PAWTDAWKNA 13:3 - PATHIEN LEKHABU THIENGTHO (BSI)

³ Chun, Mosi’n mipite kawm achun, “Aigupta te suok apat a na pawt niu tuni hi hezing un; zie ni hin Lalpa’n a thilhih theihna’n nang uh a hun puidawk a: chângthâk chawl kisawh himhim chuh na nek loh dinguh ahi.

PAWTDAWKNA 13:3 ပူးပေါင်းရင်းမြစ်များ

THILSIEMBUL 15:16

Chun, a khang lina achun na suonte chuh zie gam ahin hungkit in au; a ziek chuh Amor mite gitlohna chuh a tungkim tadih puoh ngâl a,” a ti a.

1 LENGTE 8:42

ziehaw chun zie In lam hi nga a a hung paucham tieng u leh, (na min lopi tak leh, na khut hattakte, na bân na zak thute hi hun he hawn ding ahi ngâl u a;)

1 KHANGTHUBU 16:12

A thilmak hih lopitakte chu hezing unla; A thilhihte leh a kama a vaihawm na thu pawt te chuh.

NEHEMIA 1:10

Chun, ziehaw hi na suok te leh na mite, na thilhih theihna nasa tak leh na khut hattak a na puihdawk te ahiu hi.

NEHEMIA 9:10

Tichun, Pharaoh leh a suokte leh a gama mi chengcheng te chungah melchikna leh thilmak haw na latsak a. Chapo taka a chung u a thil a hih teu chuh na he a, tichun, tuni tieng hin min in na nei ta a.

SAM LEHKHABU THE PSALMS 105:5

A thilmak hih haw leh a thilhih lamdang te leh, A kama vaihawmna chuh hezing un.

SAM LEHKHABU THE PSALMS 114:1

Israel te chuh Aigupta a kipatin a pawt u a, Jakob inkawte ngêi chu pau hetloh lak ah a pawt lai u khan.

SAM LEHKHABU THE PSALMS 136:11

A lak u a pata Israel puidawkpa kawm achun: A zahngaihna chuh kumlekhuo a um ding ahi ngâl a.

SAM LEHKHABU THE PSALMS 136:12

Khut hât leh bân zaka puidawkpa kawm achun: A zahngaihna chuh kumlekhuo a um ding ahi ngâl a.

SAM LEHKHABU THE PSALMS 89:14

Diktatna leh vaihawmna chu na lalchutphah kingakna ahii: Zahngaihna leh thutak chu na masangah a chieh sek hi.

PAWTDAWKNA 12:15

Chun, “Ni sagih sung chuh chângthâk chawl sawhloh na nek ding uh ahi a: ni khat ni apat chun na insung u apat chawl chuh na thielngim suok dinguh ahi: kuole ni khat ni apat a ni sagih ni chana chângthâk chawl sawh ne taphawt chuh, zie mite chuh Israel te lak apat a satthak hi’nau.

PAWTDAWKNA 12:17

Chun, chângthâk chawl sawhloh guolvak ni chuh na nit ding uh ahi, zie ni ngêi chun Aigupta gam apat in mipi haw chuh ka puidawk ngâla; zieziekchun na suonteu chan a kumkhuo thugawlh a um zing dingin zie ni chuh na nit ding uh ahi.

PAWTDAWKNA 12:19

Ni sagih sung chuh na insung u ah chawl himhim a um loh ding ahi:

PAWTDAWKNA 12:2

“Tu tha hi nang uh dingin kum khat sunga tha sim patna hi’n a.

PAWTDAWKNA 12:41

Chun, hiti hi ahi a, kum zali leh kum sawmthum a hung beih phetin Lalpa mipite chengcheng chuh Aigupta gam apat chun a pawt tau a.

PAWTDAWKNA 12:42

Zie zan chuh Lalpa’n Aigupta gam apat a amau haw a puihdawk zan ahi a, a nit thiengtho dinguh ahi a; Israel chate chun akhang akhang a zah taka a nit toh zing dinguh ahi.

PAWTDAWKNA 12:8

Chun, belam no sa chuh zie zan ngêi achu a nek dinguh ahi a; em min un tin, chângthâk chawl sawhloh tawh hampa kha tawh a meh dinguh ahi.

PAWTDAWKNA 13:14

Chun, hiti hi hung hi’n tin hun hungtung dinga na chapateu in, ‘Ziehi bangti dân ahi?’ ti a a hun dawt tak u leh, nang un a kawm u ah, ‘Khut hattak in Lalpa’n Aigupta gama suok a ka um u khah ei puihdawk ahi:

PAWTDAWKNA 13:9

Lalpa Dan chuh na kam u a a um zing theihna ding in, na khut u a melchikna leh, na mit u kikala hetzingna guola na neih ding uh ahi, khut hattak a Lalpa’n Aigupta gama pata a thilhih theihna a a hun puihdawk na hiu hi.

PAWTDAWKNA 20:2

“Kei, Lalpa na Pathien uh, Aigupta gama suok apat a hun puidawkpa chuh ka hi.

PAWTDAWKNA 20:8

“Chawlhni hi thiengtho taka nit ding ahi tih hezing in.

PAWTDAWKNA 23:15

Thu ka hun piek bangin, Aigupta gam na nutsieh kum uh, Abib tha chun chângthâk chawl sawhloh kut ni sagih na mat ding uh ahi. Zie kut sung ni sagih chuh chângthâk chawl tel himhim na nêk loh dinguh ahi. Tichun, ka ma ah kuomah khutngawn a na hung kilat loh dinguh ahi.

PAWTDAWKNA 3:20

Tichun ka khut zak ing ka ting, Aigupta te chunga thil lauh-um ka hih ding chengcheng chun gawt ing ka, zie tieng chuleh vang hun pawtsak ta’n a.

PAWTDAWKNA 34:18

“Chângthâk chawl sawhloh kut na neih ding uh ahi. Thu ka hun piek tâksa bang khan, ni sagih sung chuh, chângthâk chawl sawhloh, Abib tha a hun guot a chuh na nek ding uh ahi; zie tha khan Aigupta gam apat a hung pawt na hi ngâl u a.

PAWTDAWKNA 6:1

Chun, Lalpa chun Mosi kawmah, “Tu’n vang lengpa chunga ka hih ding chuh mu ta ding na hi, khut hattak ziekin ka mite chuh pawtsak intin, chun, khut hât tak ziek chun amau haw chuh a gam apat chun nawhdawk ina,” a ti a.

PAWTDAWKNA 6:6

Zieziekchun Israel chate kawm achun, ‘Kei Jehovah chuh ka hi a, hun hukdawk ing ka ting, Aigupta te suok a na umnau apat hin hun suohchak sak ing ka. A chung u a gawtna lauh-um tak a tun theihna dingin bân zak hiel in hun hukdawk ing ka.

PAWTDAWKNA 6:7

Chun, ka mi dingin nanguh hun nei ing ka ting, nang uh dingin na Pathien uh hi’ng ka. Tichun kei hih Jehovah na Pathien uh, Aigupta suok a pata hun puidawkpa ka hi tih he’n lau.

PAWTDAWKNA 7:4

Himahlele Pharao’n na thuu pawm nuom puo’n tin, Aigupta chung ahin gawtna tunsak ing ka ting, ka mi Israel chate, ka mipite hi Aigupta gam apat chun puidawk ing ka.

JEREMIA 34:13

Lalpa Israel Pathien chun hiti hin a tii: “Aigupta gam apat na pileputeu ka hun puihdawk ni khan kitiemna ka nei u a.

DANIEL 9:15

“Chun, tuhin, Aw Lalpa ka Pathien uh, Aigupta gam apat a khut hât tak leh thilhih thei taka na mite puidawkpa leh minthanna leh minphatna tuchana kisiempa, ka gilo tau a, nunsie takin thil ka na hih tau hi.

MATTHAI 10:12

Chuleh, In a chuh na lut ding tieng u leh chibai unla.

LUKE 22:19

Chun, chângthâk a la a, kipah thu a gen zawhin a phelsuoh a, a kawm u ah a pie a, “Ziehi ka sapum, na sik u a piek ding chuh ahi, nei hetzingnau in zie hi hih sek un,” a ti a.

1 KORINTH 11:24

“Ziehi, ka sapum, na sik uh a piek ding chuh ahi. Kei nei hetzingnau in ziehi hih sek un,” a tih khah.

1 KORINTH 5:8

Zieziekchun, Kut hitiu, gitlohna leh nunsietna chawl luia Kut lo in; thienthona leh dikna chângthâk chawl buok loh in Kut zawi tiu.

EPHESI 1:19

amah gingchate chunga a thilhih theihna lopi ziehaw tawh. Zie thilhih theihna, eihaw a sem pên chuh,

DAN NIHNA 13:10

Suong a na sehlup dinguh ahi, Aigupta gam apat a suok a na tânnau apat hun puidawk Lalpa na Pathien u apat hun puih mang a guot ziekin.

DAN NIHNA 13:11

Khutichun Israel mi chengcheng in he’n tin un, lau intin un, zie tawbang thil phalo himhim chuh na lak u ah kuoma’n hih kit ta puo’n au.

DAN NIHNA 13:5

Chun, zie thiemgau ahim, mang leh thei ahim chuh suklup ding ahi. Aigupta gam apat hun puidawk a, suok apat hun tandawk Lalpa na Pathien un hawh ding thu a hun piek lampi apat chuh hun petmang sak dinga Lalpa na Pathien u chunga helna thu a gen ziekin. Zie tawbanga chuh na laku a thil phalo chuh na sukmang dinguh ahi.

DAN NIHNA 13:6

Na suohpih ahim, na chapa ahim, na chanu ahim, na pawmlai na zi ahim, na guol phapen ahim in na pileputeu ho khâk loh pathien dang ho dingin a hun thêm thei u a,

DAN NIHNA 15:15

Aigupta gama khan suok na hi tau a, Lalpa na Pathien un a hun tatdawk na hiu hi tih hi na hetzing dinguh ahi; ziezieka chuh zie thu hi ka hun piek ahi.

DAN NIHNA 16:1

Abib tha chuh umnit unla, Lalpa na Pathien u dingin Chiehkân Kut chuh lawm un: Abib tha hin ahi Lalpa na Pathien un Aigupta gam apat a hun puih dawk chuh.

DAN NIHNA 16:12

Aigupta gama khan suok na hiu hi tih na hetzing dinguh ahi a; chun, zie dân haw hi chingthei taka na zuih dinguh ahi.

DAN NIHNA 16:3

Chângthâk chawl kisawh tawh na nek dinguh ahi puoi; ni sagih sung chângthâk chawl sawhloh, gimtheihna chângthâk, chuh na nek dinguh ahi zawi, kinlebuong a Aigupta na nutsieh lai u a na nek u tawbang kha; khutia chuh na damsung cheng u a Aigupta na nutsieh niu kha na hetzing theihna dingun.

DAN NIHNA 24:18

Nang u le Aigupta gama khan suok na hiu a, Lalpa na Pathien un zie apat chuh a hun tatdawk na hiu hi tih hi na hetzing dinguh ahi; ziezieka chuh zie hih dinga chuh thu ka hun piek ahi.

DAN NIHNA 24:22

Aigupta gama khan suok na na hiu hi tih hi na hetzing dinguh ahi; zieziekchun ahi zie hi hih dinga thu ka hun piek chuh.

DAN NIHNA 26:8

Chun, Lalpa chun Aigupta gam apat chun khut hât tak leh bân zak in, thil lauh-um nasatak tak leh melchikna haw leh thilmak haw mang in ei na puidawk ta a,

DAN NIHNA 4:34

Ahihloh leh, Lalpa na Pathien un Aigupta gama na mitmuh ngêi u a a hih guola patepnate, thilmakte manga nam dang lak apat amah dinga nam khat puihdawk guo pathien a um kha mawng mawng em?

DAN NIHNA 5:15

Nang le Aigupta gama khan suok na hi ta a, Lalpa na Pathien in zie apat chuh khut hattak leh bân zaka a hun puihdawk na hi tih hezing in; ziezieka chuh Lalpa na Pathien in chawlhni nit thiengtho ding thu a hun piek ahi.

DAN NIHNA 5:6

“Kei hi Lalpa na Pathien uh, Aigupta suok apat hun puidawkpa chuh ka hi.

DAN NIHNA 6:12

Chingthei takin um un, khutilochun, Aigupta suok apat hun puidawk Lalpa chuh hengilh zieng kha’n lau.

DAN NIHNA 6:21

Nangun na chateu kawmah, ‘Aigupta gam ah Pharaoh suok ka na hiu a, Lalpa’n Aigupta gam apat chun khut hât takin ei na puidawk a;

DAN NIHNA 7:8

Lalpa’n a hun hehpih ziek leh na pileputeu kawma a na kihâksielna chuh sukpitin a nawp ziekin ahi zaw a puo Lalpa’n Aigupta lengpa Pharao khut apat khut hattak a suok apat a hun tatdawk chuh.

DAN NIHNA 8:14

Na lunggil teu hung chapo in, Aigupta apat, suok a tânna gam apat hun puidawkpa, Lalpa na Pathien u chuh hengilh mai in lau;

DAN NIHNA 9:12

“Chun, Lalpa chun ka kawmah, ‘Kipan inla, zie apat hin chieh suk meng ah; Aigupta gam apat a na puihdawk, na mite chuh a kisusie zo tau khu; hawh dinga thu ka piek lampi apat chun kintakin a pet tau a, milim pathien a kisiem tau khu,’ a ti a.

JOSHUA 24:17

Amah Lalpa ka Pathien uh ngêi in a puo, kei uh leh ka pulepateu tawh Aigupta gama suok apat a ei puidawk a, ka mitmuh u a melchikna nasatak tak haw hih a, ka chieh na cheng u leh, ka hawhpai nau ale mipi chengcheng ei vengbit zel pa chuh;

VAIHAWMTE 2:12

Chun, Lalpa a pileputeu Pathien, Aigupta gam apat a puidawkpa kha a kiheimang san u a, pathien dang, a kiengvêl u a umte pathien chuh a zui u a, chibai a bûk tau a; tichun, Lalpa chuh a sulungna tau a.

VAIHAWMTE 6:8

Lalpa’n Israel chate lak achun thiemgau a hun sawl a; amah chun a kawm u ah, Lalpa Israel te Pathien in hitihin a tii, “Aigupta gam apat chuh ka hun puidawk a, saltanna mun apat a ka hun puihdawk na hiu hi.