစ်များ

मत्ती 9:9

अर जब यीशु उख बटि अगनै जाणु छौ, त वेन मत्ती नौ का एक मनखि तैं चुंगी लेण वळो की चौकी मा बैठयूं देखि। तब यीशु न वेकू बोलि, “मेरा दगड़ा मा चल अर मेरु चेला बणि जा।” अर उ उठी के वेका पिछनै चलि गै।

मरकुस 14:15

तब उ मनखि तुमतै मंज्यूळ मा तयार कर्युं एक बड़ु कमरा दिखालु, अर तुम उखि खाण की तयारी कैरा।”

मरकुस 14:33

तब यीशु अपणा दगड़ा मा पतरस, याकूब अर यूहन्‍ना तैं लेके गै, अर उ भौत उदास ह्‍वे गै अर हकबकौण लगि गै।

मरकुस 2:14

अर जब यीशु उख बटि जाणु छौ, त वेन चुंगी लेण वळो की चौकी मा एक मनखि तैं बैठयूं देखि, वेको नौ लेवी छौ अर उ हलफई को नौनु छौ। तब यीशु न वेकू बोलि, “मेरा दगड़ा मा चल अर मेरु चेला बणि जा।” अर उ उठी के वेका पिछनै चलि गै।

मरकुस 5:37

अर यीशु न पतरस, याकूब अर वेका भै यूहन्‍ना का अलावा और कैतैं भि अपणा दगड़ा मा औण नि दिनी।

मरकुस 9:2

अर यों सब बातों का छह दिन का बाद यीशु अपणा चेलों मा बटि पतरस, याकूब अर यूहन्‍ना तैं अफ दगड़ि एक ऊँचा ढौंडा पर इखुली लि गै। अर उख ऊंका समणि वेको रुप बदलि गै,

लूका 22:12

तब उ मनखि तुमतै मंज्यूळ लि जालु, अर तयार कर्युं एक बड़ु कमरा दिखालु। अर तुम खाण की तयारी उखि कर्यां।”

यूहन्ना 11:16

तब थोमा न जैकू जौंळ्या भि बुले जान्दु, वेन अफ दगड़ा का चेलों कू बोलि, “चला, हम भि वेका दगड़ा मा मुरणु कू चलद्‍यां।”

यूहन्ना 14:22

तब यहूदा न (जु इस्करियोती नि छौ) यीशु कू बोलि, “प्रभु, तुम केवल हमतै ही दरसन किलै दिखाण चाणा छाँ? पर दुनियां का लोगु तैं किलै ना?”

यूहन्ना 18:17

तब पैरा देण वळी जनानि न पतरस कू बोलि, “कखि तू भि वे मनखि का चेलों मा बटि त नि छैई?” वेन बोलि, “ना, मि नि छौं।”

यूहन्ना 21:2

एक दिन शमौन पतरस, अर थोमा जैकू जौंळ्या भि बुल्दिन, अर गलील मुलक का काना गौं को नतनएल, अर जबदी का दुई नौना अर यीशु का दुई और चेला भि जमा होयां छा।

खास चेलों 12:17

तब पतरस न ऊंतैं चुप रौण खुणि हाथळ इसारा कैरी, अर वेन सभ्यों तैं बतै कि प्रभु न वेतैं कनकै जेलखाना बटि भैर निकाळि। अर वेन ऊंकू बोलि, “यू सब बात याकूब अर दुसरा बिस्वासी भै-बैंणो तैं भि बतै दियां।” तब उ उख बटि निकळि के दुसरि जगा कू चलि गै।

खास चेलों 15:13

पौलुस अर बरनबास की गवै खतम होण का बाद याकूब न बोलि, “हे मेरा भै-बैंणो मेरी बात तैं सुणा,

खास चेलों 2:14

तब पतरस ऊं ग्यारा चेलों का दगड़ा मा खड़ु ह्‍वे अर ऊँची आवाज मा ऊं लोगु कू बोन्‍न लगि गै कि, “हे यहूदियों अर यरूशलेम मा रौण वळा सब लोगु, कन्दूड़ खोली के मेरी बात तैं सुणा अर तुम यू जाणि ल्या कि,

खास चेलों 2:38

तब पतरस न ऊंकू बोलि, “अपणा-अपणा पापों बटि पस्ताप कैरा अर पापों बटि माफी पौणु खुणि तुम मा बटि हरेक मनखि यीशु मसीह का नौ से बपतिस्मा ल्यो, अर तब तुमतै पवित्र आत्मा को दान मिललु।

खास चेलों 20:8

अर हम सब तीमंजिल मा इकट्‍ठा होयां छा अर उख भौत सा द्‍यू बळयां छा।

खास चेलों 4:13

अर यों लोगु न पतरस अर यूहन्‍ना तैं बड़ी हिम्मत से बुलण देखि, अर जब यों तैं पता चलि की यू अनपढ़ अर साधारण मनखि छिन, त यू लोग ताजुब मा पोड़ि गैनी। तब वु लोग यों तैं पछ्याण गैनी कि यू उई छिन जु कि यीशु का दगड़ा मा रौन्दा छा।

खास चेलों 4:19

अर ऊंन ऊंतैं जबाब दिनी, “चला, अब तुम ही बता, कि परमेस्वर की नजर मा क्या ठिक च। क्या परमेस्वर का छौन्द, हम वेकी बात तैं माणा या तुमरि?

1 कुरिन्थि 15:7

अर येका बाद उ याकूब भै तैं दिखै, अर फिर सब खास चेलों तैं भि दिखै।

गलातियों 1:19

अर उख मेरी मुलाकात प्रभु यीशु का भै याकूब से ह्‍वे, अर वेका अलावा मेरी मुलाकात कै दुसरा खास चेला का दगड़ा मा नि ह्‍वे।

गलातियों 2:9

अर जब भै याकूब, कैफा अर यूहन्‍ना जु कि बिस्वासी समुदाय का खम्बा मणै जनदिन, जब वु वीं किरपा का बारा मा जाणि गैनी ज्वा कि मि पर होईं च, तब ऊंन मितैं अर बरनबास भै तैं परमेस्वर की सेवा मा ऊंकी मदद करण वळो का रुप मा स्वीकार कैरी। अर ऊंन हमतै ऊं लोगु का बीच मा सेवा करणु कू भेजि जु यहूदी जाति का नि छिन, अर खुद वु यहूदी लोगु का बीच मा सेवा कना रैनी।

याकूब 1:1

हे मेरा भै-बैंणो, मि परमेस्वर अर प्रभु यीशु मसीह को सेवक याकूब छौं। अर पूरि दुनियां मा तितर-बितर होयां इस्राएल का बारह गोत्र का बिस्वासी लोगु खुणि या चिठ्‍ठी लिखणु छौं। तुम सभ्यों कू मेरु सलाम।

2 यूहन्ना 1:1

हे मेरी प्यारी बैंण, मि यूहन्‍ना जु की एक अध्यक्ष छौं, मि या चिठ्‍ठी त्वे खुणि अर तेरा बच्‍चों खुणि लिखणु छौ, तुम जु कि पिता परमेस्वर का द्‍वारा चुण्यां छा मि तुम से भौत प्यार करदु। अर केवल मि ही ना, बल्किन मा वु सब त्वेसे प्यार करदिन जु कि सच्‍चै तैं जणदिन।

यहूदा 1:1

हे मेरा भै-बैंणो मि यहूदा छौं, अर मि यीशु मसीह को सेवक अर याकूब को भै छौं। मि या चिठ्‍ठी तुम लोगु खुणि लिखणु छौं जौं तैं पिता परमेस्वर न बुलै, किलैकि पिता परमेस्वर तुम लोगु से भौत प्यार करदु। अर वेन तुम सभ्यों तैं यीशु मसीह की हिफाजत मा रख्युं च।