Roma 16:25 - Surat Ralan na'a Vaidida

²⁵ Mya ma tfadawang Ubu naran a! Ia Ni ngrebat a notu ma ita bisma torang lalawatan Ia, tevek mryenar roak Ubu Ni Ivar Lolin i nfamalik Yesus Kristus. Ufamalik Ivar Lolin yai wean lahir afa ovi Ubu nfalyawang verin yaꞌa. Ivar yai, lan ana neluk afa fanfonak ma tamata rivun wol rkaꞌa.

Roma 16:25 ပူးပေါင်းရင်းမြစ်များ

Matius 13:17

Afa i ufalak verin mia ini, kena urun! Nabi rivun ovu tamata rivun ovi rira vavaꞌat ra rmalola inar ma rsiꞌik afa ovi msyiꞌik ra, naꞌuk wol rarea. Ira inar ma rarenar afa ovi mryenar ra, naꞌuk wol rarenar afa avyai.”

Matius 13:35

Ia nsiair wean inyai, boma nfakena lahir vaivatul ovi lan a nabi isa ntulis ne, “Yaꞌa veka ala vaivatul kamkuma ra ma ungrihi verin mia. Yaꞌa ufamalik afa fanfonak ovi tamata wol rkaꞌa obin, tali naꞌut i Ubu notu lanit ivavan a.”

Matius 20:7

Ira rfalak verin ia ne, ‘Wol tamata rera ami ma amkarya.’ Ba nfalak verin ira ne, ‘Miti ma mkyarya naꞌa ning vaꞌi anggur a.’

Kisah 20:32

Kida averi, yaꞌa ala mia verin Ubu ma nwanar mia. Deka miblufang ma myot-orang Ubu Ni vaivatul ovi rfamalik Ni rala lolin a. Ubu bisma nfangrebat mia naꞌa bira inorang ovu Ni vaivatul avyai. Ubu veka nala afa lolin ovi ntorung roak verin tamata ovi nfamerat roak ira tali rira salasilan ra.

Kisah 9:20

Ia nti lahir Yahudi rira rahan falurut ra ma nfamalik Yesus verin tamata ra ne, Ubu Yanan Ia!

Roma 11:25

Terang a valing averi! Era ma deka fyikir ne, mkyaꞌa munuk afakataka, tevek inak ma mkyaꞌa afa fanfonak i Ubu ralan a nfalak ini. Tamata Israel boku ralarira rangrebat ma rafena rorang Ubu. Afa ini veka nbana, nata ti naran amar i Ubu nfadoku roak. Ia notu ma tamata ovi wol Yahudi, naꞌuk nfili roak ira ma rira vavaꞌat kakiwal, rma munuk ma rorang Ia.

Roma 14:4

Deka fyasala tamata liak ni tamata sansinir a. Duan a veka kaꞌi nfadoku ne, nkarya ma lolin te wahal. Wean vali inyai verin terabir-valibira tamata ovi rorang Yesus. Duilaꞌa neluk duarira, ba Ia saꞌi nvolan ne, iki kena te sala ia. Ia veka nlobang Ni tamata sansinir a ma not-nala ni karya a, tevek Duilaꞌa Ni ngrebat a.

Roma 16:24

Uflurut ma fara dida Duilaꞌa Yesus Kristus nala Ni rala lolin verin bir tinemun! Kena urun.]

Roma 2:16

Ba veka wean vali inyai naꞌut i Ubu nfadoku roak ma nfaleka inukun verin tamata ra. Naꞌut inyai, na Ubu veka nala ngrebat verin Kristus Yesus ma nfaleka inukun verin tamata ra munuk rira fikiran fanfonak ra. Afa yai wean lahir afa ovi ufamalik naꞌa Ubu Ni Ivar Lolin a.

1 Korintus 1:23

Naꞌuk ami wol amangrihi wean inyai. Ami amfamalik watan Kristus i nmata naꞌa aa walwalur a. Ivar yai nfakeri lahir tamata Yahudi ralarira ra ovu vali tamata ovi wol Yahudi ra ranovak ne, Ivar yai vu watan.

1 Korintus 2:7

Kakaꞌa dawan i amala al amanovak ovu amfamalik Ubu Ni vaivatul ra tali lahir Ia. Lan ana, tamata ra wol rkaꞌa kakaꞌa dawan yai obin. Wean inyai bi, naꞌut i Ubu wol notu lanit ivavan a obin, na nvolan roak ma ita veka tovu vali Ia naꞌa Ni vanan i nfitik nyadat ma felan lolin urun a.

1 Korintus 4:1

Terang a valing averi, yaꞌa, Paulus, utulis surat ini verin mia ma ufalak ne, mia musti fyikir watan ne, yaꞌa ovu Apolos, Kristus Ni tamata sansinir verin ami. Ba amfabana karya i nala verin ami ma amotu a. Ubu nala varvara verin ami tamata ovi amfamalik ivar fanfonak ovi lan ana, Ia wol nfavotuk obin verin tamata ra.

2 Korintus 4:3

Wean i Ivar Lolin i amfamalik roak yai wol lyawan obin verin tamata boku, na Ivar yai wol lyawan verin tamata ovi ti rnaꞌa yafwan kakiwal. Afa isa nkum-teri ralarira ra, ba rafena ma rorang Yesus.

2 Korintus 4:5

Ami wol kaꞌi amfamalik tenamami ra. Naꞌuk amfalak ne, Yesus Kristus yai dida Duilaꞌa verin Ia, ovu ami ameluk tamata sansinir verin mia, tevek Yesus ralan a nfalak ma amotu wean inyai.

Galatia 2:2

Yaꞌa uti Yerusalem, tevek Ubu nfaturu roak verin yaꞌa ma musti uti. Uti ma usdov-aling tamata ovi rban-ulu naꞌa tamata inorang rira sidovung a, ma ufalyawang Ivar Lolin i ufamalik verin tamata ovi wol Yahudi ra. Otu wean inyai, boma afa ovi otu roak naꞌa amar ovi rti roak veli, ovu vali afa ovi veka otu naꞌa amar ovi veka rma ini, deka rleka ma lolan watan, beta ne tamata ra ranovak ne, air afa ovi sala ra.

Efesus 1:9

Ubu ralan kaꞌi nfalak ma nfavotuk verin ita naꞌa afa ovi nvolan roak ma veka notu naꞌa Yesus Kristus. Lan ana, Ubu wol nfavotuk afa avyai obin.

Efesus 3:11

Ubu notu afa avyai wean lahir i nanovak roak, naꞌut i wol notu lanit ivavan ini obin. Ia nfakena munuk roak afa avyai naꞌa afa ovi dida Duilaꞌa Yesus Kristus notu.

Efesus 3:9

Ubu nala karya ini verin yaꞌa, boma tali yaꞌa, na tamata ra munuk bisma rkaꞌa ne, wean inba ma Ubu notu munuk akataka, ovu not-nala munuk afa ovi tali lalan ana, nfadoku roak ma veka notu a. Ia nfalyawang munuk afa ovi tali lalan a, wol nfavotuk obin.

Efesus 6:19

Miflurut vali verin yaꞌa, boma lokat amar, na Ubu veka nala munuk vaivatul ovi veka ufalak ra, ovu vali notu ma ubrahi ma ufamalik Ni Ivar Lolin i lan ana, Ia wol nfavotuk obin.

Kolose 2:2

Otu wean inyai ma ufaloling ralabira ra naꞌa bira inorang a, boma msyilobang mia ma ralabira isa watan. Myotu wean inyai, na mia munuk veka fyan-aran urun afa ovi fiang ini Ubu nfavotuk roak, ovu veka mkyaꞌa urun Ia.

Kolose 4:3

Miflurut vali verin ami, boma Ubu nala lingaꞌan verin ami ma amfamalik Ni Ivar Lolin naꞌa Kristus. Ivar Lolin yai lan ana, wol nfavotuk obin. Rvatuk yaꞌa ma unaꞌa buꞌi ralan, tevek ufamalik Ni Ivar Lolin yai.

1 Tesalonika 3:13

Amera vali verin Duilaꞌa ma nfangrebat ralabira ra ma notu ma ralabira ra rmerat urun, ovu vali wol bira sala naꞌa Yamadida Ubilaꞌa wahan ralan a, naꞌut i dida Duilaꞌa Yesus nma ewal ovu Ni tamata ovi rorang Ia.

2 Tesalonika 2:14

Ubu nera mia, naꞌut i amfamalik Ni Ivar Lolin verin mia ma nsikat mia tali bira salasilan ra, ma bira vavaꞌat kakiwal. Ia nera mia, boma nalang mia wean watan i nalang ma dawan dida Duilaꞌa Yesus Kristus.

2 Tesalonika 3:3

Naꞌuk Ubu not-nala munuk afa ovi nfalak ra. Ia veka nfangrebat ralabira ra, ovu veka nbelat teri mia tali nitdawan.

2 Timotius 1:9

Ubu nsikat ita tali dida salasilan ra, ovu nera ita ma raladida ra rmerat urun. Afa lolin ovi totu ra wol rala vavaꞌat kakiwal verin ita. Naꞌuk Ubu kaꞌi nala vavaꞌat kakiwal verin ita, tevek Ni rala lolin verin ita, ovu norang lahir afa ovi ralan nfalak ra. Ubu wol notu lanit ivavan obin, na nfadoku roak ne, veka nala Kristus Yesus ma al ntevut ita.

2 Timotius 2:8

Mungnanang Yesus Kristus, ubun nusin Raja Daud. Ubu nfavaꞌat ewal roak Ia tali matmatan. Ufamalik Ivar Lolin ini verin tamata ra.

Titus 1:2

Tamata avyai rkaꞌa afa kena ovi air verin ira, ba rnaban vavaꞌat kakiwal i Ubu ntorung roak. Ubu wol notu lanit ivavan obin, na nfadoku roak tnorung ini. Ita bisma torang lahir Ubu, tevek wol nsiklabir.

Ibrani 7:25

Ba Yesus Ni ngrebat ma nsikat nala tamata ra tali rira salasilan ra, tali amar ini, nata ti wol ni wahan. Notu wean inyai verin tamata ovi rorang Ia ma rfaseri Ubu. Ia nvaꞌat, nata ti wol ni wahan, boma nera verin Ubu ma nlobang ira.

1 Petrus 1:20

Naꞌut i Ubu wol notu lanit ivavan obin, na nfili roak Kristus. Fiang ini lanit ivavan sarseri mane namwear, ba Ia nsinir Kristus nma ma nmata, ma nsikat mia tali bira salasilan ra.

1 Petrus 5:10

Susa i mtyuan yai veka wol kaꞌi mnanat. Ti ma susa yai roak rok, na Ubu veka nala Ni rala lolin i dawan urun ma nfakena munuk afa ovi wol rnaꞌa bira vavaꞌat ra. Ia vali veka nfabatar ovu nfangrebat ewal bira inorang a, ovu vali notu ma mtyahang nal ralabira, ba mdyiri watan naꞌa bira inorang. Ia nera roak mia ma myovu naꞌa vanan i nfitik a nyadat ma wol ni wahan a. Notu munuk afa avyai, tevek dida vavaꞌat isa roak ovu Kristus.