Si mwâye gendi bunda mu mbohe, kandi iri muminikwe kuguma na ábali mu yitirwa mwiꞌzibo. Kundu kwokwo, ubute bwa Nahano bugaaba butazi hooha. Agaaba aki bangwiri ukuboko kwage, mu kulooza ukuhana abandu baage.
Ku kyanya Nahano agaminika abandu, ibirunda byabo bigashaabukira i bulambo, binalambikwe hooshi mu kihugo nga nagiira. Ndaanaye úgabikuumania, ndaanaye úgabalirira, mbu abiziike.
«“E Baruki! Buno ukiri mu yifwija kwo nangakugenduusa. Aahabi! Si ngola ngahaniiriza abandu booshi ba mu kino kihugo! Kundu kwokwo, ngiisi ho wenyene ugagenda, ngaaleka ufuushuke.”» Kwokwo, kwo Nahano adesiri.
Wâli kizi gira ibyaha bweneene, kiri noꞌkugungana, halinde wanayulubaza ngiisi ho wâli kizi yikumbira. Kwokwo, ngiisi ho wâli tuuziri, nanahayakiza umuliro, halinde gwanahajigiivya. Nanakuhindula ube munyota-kiiko mu masu gaꞌbandu booshi.
«Ngaaba keera namùhaniiriza ku buraakari bweneene, mu kuyagazania. Abagoma biinyu bagakizi mùshekeereza, honyo! Ikyanya bagaabona ngiisi kwo mwahanwa, bagalonga ukukengulwa, iri banahuumirwa. Ee! Bagaabona ngiisi kwo ndi mu hana ikihugo. Kwokwo, kwo nie Nahano ndesiri.
Yibyo byoshi, kundu mugweti mugabigira, si baguma biinyu bagasingoolwa ngana ku muliro, naꞌbandi banayitwe ku ngooti. Mugajanganula-janganula, nga kweꞌnzige ziri mu piisa byoshi. E bandu beꞌNinaawi! Kundu mwangaluguuka nga mahaazi, mugashaganibwa naaho.