Roma 8:28 - Surat Ralan na'a Vaidida

²⁸ Fiang ini tkaꞌa roak ne, Ubu nasusan afakataka munuk, boma nala Ni lolin verin tamata ovi rlobang urun Ia. Ubu notu wean inyai, ma wean lahir i ralan a nfalak roak verin tamata ovi nera roak ira ma reluk yanan ra.

Roma 8:28 ပူးပေါင်းရင်းမြစ်များ

Markus 12:30

Oa musti mlobang Duilaꞌa, mu Ubu i mraning a, ovu ralam urun. Mala munuk mu vavaꞌat a, mu kakaꞌa ra, ovu vali mu ngrebat ra verin Ia ma al mlobang Ia.’

Kisah 13:48

Ba tamata ovi wol Yahudi ira rarenar afa avyai, na inar lolin ma rfadawang Ubu, tevek Ni vaivatul ra naꞌa Yesus. Tamata ovi Ubu nfili roak ira ma rira vavaꞌat kakiwal, rorang Ni vaivatul ra.

Roma 11:29

tevek Ubu wol nkati Ni tnorung a verin tamata ovi nfili ovu naflahar roak ira.

Roma 8:30

Ba Ubu nfili tamata ovi ralan a nfalak roak ma nera lan ira ma reluk yanan ra. Ubu nala lingaꞌan verin tamata avyai ma rira vavaꞌat ra rmalola. Nata Ia veka nalang vali ira ovu notu ma rira vavaꞌat ra lolin urun naꞌa vanan i nfitik nyadat a.

Roma 9:11

Naꞌut i Ribka mane nrali kasikoꞌu dekut avyai, na Ubu nfalak verin ia ne, “Yanam iwarin a veka nfareta yanam iyaꞌan a.” Naꞌut i nangrihi wean inyai, na kasikoꞌu avyai wol rotu afa ovi sian te lolin obin. Ubu nfalyawang lan roak ne, Ia nfili roak kasikoꞌu i mane naflahar ia. Notu wean inyai, boma ita munuk tkaꞌa ne, wean i nfili tamata ra ma naflahar ira, na wol naflahar ira tevek afa ovi rotu ra. Ia nfili ira, tevek kaꞌi nfadoku wean inyai naꞌa ralan a.

1 Korintus 1:24

Naꞌuk Ubu nera tamata boku ma rorang Ia. Tamata avyai boku Yahudi ira, ovu vali boku wol Yahudi ira. Naꞌut i rarenar Ubu Ni Ivar Lolin i nfamalik Yesus ma rorang Ia, na ira rfan-aran ne, Ia wean lahir ngrebat ovu kakaꞌa tali Ubu.

1 Korintus 1:9

Ubu veka nfangrebat mia, tevek Ia wol nablufang Ni tnorung i nala roak verin mia. Ia nera mia ma bira vavaꞌat isa roak ovu Yanan a Yesus Kristus. Wean inyai bi ufalak fara weninyai verin Ubu.

1 Korintus 2:9

Naꞌuk wol rkaꞌa, ba kena lahir wean i rtulis roak naꞌa Surat Ralan ne, “Tamata ra wol rarenar ovu wol rarea, ovu vali wol rfikir lahir obin, naꞌa afa ovi Ubu nfadoku roak verin tamata ovi rala lahir ralarira ra verin Ia.”

2 Korintus 5:1

Ami amkaꞌa roak ne, naꞌa lanit ivavan ini, na tenadida ra wean befak ma ita kaꞌi tleal befak yai ralan a. Wean i befak i tleal yai namaꞌar, na Ubu veka nala rahan ngorvaꞌan verin ita naꞌa lanit ratan, inyai tenadida ngorvaꞌan ra. Tamata ra wol rot-nala afa yai, naꞌuk Ubu kaꞌi notu lahir, ovu tenadida ngorvaꞌan kakiwal, nata ti wol ni wahan.

Galatia 1:15

Naꞌuk amar ovi unaꞌa kevralan obin, na Ubu nfili roak yaꞌa ovu nera yaꞌa ovu Ni rala lolin a.

Galatia 1:6

Yaꞌa ubrian mia, tevek wol mnanat lahir obin ma myorang Kristus, na mifla talik roak Kristus Ni rala lolin i nala verin mia, ma myorang ivar liak i tamata boku rfalak ne, lolin vali.

Galatia 5:8

Angangal yai wol ntali Ubu i nera roak mia.

Efesus 3:11

Ubu notu afa avyai wean lahir i nanovak roak, naꞌut i wol notu lanit ivavan ini obin. Ia nfakena munuk roak afa avyai naꞌa afa ovi dida Duilaꞌa Yesus Kristus notu.

Efesus 4:1

Terang a valing averi, unaꞌa buꞌi ralan, tevek ufabana Duilaꞌa Ni karya. Era urun verin mia ma bira vavaꞌat ra lolin ma inovan ovu tamata ovi rorang Yesus rira vavaꞌat ra, tevek Ubu nala roak mia ma myeluk yanan ra.

Filipi 3:14

Wean inyai bi, ufla ma wol utalik, boma bisma aran ni wahan a ma ala rangrangwaha yai. Rangrangwaha yai nfaturu lahir vavaꞌat i naꞌa lanit ratan. Ubu nera ita ma nala rangrangwaha yai verin ita, tevek dida vavaꞌat isa roak ovu Kristus.

1 Tesalonika 5:9

Ubu wol nfadoku ma nfaturu lahir Ni ngrova verin ita, naꞌuk veka nsikat ita tali dida salasilan ra, ma dida vavaꞌat kakiwal nahu Duilaꞌa Yesus Kristus.

2 Timotius 1:9

Ubu nsikat ita tali dida salasilan ra, ovu nera ita ma raladida ra rmerat urun. Afa lolin ovi totu ra wol rala vavaꞌat kakiwal verin ita. Naꞌuk Ubu kaꞌi nala vavaꞌat kakiwal verin ita, tevek Ni rala lolin verin ita, ovu norang lahir afa ovi ralan nfalak ra. Ubu wol notu lanit ivavan obin, na nfadoku roak ne, veka nala Kristus Yesus ma al ntevut ita.

2 Timotius 2:19

Velik ne wean inyai, na Ubu Ni vaivatul ra kena urun, ba torang watan. Ubu Ni vaivatul ra wean vatu dawan ovi rotu naꞌa rahan ni fanderen ma nangrebat urun. Naꞌa vatu dawan avyai rwalur ne, “Duilaꞌa nkaꞌa Ni tamata ra munuk,” ovu Ia nfalak vali ne, “Tamata iki watan nfalak ne Duilaꞌa Ni ia, na musti ntalik ma deka notu kikyai salasilan ra.”

Ibrani 9:15

Ba Kristus neluk leta verin ita naꞌa Ubu Ni tnorung ngorvaꞌan yai, boma tamata ovi Ubu nera roak ira, bisma rira munuk kalolin ovi Ubu nfadoku roak naꞌa Ni tnorung a. Kalolin avyai rnaꞌa, nata ti wol ni wahan. Kristus nmata ma ntevut ira tali rira salasilan ovi rotu ma rangal Ubu Ni tnorung mnanat i nala verin Musa.

Yakobus 1:12

Ubu naflahar tamata ovi rtahang nal ralarira naꞌa rira susa ra, tevek wean i rtahang nal ralarira, na Ia veka nala vavaꞌat kakiwal i ntorung roak verin tamata iki watan i nlobang Ia ovu ralan urun. Ubu naval vali ira ovu Ni lolin a.

Yakobus 2:5

Terang a valing averi, yaꞌa ungnanang dalang mia. Eka mryenar: Ubu nfili tamata kasian ovi rnaꞌa lanit ivavan ini ma notu ma rira inorang nangrebat. Ia nfili roak ira ma rnaꞌa Ni Fareta a, ovu veka nala vavaꞌat kakiwal i ntorung roak verin tamata ovi rlobang Ia ovu ralarira urun.

1 Petrus 2:9

Naꞌuk Ubu nfili roak mia tamata ovi myorang Ia, ovu mia weabira vali mela falurut ovi rkarya verin Ubu i neluk Raja ma nfareta mia. Ubu notu ma weabira vali Ni sidovung dawan i nfamerat roak tali salasilan ra ma myerat urun. Ubu Ni roak mia, ovu nala roak mia tali dedan ralan ma mnyaꞌa lyawan i lolin urun a, boma fyamalik ovu fyadawang afa dawan ovi notu ra.

1 Petrus 3:9

Wean i tamata ra rotu sian mia, na deka myotu sian vali ira, ovu wean i tamata ra rala vaivatul ovi ngra ra ma rfalak sian mia, na deka fyalak sian vali ira ovu vaivatul avyai. Naꞌuk myera verin Ubu ma naflahar tamata avyai, tevek Ubu nera mia ma fyaturu bira rala lolin verin tamata liak ra. Myotu wean inyai, boma Ia veka naflahar vali mia.

1 Petrus 5:10

Susa i mtyuan yai veka wol kaꞌi mnanat. Ti ma susa yai roak rok, na Ubu veka nala Ni rala lolin i dawan urun ma nfakena munuk afa ovi wol rnaꞌa bira vavaꞌat ra. Ia vali veka nfabatar ovu nfangrebat ewal bira inorang a, ovu vali notu ma mtyahang nal ralabira, ba mdyiri watan naꞌa bira inorang. Ia nera roak mia ma myovu naꞌa vanan i nfitik a nyadat ma wol ni wahan a. Notu munuk afa avyai, tevek dida vavaꞌat isa roak ovu Kristus.

1 Yohanes 4:10

Ubu Ni silobang yai wean ini: Ita wol tlobang lan Ubu, naꞌuk Ubu nlobang lan roak ita, ba nsinir roak Yanan a, ma nma lanit ivavan ini, ma nmata al nakvanak ita tali dida salasilan ra.

1 Yohanes 4:19

Ita tlobang tamata ra, tevek Ubu nlobang lan roak ita.

Wahyu 3:19

Yaꞌa utabu ovu ufakena tamata ovi ulobang ira, ba ralabira urun ma myahil ma mtyalik kikyai tali bira salasilan ra!