HAGGAI 2:2 - PATHIEN LEKHABU THIENGTHO (BSI)

² “Shealtiel chapa, Juda gam pawpa Zerubabel kawma leh Jehozadak chapa thiempu lienpen Joshua kawm leh saltâng vaikit te kawma chun hiti hin gen in,” a ti a.

HAGGAI 2:2 ပူးပေါင်းရင်းမြစ်များ

HAGGAI 1:1

Persia leng Darius lal kum nihna, tha gupna, zie tha ni masapen achun Shealtiel chapa Zerubabel, Juda gam vaihawmpa leh, Jehozadak chapa thiempu lienpen Joshua kawmah thiemgau Haggai mang in Lalpa thu a hungtung a.

HAGGAI 1:14

Lalpa chun Shealtiel chapa, Juda gam pawpa Jerubabel lunggil leh Jehozadak chapa, thiempu lienpen Joshua leh mi, saltâng hung vaikitte lunggil chuh a chawktho a; tichun a hung u a, Sepaihte Lalpa a Pathien uh In a chun na a sem tau a;

NEHEMIA 8:9

Khutichun, mipite chun dân thu chuh a zak phet un a lungthim uh a khawih mah mah a, tichun a kap tau a. Ziephet chun gam awptu Nehemia leh thiempute leh lehkhazikpa Ezra leh mipi sinsak Levi chite chun mipite kawm achun, “Tuni hi Lalpa na Pathien u a ding a ni thiengtho ahi a, kap kiu inla, thasie takin um kiu in,” a tiu a.

EZRA 2:63

Chun, Tarshath chun a kawm u ah, “Urim leh Thumim kibelh a thiempu a hung dindawk masang sieh thil thiengtho chuh ne thei puo’n lau,” a ti a.

EZRA 1:8

Ziehaw nasan chuh Persia leng Kura chun sumkawlpa Mithredath a lâkdawk saka, Juda leng Shesbazar âng a chun a sim a.

EZRA 3:2

Khutichun, Jozadak chapa Jeshua leh a suohpih thiempute leh Shealtiel chapa Zerubabel leh a suohpih te chuh a kipan u a, Mosi dân guol takin Pathien a dingin hâlmang kithawih na maichâm a siem u a.

HAGGAI 1:12

Tichun, Shealtiel chapa Zerubabel leh Jehozadak chapa thiempu lien Joshua leh Babulon apat a saltâng hung vaikit te chun Lalpa a Pathien u chuh a lau u a, Lalpa sawlchak Haggai in hih dinga thu a hilh bang chun a hih u a, a thugen chuh a zawp tau a.