Yeremiya 5:17 - Kifuliiru

¹⁷ Balya bagoma, ngiisi byo muli mu yimbula, bo bagakizi birya. Bagakizi lya ibibuzi biinyu, neꞌngaavu ziinyu. Bagakizi lya neꞌmizabibu yinyu, neꞌmitiini. Bagakizi lya kiri na bagala biinyu, na banyere biinyu. Utwaya twinyu tuzitire, muli mu tuyegamira. Kundu kwokwo, yabo bagoma bagatushereeza ngana.»

Yeremiya 5:17 ပူးပေါင်းရင်းမြစ်များ

Hisaaya 62:8

Nahano akabiika indahiro ku bushobozi bwage kwokuno: Ku kasiisa, ndâye ki heereze ingano zaawe, zibe zaꞌbagoma biinyu. Ndanâye ki leke ibinyamahanga kwo biyiji nywa ku divaayi yinyu, keera mwanagiyitubanulira kwo.

Hisaaya 62:9

Iyo ngano, bwo mwe mugweti mugagiyimbula, mwenyene mugaagilya, iri munanyivuga. Kiri neꞌyo mizabibu, bwo mwe mugweti mugagikanda, mwenyene mugaanywa idivaayi yayo mu mbuga zeꞌnyumba yani.

Hisaaya 65:22

Ndaaye úgakizi yubaka inyumba, mbu abandi bandu banayiji ziyifunda mwo. Ndaanaye úgakizi lima indalo, mbu inayimbulwe naꞌbandi-bandi bandu. Abandu baani bagakizi lama bweneene, ngeꞌbiti. Abataluule baani, ngiisi byo bagayitubaanulira kwo, byebyo byo bagashambaalira.

Yeremiya 1:15

Abandu ba mu yago maami gooshi geꞌmbembe, ngola ngababerangira. Abaami baabo bagayiji tereka ibitumbi byabo byoꞌbwami hoofi neꞌnyiivi zaꞌkaaya keꞌYerusaleemu. Yako kaaya, banakasokanane. Kiri noꞌtundi twaya twoshi tweꞌBuyuda, banatuteere. Kwokwo kwo nie Nahano ndesiri.

Yeremiya 25:37

Yizo ndangiriro, kundu zishuba mwoꞌmutuula, haliko, Nahano keera azihindula, libe ishamba limaata. Akoli rakiiri bweneene!

Yeremiya 4:26

Ikyanya nꞌgalangiiza, nanabona kwiꞌdaho írishuba neꞌnagiira, likola ishamba. Utwaya twoshi, tukola biguuka. Na íbitumiri bigaaba kwokwo, bwo Nahano akoli turakariiri.

Yeremiya 4:7

Abasirikaani bagahuluka, nga ndare íkola mu vuvunyuka mwiꞌbundo lyayo. Ee! Nakiminika keera akashaaga mu kihugo kyage, anakola mu njira, gira ayiji shereeza ikihugo kiinyu. Utwaya twinyu tugasigala biguuka, ndaanaye mundu úgatutuula mwo.

Yeremiya 5:18

Nahano adetaga kwokuno: «Ikyanya ngamùzimiiza, kutagaaba kwa lwoshi-lwoshi.

Yeremiya 50:17

«Abahisiraheeri balyagagi nga bibuzi. Indare zigweti zigabahiiva, iri zinabashaabula. Ubwa mbere, bakashaabulwa na mwami weꞌHasuriya. Noꞌbuzinda, mwami Nebukandeneza weꞌBabeeri, ye kabavungula amavuha.»

Yeremiya 50:7

Ikyanya abagoma bâli kizi bagwana, banakizi bateera. Banakizi deta, ti: “Balya bandu, mu kubateera, tutahubiri. Si keera bakahubira Nahano yenyene! Kundu bashokuluza baabo bâli kizi langaalira Nahano, haliko, abaana baabo banakizi múhubira!”

Yeremiya 8:13

«Imimbu yinyu, ngamùsaagiza yo. Ku matavi geꞌmizabibu, ndaayo mugaki longa kwo. Neꞌbiti byeꞌmitiini, kwo na kwokwo. Kiri neꞌbyasi byabyo, bigayumaguka. Ngiisi byo nâli kizi mùheereza, ngabizimiiza lwoshi.» Kwokwo, kwo Nahano adesiri.

Yeremiya 8:16

Yuvwagwi ngiisi kweꞌfwarasi zaꞌbagoma zigweti zigafuura iriira munda imbembe, mu kihugo kya beene Daani! Si zikola mu girigimba, halinde idaho linajugumbane! Abagoma bakola mu njira, gira bagayiji shereeza ikihugo kiitu, na íbikiri mwo byoshi. Bagashereeza utwaya twoshi, na booshi ábatutuuziri mwo.»

Kimombo 2:12

Abaana bagweti bagalirira banyina, iri banabatakira, ti: «E maashi maawe, ibyokulya neꞌbinywebwa, biryagagi hayi?» Balya baana, bakola mu lenguka mu kaaya, nga musirikaani úwakomeresibwa mwiꞌzibo. Yoho wee! Bakola mu fwira mu maboko ga banyina.

Kimombo 2:2

Nahano atakayuvwirwa abandu baage ikimino, si akayami bashereegeza inyumba zaabo. Na bwo âli koli rakiiri, anayami hongola inyumba zooshi zaꞌBayuda. Ubwami bwabo, anabudeedeka haashi, anabubonia ishoni, kiri naꞌbatwali baabo.

Hezekyeri 36:4

«Ku yukwo, e migazi yeꞌHisiraheeri! Muyuvwirize ngiisi kwo nie Rurema Nahamwinyu ndesiri. Biri ukuli, kweꞌbinyamahanga bikayiji mùshekeereza, byanashekeereza neꞌmigazi, noꞌtugangazi, noꞌtubanda, kiri neꞌbiguuka, noꞌtwaya útukashahulwa.

Hosheya 2:12

Ngolaga ngamúhogola imirondo yoshi, anasigale bukondwe. Balya bakundwa baage, banabe bagweti bagamúloleera. Ikyanya agateezibwa ishoni kwokwo, ndaaye úgayiji múkiza.

Hosheya 8:14

«Abahisiraheeri, keera bakayibagira Umulemi wabo, banayiyubakira inyumba nyiija-nyiija za kahebuuza. Abayuda nabo, keera bakayiyubakira inzitiro ngomu mu twaya twabo. Kundu kwokwo, tulya twaya, ngatujigiivya twoshi, kuguma noꞌbutibitiro bwabo.»

Yuheeri 2:3

Yikyo kiso, umuliro guli mu singoola imbere lyakyo, kiri neꞌnyuma lyakyo. Ngiisi ho guli mu lenga, hanasigale bwanuula. Yibyo bizimu, ikyanya bitâli zaazi lenga, ikihugo kyâli riiri kiija ngana ngeꞌndalo yeꞌHedeni. Haliko, iri bikaba keera byalenga, kyanasigala ngiꞌshamba lya tema-ndime. Emwe! Ndaahyo íhiri mu fuuka imbere lyabyo.

Balaawi 26:16

«Aaho! Yuvwagwi ngiisi kwo ngamùhaniiriza: Ngakizi mùleetera amalibu. Neꞌkyanya mugashuushirwa, amasu giinyu gagahumaala, halinde munajambe ngana-ngana. Kundu mugakizi byala imbuto mu ndalo, zitagamùgenduukira. Mukuba abagoma biinyu, bo bagakizi zirya.

Sefaniya 3:6

Nahano adetaga kwokuno: «Keera najigiivya abandu ba mu mahanga mingi. Inyumba zaabo, kundu zâli riiri ngomu, keera nazishereeza. Injira zaabo, nazisiga mushaka, zitanakiri mu lenga mwoꞌmundu yeshi. Utwaya twabo, keera tukasigwa mushaka, ndaanaye úki tutuuziri mwo.

Malaki 1:4

«Abahedoomu, ikibusi kya Hesahu bali mu deta, ti: “Kundu bakatushereegeza utwaya twitu, haliko tugashubi tuyubakulula.” «Aahabi! Si nie Nahano woꞌbushobozi bwoshi, nadetaga kwokuno: Tulya twaya, kundu bagashubi tuyubakulula, haliko ngashubi tuhongolera haashi. Balya Bahedoomu, bagamenyeekana kwo bali “Banabitalaalwe”, na “Bandu bo Nahano ayamiri arakariiri”.

Bukengeeze 28:33

«Kundu muli mu himbuukira, mbu lyo mulonga imimbu, haliko ibinyamahanga byo mutayiji, bigamùkuusa yo. Bagakizi mùlibuza, noꞌkumùvindagaza.