Zakariya 10:11 - Kifuliiru

¹¹ Bagalengaga mu makuba, nga bandu ábajabuka inyaaja. Nie Nahano, ngashuuta imidunda yayo, kiri noꞌtulingi twoꞌlwiji Niire, ngatuyumya. Kundu Abahasuriya bagweti bagayikangaata, si bagaki goka. Kiri naꞌBamiisiri kwakundi, ubutwali bwabo bugaasiba.

Zakariya 10:11 ပူးပေါင်းရင်းမြစ်များ

Ndondeko 8:1

Gulya mwijulire, ikyanya gukahisa isiku igana na makumi gataanu, Rurema âli ki kengiiri Nuhu, neꞌbitugwa byoshi, neꞌnyamiishwa zooshi, nga kwo byâli riiri mu mashuba. Kyanatuma Rurema agalungika imbuusi, yanahuusa bweneene mu kihugo, halinde amiiji ganatondeera ukuyema.

2 Baami 2:14

Mbu ahikage, analishulika ku miiji, ti: «E Nahano Rurema wa Hiriya, uli hayagi?» Lyeryo, ganayami bunduuka mwo kubiri, anajabuka.

2 Baami 2:8

Haaho, ulya Hiriya anahogola ikanju lyage, analigonya, analishulika ku miiji. Yago miiji ganayami bunduuka mwo kubiri. Bombi, banajabuka, mu kulenga áhayumiri.

Hizira 6:22

Banahisa isiku zirinda, bagweti bagashambaalira ulusiku lukulu lweꞌmikate mizira saama. Mukuba, Nahano akahindula umutima gwa mwami weꞌHasuriya, halinde anabatabaala ku mukolwa gwoꞌkuyubakulula inyumba ya Rurema wabo. Kwokwo, banayijula mwoꞌbusiime.

Zaburi 114:3

Inyaaja Ndukula, iri ikabonaga kwo bagweti bagayija, yanayami yeguuka, gira balenge. Kiri noꞌlwiji Yorodaani, nalwo lwanagalukira inyuma.

Zaburi 114:5

E nyaaja, kituma kiki ukayami yeguuka? Na naawe, e Yorodaani, kituma kiki ukagalukiraga inyuma?

Hisaaya 14:25

Ikyanya Abahasuriya bagaaba bakola mu kihugo kyani, lyo ngaamala imisi yabo. Ngakizi bahinyata-hinyata ku mugazi gwani. Kundu bâli hesiizi abandu baani umuteekerwa muzito, haliko buno, ngagulyosa.

Hisaaya 19:16

Nahano woꞌbushobozi bwoshi, ikyanya agahaniiriza Abamiisiri ku bushobozi bwage, bagaaba bakoli yobohiri nga bakazi, banalenge mweꞌkinyukura.

Hisaaya 43:2

Kundu mwangalenga áhayisiri mwiꞌbenga lyaꞌmiiji, tugaaba tuliriinwi. Na kundu mwangajabuka inyaaja, mutagazika. Na kundu mwangalenga mu muliro, mutâye hiire. Imbigi zaagwo zitâye mùsingoole.

Hisaaya 44:27

Amabenga gaꞌmiiji, ngagahamuliza, ti: “Mukame! Kiri neꞌnyiiji ziinyu, ngazikamya.”

Hisaaya 51:10

Na kundu inyaaja yâli yisiri bweneene, we kagikamya. Ukagibera mweꞌnjira, halinde abandu baawe banajabuka.

Hisaaya 51:9

E Nahano woꞌbushobozi bwoshi! Vyuka maashi! Uvyukage! Ukizi koleesa ubushobozi bwawe, nga kwo wâli kizi gira yaho keera. Aaho! Ka utali we katema-tema kirya kingisho-ngisho Rahabu? Ka utanali we katumita kirya kingisho-ngisho kyoꞌmujoka gwa mu nyaaja?

Hezekyeri 30:13

Rurema Nahamwitu adetaga kwokuno: «Ngashereeza imigisi yeꞌMiisiri, kiri neꞌya mu kaaya keꞌMefiisi. Mu kihugo kyoshi kyeꞌMiisiri, ndaaye úgaki ba mutwali. Nganabiika mweꞌkyoba kingi.

Sefaniya 2:13

Ngashereeza kiri neꞌkihugo kyeꞌHasuriya, uluhande lweꞌmbembe. Akaaya kaakyo kahamu keꞌNinaawi, ngakahindula kabe mushaka, kanasigale kayumiri lwoshi ngiꞌshamba.

Bwigule 16:12

Umuganda wa kalindatu, naye anamwaguliraga íbiri mu mutanga gwage mu lwiji luhamu Hefuraati. Yulwo lwiji lwanakama, gira habe injira yaꞌbaami bagalenga mwo. Yabo baami, bâli lyosiri uluhande lweꞌsheere.