Tichun, amau chuh “Mi Thiengtho, Lalpa hukdam sate” tih hiu intin, chun, nang u chule, Khawpi nutsieh a um hilo in, “Hawldawk a um,” ti a sap hita’n lau, a ti a.
Amah chuh sukkhelhna chengcheng lak apat ei hukdawk ding leh, amah a mai hi a, a mi thiengthote I hih theihna dingun leh, thilpha hih a phachuom ngai dingin I sik un a hung kipie ta a.
Himahlele, nang haw vang chuh, amah zalin Krista tawh pumkhat in a hun siem a, amah chuh Pathien apat ei uh a ding a chitna, diktatna, thienthona leh tatdawkna dinga siem ahi.
Zie tak achun sakeibakneite um puou untin; gamsa lauh-um te’n le hawh diek puou in tin; muh ding le um puo’n a. Himahleh, Lalpa tatsate vang chuh zie chun chieh un au.
Tichun, Lalpa tatsate chuh vaikit un tin, lasa kawm in Zion chuh tung un tin; a lu chung u achun kumsawt kipahna um in tin, lawpna leh kipahna chang tau in tin, lungkham leh dahna cheng bei ta’n a.
Aw ka mite haw, ei ngaithau inla, ka thu hi ngai un! Namte kawma ka thu sinsak chuh hun pie’ng ka ting, kei apat in dân pawtdawk intin, dikna chun mitin salhvak dingin ka vaihawmna chuh chawlhsak ing ka, tuikuol haw achun ei ngak untin, ka bân hi muong un au.
Diktatna a phuhdet hi’n na tin; Sukgimtheihna leh lauhna apat chun bit takin um in na tin; tizatna chuh gamla tak ah um ta’n tin, hun naih talo ding ahi.
Tichun, kumsawt a ka zi dingin hun huol ka ting; Diktak leh ginum takin um ka ting; hehpihna leh lungsietna tawp lo in hun nei zing ka ting, kumlekhuo’n keia dingin hun nei tang ka.
Aw ka mite haw, Lalpa hukdamna na het theihna ding u a Moab leng Balak thupun leh Beor chapa Balaam a dâwn dân, Shittim apat a Gilgal tienga thil umzie haw kha hezing un!”