Mwigiriza 12:1 - Kifuliiru

¹ Ukizi kengeera Umulemi wawe, kiri neꞌkyanya ukiri mwanuke. Ee! Ukizi múkengeera ku kyanya isiku mbi zitazi hika. Mukuba, ikyanya imyaka igalengerana, ugayiji deta: «Ukutuula ho, kutakiri mu njambaaza.»

Mwigiriza 12:1 ပူးပေါင်းရင်းမြစ်များ

Ndondeko 39:2

Yaho i Miisiri, Yusefu anatuula mu nyumba ya nahamwabo, Potifaari. Nahano bâli yamiinwi, anakizi múgenduusa.

Ndondeko 39:23

Uyo mukulu, bwo âli mali sikiiriza Yusefu imikolwa yoshi, ndaabyo byo âli kizi ki yilibuza kwo. Mukuba, Nahano âli yamiri na Yusefu, anakizi múgenduusa mu kati ka byoshi.

2 Samweri 19:35

Uyo Barizilaayi, ti: «E mwami, ndaki hiiti isiku nyingi hano mu kihugo. Kutagi kwo twangaki gendanwa i Yerusaleemu?

2 Samweri 19:36

Nie mukozi wawe. Buno, ngola neꞌmyaka makumi galimunaana. Ka ngi shobwiri ukumenya amiija naꞌmabi? Ka na ngi shobwiri ukuhesherwa neꞌbyokulya, kandi iri ikinywebwa? Neꞌkyanya abimbi bali mu yimba, baba bashosi, kandi iri bakazi, ka ngi shobwiri ukuyuvwa iri amazu gaabo gatwanganusiri? E mwami, nahamwitu, kituma kiki nangashubi kuzidohera?

1 Baami 14:13

Abahisiraheeri booshi, bagamúlirira ku kimombo, banamúziike. Umenye kwo mu mbaga ya Yerobwamu, yoyo naaho ye gaziikwa. Mwiꞌyi mbaga, yehe naaho, ye kasimiisa Nahano Rurema waꞌBahisiraheeri.

1 Baami 18:12

Uyiji kwoꞌkulyokera ubusore bwani, ndi mu simbaha Nahano. Bwo namu shaagaga hano, hali ikyanya Umutima gwa Nahano gwangakulengeza, gunakutwale ho ndayiji. Neꞌri nangagendi bwira Ahabu, naye atanaki kugwane hano, si agayami nyita.

Nehemiya 4:14

Aahago! Ikyanya mugayuvwa izu lyeꞌkibuga, munayami kishololokera. Rurema witu ye gatulwira.»

Hayubu 30:2

Iyo misore, bunguke buki nâli ngagilongera kwo? Si imisi yayo ikola-kola ndaayo, inakola tufwa-busha!

Zaburi 119:55

E Nahano, kiri na bushigi, ndi mu ba ngukengiiri. Kwokwo ngakizi simbaha imaaja zaawe.

Zaburi 34:11

Kiri neꞌndare, hali ikyanya iri mu bula byo igaalya, inagende ijojobiiri. Haliko abandu ba Nahano boohe, ikyanya bali mu múlooza, ndaakyo kindu kiija kyo bali mu bula.

Zaburi 63:6

Ngoli siimiri bweneene, ukuhima umundu úwalya íbiheshiri. Kwokwo, ngakizi kuyivuga, mu kukuyimbira.

Zaburi 90:10

Yizo siku ziitu, ziri mu hekera ku myaka makumi galinda. Kandi iri twangaba tuli neꞌmisi, twangahisa kiri naꞌmakumi galimunaana. Kundu kwokwo, mu yizo siku zooshi, tuli mu longaga naaho amakuba, noꞌmwizingeerwe. Ziri mu lenga duba, iri tunagenda.

Migani 22:6

Ikyanya umwana akiri mwanuke, ukizi múyereka ngiisi kwo angatuula ku njira nyiija. Iyo njira, kiri neꞌkyanya angaba akola mushaaja, atagagijanda.

Migani 8:17

Ngiisi ábanguuziri, naani mbakuuziri. Na ngiisi ábagweti bagandooza, bagayiji ndonga.

Mwigiriza 11:10

Utakizi ki gerania. Neꞌri wangalyanirwa mu magala, utakutwaze. Si ubusore bwawe, kuguma naꞌmalega gaabwo, bigalenga duba.

Mwigiriza 11:2

Yibyo bindu, ubigabule mu bandu balinda, kiri noꞌmunaana. Mukuba, hano mu kihugo, utayiji ngiisi íbigahomba.

Mwigiriza 11:8

Kiri naꞌbandu, ikyanya bali mu ramba imyaka mingi, bakwiriiri bashambaalire ngiisi lusiku lwaꞌmarambe gaabo. Kundu kwokwo, bakizi kengeera kweꞌsiku mbi zo zigaaba nyingi. Si byoshi íbigaki kulikira ha nyuma, biryagagi bya busha-busha!

Hisaaya 26:8

E Nahano, tukulindiriiri, tunali mu kulikira imaaja zaawe. Tukuyifwijiri, tunali neꞌkyedu kyoꞌkukizi kuhuuza.

Kimombo 3:27

Bunali bwija, umundu ayemeere ukuyigenderera, ku kyanya akiri musore.

Danyeri 1:17

Yabo batabana kwo bali bana, Rurema anabaheereza ubumenyi, halinde banalonga ukusobanukirwa naꞌmandiko ga kwingi-kwingi gaꞌBababeeri. Na kwakundi, anaheereza Danyeri ikigabi kyoꞌkukizi sobaanura amabone neꞌbirooto bya kwingi-kwingi.

Hosheya 7:9

Ibinyamahanga keera bikamúmala imisi, bátanamenya. Yabo Bahisiraheeri, invwi keera zakwiraga itwe lyoshi, keera banaluha bweneene! Kundu kwokwo, batali noꞌmwazi.

Luka 1:15

Uyo Yohana, agaaba mukulu imbere lya Nahano. Atakizi nywa idivaayi, kandi iri ikindi kilalusa kyoshi! Mukuba, ukulyokera ukubutwa kwage, agaaba ayijuziibwi mwoꞌMutima Mweru.

Luka 18:16

Kundu kwokwo, Yesu anahamagala balya baana, anadeta: «Yabo baana baanuke, mubaleke banyijire, mutanakizi bahangirira. Si ngiisi ábali nga yaba, boohe bo beene ubwami bwa Rurema.

Bahefeso 6:4

Na niinyu mwe bayishe ba baana, mutakizi yagaza abaana biinyu. Haliko, mukizi balera bwija mu kati ka Nahano, iri munakizi bahanuula ku magambo gaage.

Bukengeeze 8:18

Nanga maashi! Mukengeere kwo Nahano, Rurema winyu, ye mu mùshoboleesa ukugala. Na kirya kihango kyo akanywana na bashokuluza biinyu, akiri mu kisimbaha halinde zeene.

2 Timoteyo 3:15

Ukulyokera ubwanuke bwawe, wâli koli yiji Amandiko Meeru. Gaago mandiko, gashobwiri ukukugira ube mwitegeereza, halinde ulongage ukukizibwa mu kubiika Yesu Kirisito kwoꞌbwemeere.

1 Samweri 1:28

Uyu mwana, namútanga imwa Nahano, gira akizi múkolera ku kyanya kyoshi agaaba akiri mugumaana.» Iri Haana akayusa ukubwira Heri kwokwo, anafukama imbere lya Nahano, iri anamúyikumba.

1 Samweri 16:7

Nahano anamúbwira kwokuno: «E Samweri, uyu, keera namúlahira. Utakizi lolera umundu ku njusho yage, kandi iri ku mutumba gwage. Yibyo byaꞌmagala, si byaꞌbandu nabo bali mu lola kwo. Haliko niehe, ndi mu loleekeza naaho ku biri mu mutima.»

1 Samweri 2:18

Ku kyanya Samweri âli kizi kolera Nahano, âli kizi ba ayambiiti ikangaata lyoꞌbugingi lyeꞌkitaani.

1 Samweri 2:26

Umwana Samweri, anagenderera ukukula, anakizi simiisa Nahano, kiri naꞌbandu.