1 कुरिन्थि 4:12 - Garhwali

¹² अर अपणा हाथोंळ बड़ी मेनत कैरिके थकी जन्द्‍यां। अर फिर भि लोग हमरु अपमान करदिन, मगर हम ऊंतैं आसीस देन्द्‍यां। अर वु लोग हमतै सतौन्दा छिन, मगर हम ऊंकी सौन्द्‍यां।

गढवली नयो नियम

¹² अर अपड़ा ही हथों का परिश्रम का द्वारा काम करदां; लोग बुरो बुल्दींनि, हम ऊं तैं आशीष दींदयां; उ हम तैं सतांदा छिनी, अर हम सौंदा छा।

1 कुरिन्थि 4:12 ပူးပေါင်းရင်းမြစ်များ

मत्ती 5:11

“अर धन्य छाँ तुम, किलैकि जब लोग मेरी वजै से तुमतै बदनाम करला, अर तुमतै सताला अर झूठ्‍ठ बोलि-बोलि के तुमरा खिलाप मा बन्‍नि-बन्‍नि किसम की बात बुलला,

मत्ती 5:44

पर मि तुमतै बतै देन्दु, कि अपणा दुसमनों बटि भि प्यार कैरा, अर जु लोग तुमतै सतौणा छिन ऊं खुणि प्रार्थना कैरा।

लूका 23:34

तब यीशु न बोलि, “मेरा पिता, यों तैं माफ कैरी द्‍या, किलैकि यों तैं पता नि च कि यू क्या कना छिन।” अर ऊं सिपयों न पांसा डालि के वेका कपड़ा आपस मा बांट दिनी।

लूका 6:28

अर जु तुमतै असगार देन्दिन तुम ऊं खुणि परमेस्वर बटि आसीस मांगा। अर जु तुमरा दगड़ा मा अच्छु बरतौ नि करदिन, ऊं खुणि प्रार्थना कैरा।

यूहन्ना 15:20

“इलै मिन जु तुम बटि बोलि, वेतैं याद रखा कि, ‘नौकर अपणा मालिक से बड़ु नि होन्दु।’ इलै जब ऊंन मितैं सतै त उ तुमतै भि सताला, ठिक उन्‍नि अगर ऊंन मेरी बात माणी त वु तुमरि बात भि मणला।

खास चेलों 18:3

अर पौलुस ऊंका दगड़ा मा मिली के काम करण लगि गै, किलैकि पौलुस अर यों दुईयों को एक ही काम-धन्धा छौ, अर उ तम्बू बणौण को काम करदा छौ।

खास चेलों 20:34

अर तुम लोग त जणदा ही छाँ, कि मिन मेहनत कैरिके अपणु अर अपणा दगड़्यों की सब जरुरतों तैं पूरु कैरी।

खास चेलों 7:60

फिर वेन घुंडा टिकनी अर चिल्‍लै के बोलि, “मेरा प्रभु, ये पाप को दोष यों पर नि लग्यां” अर इन बोलि के वेन ईं दुनियां तैं छोड़ि दिनी।

रोमियों 12:14

अर ऊं लोगु तैं आसीस द्‍या, जु तुमतै सतौन्दा छिन, हाँ आसीस ही द्‍या कैतैं असगार नि द्‍या।

रोमियों 12:20

अर पवित्रशास्‍त्र मा इन्‍नि भि लिख्यूं च कि, “अगर तेरु दुसमन भूकि च, त वेतैं खाणुक खिलै। अर अगर जु वु तिसळु च, त वेतैं पाणि पिलै। किलैकि इन करण से तू वेतैं दोषी साबित कैरी दिली, अर वेतैं खुद पर बड़ी सरम आली।”

रोमियों 8:35

अब कुई भि हमतै यीशु मसीह का प्यार से अलग नि कैरी सकदु, नऽ त कुई दुख-तकलीफ, ना ही कुई सतौ, नऽ त अकाळ, अर ना ही कपड़ों की कमी जु की हम नंगा ह्‍वे जा। अर नऽ त नुकसान पौछाण वळु कुई खतरा हमतै वेका प्यार से अलग कैरी सकदु, अर ना ही मौत हमतै वेसे अलग कैरी सकदी।

1 कुरिन्थि 9:6

अर क्या हम मा यू हक नि च कि हम अपणा गुजर-बसर खुणि कमै कैरा?

2 कुरिन्थि 11:8

अर मिन बिस्वासी समुदाय का दुसरा लोगु से दान मांगि, ताकि तुमरा बीच मा काम कैरी सैकु त क्या मिन कुछ गळत कैरी? मगर कुछ लोग इन बुल्दिन कि मिन तुमरा खातिर दुसरा लोगु तैं लूटी।

इफिसुस 4:28

इलै सुणा, जु चोरी करदु उ अब से चोरी नि कैरो, बल्किन मा अपणा हाथोंळ भलै का काम कैरो, ताकि जरुरतमन्द लोगु की मदद करणु खुणि वेका पास कुछ हो।

1 थिस्सलुनीकी 2:9

हे मेरा भै-बैंणो, तुमतै हमरि कठिन मेनत अर हमरि ध्याड़ि करण जरुर याद होलि। जब हमुन तुमतै परमेस्वर को शुभ समाचार सुणै त अपणी जरुरतों तैं पूरु करणु खुणि हमुन दिन-रात काम-काज कैरी, ताकि हम तुम मा बटि कै का मथि भि भारु नि बणा।

2 थिस्सलुनीकी 3:8

अर हमुन मुफत मा कै की रुट्‍टी नि खै, पर दिन-रात खून पसीना बुगै के मेनत कैरी, ताकि कै खुणि हम भारु नि बणि जां।

1 तीमुथियुस 4:10

इलै हम कठिन मेनत करद्‍यां, किलैकि हम ज्यून्दा परमेस्वर पर अपणी आस रखद्‍यां, जु की सब लोगु तैं बचौण वळु च, खास कैरिके ऊं लोगु तैं जु की वे पर बिस्वास करदिन।

1 पतरस 2:23

वेन गळी का बदला मा कैतैं गळी नि देई, अर ना ही वेन दुख का बगत मा कैतैं धमकी देई, बल्किन मा वेन खुद तैं परमेस्वर का हाथों मा सौंपी दिनी, जु कि सच्‍चै से न्याय करदु।

1 पतरस 3:14

अर अगर जु तुम अच्छा काम करण का बदला मा दुख सौन्द्‍यां, त तुम धन्य छाँ। अर जु लोग तुमतै डऽरौन्दा या धमकौन्दा छिन ऊं से नि डऽरयां अर ना ही घबरयां।

1 पतरस 3:9

बुरै का बदला मा बुरै नि कैरा अर ना ही गळी का बदला मा गळी द्‍या, मगर इन्द्रया लोगु तैं बदला मा आसीस ही द्‍या, किलैकि पिता परमेस्वर न तुमतै यां खुणि ही बुलयूं च, ताकि तुम आसीस का वारिस बणि जा।

1 पतरस 4:19

इलै जु लोग परमेस्वर की इच्छा का मुताबिक दुख उठाणा छिन, तुम भलै का काम कना रा, अर अपणा पराणों तैं वे भरोसामन्द पिता परमेस्वर का हाथों मा सौंपी द्‍या, जु कि दुनियां तैं बणौण वळु च।

यहूदा 1:9

मगर जब मूसा रैबर्या की लांश का बारा मा परधान स्वर्गदूत मीकाईल की शैतान का दगड़ा मा बहसबाजी ह्‍वे, त मीकाईल स्वर्गदूत न इळजाम लगै के शैतान की बेजती नि कैरी, वेन त बस इथगा बोलि कि, “प्रभु ही त्वेतै झिडकु।”