ISAI 24:6 - PATHIEN LEKHABU THIENGTHO (BSI)

⁶ Zieziekchun, lei hi Pathien in hansie a buok khum ta a, a luohte thilhih ziek ngeia thiemloh chansakin a um tai. Zieziekchun, atawm deuh deuh u a, mi tawmcha mai nutsieh in a um tau hi.

ISAI 24:6 ပူးပေါင်းရင်းမြစ်များ

MALAKI 4:1

Ngaitiem u, ni chuh hungtung ding ahi, “Mi kiletsakte leh mi gilote chengcheng buhpawl banga a kâktum ni hungtung ding ahi tai! Zie ni chuleh, katum vek in tin a zung leh a bâkte le sit hiel puo’n a, Bangkim hihthei Lalpa chun a tii.

MATTHAI 7:14

Hinna a chiehna kawt chuh a chîp a, a lampi le a tiek a, a mute le tawmcha ahiu hi.

ROME 9:27

Isai inle Israel mite thu kikopih in, “Israel mite chuh tuisuohgiet pîlnel zat in tam mahleu le, a gawt mâwkte mai chuh hukdam in um un au.

MALAKI 4:6

Amah chun, pate lungthim chuh chate lam ah, chun chate lungthim chuh pate lama kihei sak ina. Khutilochun hung ing ka ting lei hi hansie’n gawt khang ka ie” ti’n.

THIEMPUDANTE 26:22

na laku ah gamsa lauh-um tak hun sawl ka ting, na chateu that untin, na ganguolteu hun peh sak un tin; tawmcha mai nutsieh in um un na tin, na lampiteu chuh hung thip dil del ina.

2 PETER 3:10

Himahlele, Lalpa Ni chuh gucha bangin hungtung tei ina. Zie Ni chu leh, vante chuh nasa taka gi’n mangthai in tin; van a thilte chuh katum in sukmangthai in um intin, chun, lei leh a sunga umte chengcheng hi hung bei vek ina.

MALAKI 3:9

Hansie a sapsiet na hitau hi, nang haw leh zie nam pumpi hin kei hi nei guksak sek ngâl u a.

MALAKI 2:2

Ka min sulopi dinga na ngaihthak loh u a, lunggil a na vawp loh u chun, na chungu ah hansie hun tunsak ing ka. Na vangsakna dawnteu chuh hansie buok ing ka. Ahi, na laku ah, lunggil taktak a ka thupiekte vawp na um loh ziekun hansie ka lawh ta him ahi.

EZEKIEL 5:3

Chun, tawmcha la dawkin na tin, na puonâk chuol mawng a na chun ding ahi.

ISAI 1:31

Chun, mihat tak chule buhpawl bang hita’n tin, a nasep chuh meisi tawbang hi’n a; tichun kâng khawm un tin, a phelh mit ding kuomah um puo’n au.

DAN NIHNA 28:62

Lalpa na Pathien thuu na zuih loh ziekun, van a aksi zah pha hielte kha tawmcha chauh hung hi ta’n lau.

DAN NIHNA 4:27

Lalpa chun namtin lak ah hun thehzak intin, Lalpa’n a hun thehzakna nam haw lak achun tawmcha chauh hingdawk inlau.

MATTHAI 27:25

Tichun, mipi chengcheng chun, “A thisan mawh chuh keihaw leh ka chateu chungah um hen,” ti’n a dâwng uh a.

ISAI 5:24

Zieziekchun, meikuong in buhpawl a kâktum duok duok sek bang leh, hampa gaw chuh meikuong a a tum zungzung sek bangin, a zung haw chuh muot intin, a pak haw chuh leivui bangin lengto lak lak ina; sepaihte Lalpa dân chuh a deihloh u a, Israel Mi thiengtho thu chuh a ngaihdau ziekun.

ISAI 9:19

Sepaihte Lalpa chuh a lungnat ziekin gam chuh a kâng sie a, mihaw chule meia tih ding thing tawbang ahiu a; kuoma’n amah suohpihte a hâwi puou hi.

ISAI 34:5

Lalpa’n van ah chemzâm a guonggalh zo ta a, Edom leh a mipite sukmangthaina dinga mawh a chansakte chuh do ina.

ISAI 43:28

Zieziekchun, mun thiengtho a na leng chate chuh hih buok ing ka ting, Tichun, Jakob te chungah sietna huoisie tak ka tun saka; Israel chule sukmuolpho in a um tau hi, ti’n.

JEREMIA 5:14

Zieziekchun, Lalpa Sepaihte Lalpa Pathien in hiti hin a tii, “Zie tawbang thu chuh na gen ziekin, ngaitie, ka thu chuh na kam ah mei suok sak ing ka ting, zie mipite hi thing hiu in tin, tichun, katum zo vek un au.”

2 LENGTE 24:12

Tichun, Juda leng Jehoiakin chu, a nu tawh, a chapate tawh, a miliente tawh, a leng In enkawlte chengcheng chu tawh, leng kawm achun a kipie tau a. Nebuknezar in a vaihawm, kum gietna achun Jehoiakin chu a man a.

2 LENGTE 25:12

Himahleh, Juda gam achun a chagah diekte, bangmah neilote chu, grep huon enkawl ding leh, lo nasem dingin a nusieh a.

ISAI 1:9

Sepaihte Lalpa chun sukmangthai mâwk tawmcha a na nutsieh sak lo hile chuh, Sodom guolin ana um tai ting un, Gomorra tawbang khah hita ding I hiu hi.

JEREMIA 12:4

Gam chun bang chan a a sun ding? A sunga chêngte gitloh zieka gamsung a thaichi te chuh vuoi mai ding maw? Gamsate chuh a mangthai zo u a, chung leng vachate le; mite chun I hun nunung lam u chuh mu puo’n au, a tih ziekun.