Wahayu Yahaya 12:9 - Fulfulde Nigeria

⁹ Ɗum hubinoyinga nder duuniyaaru. Kanga woni mbooga nga daga ndenno bi'eteenga Gullotooɗo koo Ceyɗan, majjinoowo duuniyaaru. Ɗum hubininga nder duuniyaaru fuu e malaa'ika'en maako.

Wahayu Yahaya 12:9 ပူးပေါင်းရင်းမြစ်များ

Luka 10:18

O wi'iɓe, “Mi yi'ii Ceyɗan yanoyii bo maƴƴere daga dow.

Yahaya 12:31

Jooni woni carel ngel ɗum waɗanta yimɓe duuniyaaru ndu'u kiita. Jooni ɗum riiway laamiiɗo duuniyaaru ndu'u.

Wahayu Yahaya 20:10

Ceyɗan majjinɗoɓe boo hubinaa nder mbeela hiite kibiritu to mardi ndin e annabiijo fewre on ɗon woni. Ɗum waɗay ka hokkukiɓe bone jemma e nyalawma haa abadaa abadin.

1 Yahaya 5:19

En andi enen ɗum ɓe Allah, koo nde duuniyaaru fuu e ley laamu Ceyɗan.

2 Korintiyanko'en 4:4

Ceyɗan laamiiɗo duuniyaaru ndu'u wumnii ɓerɗe yimɓe ɓe koolaaki Yeesu, ngam to' ɓe ngi'a jayngol Habaru Belɗum ɗum teddungal Almasiihu nanduɗo e Allah.

Wahayu Yahaya 12:7

Sey konu ummii ton dow. Miikaa'ilu e malaa'ika'en muuɗum konidi e mbooga ngan e malaa'ika'en magga.

Yahaya 8:44

Onon on ɓiɓɓe nyaako mooɗon Ceyɗan, ko ngiɗɗon woni ngaɗon ko nyaako mooɗon yiɗi. Daga arande o gaɗoowo warhoore. Walaa ko wannimo e goonga, ngam o walaa goonga. To o fewii, ɗum ngikku maako, ngam o pewoowo, nyaako fewre.

Wahayu Yahaya 20:8

O wurtoyto o majjina leƴƴi duuniyaaru fuu, o hawritaɓe ngam konu. Ɗum noddiray leƴƴi ɗin Gog e Maagog. Ɗuuɗuki maɓɓe waɗii bo ɗuuɗuki njaareendi maayo.

Wahayu Yahaya 12:3

Ɗonmaa goɗɗum kulniiɗum kayɗiniiɗum wangi e dow: wonga mbooga mboɗewa ngoodunga ko'e joweeɗiɗi e luwe sappo, koo ndeye hoore e woodi giifol.

Wahayu Yahaya 9:1

Nde malaa'ikaajo njowaɓo duudi luwal muuɗum, sey ngiimi hoodere yanoyii nder duuniyaaru daga dow. Sey ɗum hokkinde maɓɓitirgel dammugal ngayka kalluka lugguka.

Wahayu Yahaya 2:24

“Ammaa onon horiiɓe wonɓe gariiri Tayaatira ɓe tokkaayi ekkitinol ngo'ol, on ekkitaaki ko woɓɓe mbi'ata ‘Sirru Ceyɗan lugguɗum.’ E mi wi'a'on mi yowantaa'on wongal teddoral.

Wahayu Yahaya 2:13

E mi andi to njooɗiiɗon; on njooɗoo to Ceyɗan laamotoo. Fuu e non, on ngaɗa ko mbiimi'on, on alaayi hoolaakiyam koo nde ɗum wari Antifas ga'ajinɗo dow am mo goonga.

1 Biiturus 5:8

Curee ko'e mooɗon, njooɗooɗon on ciryii. Ganyo mooɗon Ceyɗan e mo woosoo bo sembindu ɓernundu e mo ɗaɓɓita mo o halkata.

2 Korintiyanko'en 11:14

Naa' ɗum kayɗiniiɗum! Koo Ceyɗan e wartira hoore muuɗum bo malaa'ikaajo gooduɗo jayngol.

2 Korintiyanko'en 2:11

Mi waɗu non ngam to' Ceyɗan ƴoyra'en, ngam en andi nyumo maako boɗɗum.

Roomanko'en 16:18

Ngam iri ɓen ɗon yimɓe naa' Joomiraawo meeɗen Almasiihu ɓe kuwanta, ammaa deeɗi maɓɓe ɓe kuwanta. E boliiɗe belɗe e haalaaji boɗɗi ɓe majjinirta yimɓe gooduɓe ciya faamu.

Kuuɗe Lilaaɓe 26:18

A wumtinayɓe, ɓe mburtoyoo nder nyiwre, ɓe ngarta nder jayngol, ɓe mburtoo nder laamu Ceyɗan, ɓe co''oo to Allah, ngam ɓe keɓa yaafaneeki hakke, ɓe natta nder yimɓe gartuɓe ceniiɓe ngam ɓe koolakeyam.’

Luka 22:31

“Siiman, Siiman, raɗɗum Ceyɗan ƴamii laawol foonda'on, boo o hokkaama. E mo yiɗi o seɗa'on no ɗum seɗirta alkamaari e nyaande.

2 Korintiyanko'en 11:3

Ammaa e mi hula to ɗum warta no mboodi ƴoyriri Hawwaa'u e ƴoyre mayri kallunde, onon maa ɗum majjina'on alon tokkuki Almasiihu e ɓernde go'o e ɓernde laaɓunde.

Luka 22:3

Sey Ceyɗan natti ɓernde Yahuuda bi'eteeɗo Iskariyooti, go'oto nder tokkuɓe Yeesu sappo e ɗiɗo.

Luka 8:12

Njanundi dow ɗatal woni nanuɓe Wolde Allah, nden Ceyɗan wara hoccande daga nder ɓerɗe maɓɓe, ngam to' ɓe mbaawa jaɓukinde ɓe kisa.

Maatiyu 25:41

“Nden o wi'ay wonɓe nano maako, ‘Cendiree e am, onon laanaaɓe! Nattee hiite nge nyifataa haa abadaa nge ɗum siryanii Ceyɗan e malaa'ika'en muuɗum!

Maatiyu 4:10

Sey Yeesu wi'imo, “Umma daga ɗo'o, an Ceyɗan! Aayaare wi'ii, ‘Mawnin Allah Joomiraawo maaɗa, kanko tan mawnintaa.’ ”

Maatiyu 4:8

Ceyɗan fuɗɗiti yaarimo dow wonde hocceere townde hollimo leyɗe duuniyaaru fuu e jawdi maaje,

Maatiyu 4:5

Sey Ceyɗan yaarimo Urucaliima Gariiri Ceniindi darnimo ton dow hoore Wuro Ceniingo,

Maatiyu 4:1

Sey Ruuhu Allah yaari Yeesu nder ladde ngam Ceyɗan foondamo.

Wahayu Yahaya 19:20

Sey ɗum nangi mardi ndin e annabiijo fewre on. Kanko woni gaɗuɗo kayɗiniiɗum yeeso mayri majjini gaɗanaaɓe alaama mayri e mawninɓe ngunkiwa nandunga e mayri. E yonki ɗum hubini annabiijo fewre on e mardi ndin nder mbeela hiite kibiritu.

Wahayu Yahaya 16:14

Kanji ngoni ginni gaɗooji kuuɗe kayɗiniiɗe. Kanji ngoni jahooji to laamiiɓe duuniyaaru fuu ɗi kawritaɓe ngam konu e nden ɗon nyalnde mawnde nde Allah Joomu Bawɗe.

Wahayu Yahaya 13:14

Ndi majjini yimɓe wonɓe duuniyaaru e kayɗiniiɗum ɗum um alindi ndi waɗa e yeeso mardi arandeeri nawniraandi kaafahi ammaa e ndi woodi yonki. Nden ndi wi'iɓe ɓe ngaɗa ngunkiwa nandunga e mardi arandeeri ndin ngam hokkukindi mangu.

Wahayu Yahaya 9:20

Yimɓe koriiɓe ɓe bone ɗum ɗon mbaraayi, ɓe tuubaayi ɓe cendiri e ko ɓe ngaɗi e juuɗe maɓɓe. Ɓe alaayi mawninki ginni, e allaaji fewre gaɗiraaɗi jiinaari, koo ajurfaari, koo njamndi mboɗeeri, koo hayre, koo lekki. Ɗi fuu ɗi ngi'ataa, ɗi nanataa, ɗi njahataa.

Wahayu Yahaya 3:9

Yimɓe ɓen ɗon wonɓe nder yimɓe Ceyɗan wi'ooɓe ɓe yimɓe Allah ammaa ɓe peway, mi waɗayɓe ɓe ngara ɓe ndiccoo yeeso mooɗon ɓe anda e mi yiɗi'on.

Wahayu Yahaya 2:9

E mi andi torra ka njaroton, e mi andi on ngalanaa, ammaa on diskuɓe. E mi andi haala kalluka ka yimɓe metata dow mooɗon, wi'ooɓe ɓe yimɓe Allah, ammaa naa' ɗum non, ɓe yimɓe Ceyɗan.

Yahuuda 1:9

Koo Miikaa'ilu ardiiɗo malaa'ika'en waɗaayi non. E carel ko o yeddootirta e Ceyɗan dow ɓandu Muusa ko maayi, o mawninaayi hoore maako o haɓana Ceyɗan nder haala ɓaleha. Ko o wi'i tan woni, “Joomiraawo haɓanmaa!”

Ibraaniyanko'en 2:14

Nde ɓiɓɓe ɓen ɓe gooduɓe ɓandu e ƴiiƴam, Yeesu e hoore muuɗum wartii neɗɗo bo maɓɓe. O waɗu non ngam barka mayde maako o halka on ɗon jogiiɗo bawɗe mayde, waato Ceyɗan.

2 Timooti 3:13

Yimɓe kalluɓe e munaafuki'en ɓe ɓeyday halleende maɓɓe ɓe ngaɗay ka majjinki yimɓe, kamɓe maa woɓɓe e majjinaɓe.

1 Timooti 2:14

Nden naa' Aadamu ɗum ƴoyri, ɗum debbo on ɗum ƴoyri, o yewi dooka Allah.

2 Tasaloonikanko'en 2:3

To' on njaɓu goɗɗo majjina'on e koo ngole laawol. Ngam nden ɗon nyalnde waroytaa naa wongel carel waɗii ngel yimɓe ɗuɗɓe nganyata Allah. E carel ngel, Kalluɗo wangay, mo ɗum siryanii halkere nde haa abadaa.

Aafisanko'en 4:14

Nden en puɗɗitataa ngaɗen jonde bo sukahoy, en ngaylita ɓerɗe meeɗen dow ko kooliiɗen ngam majjinooɓe yimɓe ƴoyrii'en e ekkitinol fewre.

2 Korintiyanko'en 12:7

Allah holliiyam wahayu mawɗum. Ammaa ngam to' mi ƴefta hoore am, sey ɗum yowaniyam goɗɗum ɗum wartaniyam bo gi'al nder ɓandu, bo goɗɗo Ceyɗan liloyi waɗa ka torrukiyam.

Roomanko'en 16:20

Allah joomu jam naa' ko neeɓi o lallinay bawɗe Ceyɗan o yowa'on dow maako. Joomiraawo meeɗen Yeesu Almasiihu barkiɗina'on.

Kuuɗe Lilaaɓe 5:3

Biiturus wi'imo, “Hanaaniya, ngam ɗume aluɗaa Ceyɗan natti ɓernde maaɗa haa pewanɗaa Ruuhu Allah, cuuɗuɗaa goɗɗe ceede nder ceede ngesa kan?

Yahaya 16:11

Ɓe paamaayi ko woni kiita Allah, ngam laamiiɗo duuniyaaru ndu'u yaadake taƴanaama kiita.

Yahaya 14:30

Mi neeɓataa e mi medda e mooɗon, ngam laamiiɗo duuniyaaru ndu'u e wara. O walaa bawɗe dow am.

Luka 13:16

O'o debbo taanu Ibraahim, mo Ceyɗan haɓɓi duuɓi sappo e joweetati, haanaa o fittee Nyalnde Siwtaare?”

Maatiyu 24:24

Ngam Almasiihu'en fewre e annabo'en fewre mburtoyto, ɓe ngaɗa alaamaaji mawɗi e kuuɗe kayɗiniiɗe ngam ɓe majjina yimɓe, haa e cuɓaaɓe ɓen to ɗum waɗoto.

Maatiyu 13:39

On ɗon ganyo aawuɗo geene ɗen, kanko woni Ceyɗan. Carel taƴukindi woni re'uki duuniyaaru, nden taƴooɓendi ngoni malaa'ika'en.

Wahayu Yahaya 18:2

Sey o noddi nder hononde cembinde, o wi'i, “Gariiri Baabiila halkaama! Gariiri mawndi yanii! Ndi wartii to ginni njooɗotoo, to ginni kawritata e koo ɗiye colli nefniiɗi karminiiɗi.

Wahayu Yahaya 18:23

Fitilaaru ɓeydataa yeynoo nder mayri. Ɗonmaa ɗum ɓeydataa ɗum nana hononde angoojo e ɓaŋaaɗo nder mayri. Ngam ndenno soodooɓe e cooritoo nder mayri kamɓe ngoni mawɓe duuniyaaru, sihiriiji mayri boo majjinii yimɓe duuniyaaru!

Wahayu Yahaya 12:8

Ammaa ɗum heɓi jaalorgal dow mbooga ngan, ɗum riiwinga e malaa'ika'en maaga daga ton dow.

Wahayu Yahaya 12:12

Ngam non, onon wonɓe nder wuro Allah ton dow, nanee belɗum! Ammaa on mbonii onon wonɓe nder duuniyaaru e ko woni nder maayo! Ngam Ceyɗan jipponoyake'on e ɓerni bo pusay ngam e mo andi carel maako ɓadake re'uki.”